(ភ្នំពេញ)៖ លោកឧកញ៉ាឱសថបណ្ឌិត ហៃ លីអ៊ាង ប្រធានមូលនិធិគីណាល់ និងជាប្រធានអគ្គនាយក្រុមហ៊ុន ខនហ្វីរេល-ប៉េប៉េអឹម ដែលជាអ្នកជំនួញជើងចាស់មួយរូប នៅក្នុងប្រទេសកម្ពុជា បានលើកឡើងថា ការអភិវឌ្ឍន៍វិស័យកសិកម្ម គឺជាធាតុផ្សំគន្លឹះដ៏សំខាន់ ក្នុងការអភិវឌ្ឍន៍សេដ្ឋកិច្ចកម្ពុជា។

ការលើកឡើងបែបនេះ ធ្វើឡើងក្នុងឱកាសដែល លោកឧកញ៉ាឱសថបណ្ឌិត ហៃ លីអ៊ាង អញ្ជើញចូលរួមក្នុងពិធីប្រគល់ «ពានរង្វាន់ត្នោតមាស» ឬ «Thnot d'Or» ឆ្នាំ២០២៥ ក្នុងការប្រកួតប្រជែង សិក្សាស្រាវជ្រាវឈានមុខគេ ផ្នែកច្នៃប្រឌិត និងការអភិវឌ្ឍន៍ផលិតផលកែច្នៃពីស្វាយ និងការជ្រៀតចូលទីផ្សារ។

ពិធីនេះ ប្រព្រឹត្ដឡើងក្រោមវត្ដមាន លោក អ៊ុច បូររិទ្ធ អនុប្រធានទី១ ព្រឹទ្ធសភានៃកម្ពុជា ដែលបានរៀបចំឡើង នៅទីស្នាក់ការកណ្តាល មូលនិធិគីណាល់ ស្ថិតក្នុងសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ នៅថ្ងៃទី២៦ ខែកក្កដា ឆ្នាំ២០២៥។

លោកឧកញ៉ាឱសថបណ្ឌិត ហៃ លីអ៊ាង បានលើកឡើងទៀតថា ការច្នៃប្រឌិត រួមផ្សំជាមួយនឹងចំណេះដឹង បែបប្រពៃណីរបស់កសិករខ្មែរ គឺពិតជាមានសារៈសំខាន់ខ្លាំងណាស់ ក្នុងការនាំមកនូវតម្លៃបន្ថែម សម្រាប់ផលិតផលក្នុងស្រុករបស់យើង ដែលជាមូលដ្ឋានគ្រឹះ នៃការអភិវឌ្ឍន៍ជនបទ។

បើតាមលោកឧកញ៉ាឱសថបណ្ឌិត ហៃ លីអ៊ាង, «ពានរង្វាន់ត្នោតមាស» នេះ មានបំណងជំរុញ និងលើកទឹកចិត្តដល់ស្មារតីស្រាវជ្រាវ និងការច្នៃប្រឌិតសម្រាប់
យុវនិស្សិតវ័យក្មេងកម្ពុជា ឱ្យធ្វើការសិក្សាស្រាវជ្រាវ តាមបែបវិទ្យាសាស្រ្ត លើបញ្ហាសុខភាពជាចម្បង។

លោកឧកញ៉ា ហៃ លីអ៊ាង បានឲ្យដឹងថា ការបង្កើតពានរង្វាន់ គីណាល់កាលពីឆ្នាំ ២០១១ គឺបានបង្ហាញពីការប្តេជ្ញាចិត្ត របស់មូលនិធិគីណាល់ ដើម្បីផ្តល់ឱកាសដល់យុវជន និងបើកផ្លូវឱ្យពួកគេទទួលបាន នូវការស្រាវជ្រាវមួយនៅក្នុងប្រទេសកម្ពុជា។

លោកឧកញ៉ាបន្ដថា នៅក្នុងគំនិតផ្តួចផ្តើមនេះ ក្រុមហ៊ុន-សហគ្រាស ខនហ្វីរេល និងប៉េប៉េអឹម បានបន្តការងាររបស់ខ្លួនបន្ថែមទៀតដោយបង្កើតនូវ «ពានរង្វាន់ត្នោតមាស» ឬ Thnot d'Or កាលពីឆ្នាំ ២០១៨ ដែលជាពានរង្វាន់សម្រាប់ឧទ្ទិសដល់ការច្នៃប្រឌិត ផ្តល់តម្លៃបន្ថែមដល់ផលិតផលក្នុងស្រុក និងផ្សព្វផ្សាយពីផលិតផលចំណីអាហារសុវត្ថិភាព។

ពានរង្វាន់ទាំងពីរនេះ មានតួនាទីរៀងៗខ្លួន ដោយបានបង្ហាញពីទេពកោសល្យ និងគាំទ្រដល់ការបង្កើតគំនិតច្នៃប្រឌិតថ្មីៗ សម្រាប់បម្រើដល់ការអភិវឌ្ឍន៍ជនបទ និងសេដ្ឋកិច្ចរបស់ប្រទេស។ នេះជាការបញ្ជាក់បន្ថែម របស់លោកឧកញ៉ាឱសថបណ្ឌិត ហៃ លីអ៊ាង។

សូមជម្រាបថា កម្មវិធីពានរង្វាន់ត្នោតមាស មានការទទួលស្គាល់ និងល្បីល្បាញ គួរឱ្យកត់សម្គាល់តាមរយៈ ការចុះឈ្មោះចូលរួមប្រកួតជារៀងរាល់ឆ្នាំរបស់និស្សិត។ កាលពីឆ្នាំ ២០១៨ ដែលជាឆ្នាំដំបូង មាននិស្សិតចំនួន១៩ក្រុម បានចុះឈ្មោះចូលរួមប្រកួត។ ពីមួយឆ្នាំទៅមួយឆ្នាំកម្មវិធីប្រកួតនេះ មានការគាំទ្រកាន់តែច្រើន។

សម្រាប់ប្រធានបទ ឆ្នាំ២០២៥ «បច្ចេកទេសកែច្នៃ ផលិតផលចេញពីផ្លែស្វាយ»។

ការប្រកួតស្នាដៃអត្ថបទស្រាវជ្រាវ នៅក្នុងឆ្នាំនេះ ផ្តោតសំខាន់លើប្រធានបទ ស្តីអំពី៖ «ការកែច្នៃផលិតផលស្វាយ ព្រមទាំងសិក្សាលក្ខណៈបច្ចេកទេស លើខ្សែសង្វាក់ផលិតកម្ម ប្រកបដោយនវានុវត្តន៍ សម្រាប់ទីផ្សារ» ដែលឆ្លុះបញ្ចាំងពីសក្តានុពលដ៏សំខាន់របស់ប្រទេសកម្ពុជា ក្នុងការផលិត និងនាំចេញស្វាយ។

ការជ្រើសរើសប្រធានបទនេះ គឺពិតជាមានលក្ខណៈពិសេសប្រកបដោយយុទ្ធសាស្រ្ត។ នៅឆ្នាំ២០២៣ វិស័យកសិកម្មកម្ពុជាសម្រេចបាន GDP សរុប ៩,៧៣៧.៦០ពាន់លានរៀល ដោយវិស័យកសិកម្មមាន២២% នៃផលិតផលក្នុងស្រុកសរុបរបស់ជាតិ៕