សមាគមធនាគារ និងសមាគមមីក្រូហិរញ្ញវត្ថុ៖ បើទោះបីគ្រឹះស្ថានធនាគារ និងហិរញ្ញវត្ថុ រងប៉ះពាល់ពីការផ្តល់អនុគ្រោះ ប៉ុន្តែរាល់អ្នកដាក់ប្រាក់បញ្ញើ នឹងទទួលបានការប្រាក់ដដែល (Video inside)
01-08-2025 15:48
(ភ្នំពេញ)៖ លោក កាំង តុងងី ប្រធាននាយកដ្ឋានទំនាក់ទំនង សមាគមគ្រឹះស្ថានមីក្រូហិរញ្ញវត្ថុនៅកម្ពុជា បានបញ្ជាក់ឲ្យដឹងថា បើទោះបីគ្រឹះស្ថានធនាគារ និងហិរញ្ញវត្ថុ រងប៉ះពាល់ពីការផ្តល់អនុគ្រោះ ប៉ុន្តែរាល់អ្នកដាក់ប្រាក់បញ្ញើ នឹងទទួលបានការប្រាក់ដដែល។
ការបញ្ជាក់ឲ្យដឹងបែបនេះ ធ្វើឡើងក្នុងឱកាសដែល លោក កាំង តុងងី អញ្ជើញចូលរួម ក្នុងកិច្ចពិភាក្សាលើប្រធានបទ៖ «វត្តមានរបស់គ្រឹះស្ថានធនាគារ និងហិរញ្ញវត្ថុ លើការបន្ធូរបន្ទុកហិរញ្ញវត្ថុ របស់ក្រុមអ្នកងាយរងគ្រោះពីបញ្ហាព្រំដែនកម្ពុជា-ថៃ» ក្នុងកម្មវិធី FRESH BUSINESS។
លោក កាំង តុងងី បានបញ្ជាក់ថា «នៅក្នុងដំណាក់កាលនេះ នៅពេលដែលយើងផ្ដល់ការសម្រាលបន្ទុក ដល់អតិថិជនយោធិន ពិតណាស់គ្រឹះស្ថានហិរញ្ញវត្ថុ ជាពិសេសគ្រឹះស្ថាន ហិរញ្ញវត្ថុតូចៗ ពិតជាប៉ះពាល់ដល់ប្រាក់ចំណូល ក៏ប៉ុន្ដែខ្ញុំសូមធានាបញ្ជាក់ទៅអតិថិជន ដែលដាក់ប្រាក់បញ្ញើនៅតាមគ្រឹះស្ថានមីក្រូហិរញ្ញវត្ថុ ឬក៏ធនាគារ យើងនៅតែរក្សាបង់ការប្រាក់ ដល់អ្នកដែលដាក់ប្រាក់បញ្ញើ»។
ជាមួយគ្នានេះ លោក សុខ ចាន់ ប្រធាននាយកដ្ឋានទំនាក់ទំនងសាធារណសមាគមធនាគារកម្ពុជា បានបញ្ជាក់ថា «យើងយល់ថា ជាការរួមចំណែក ចូលរួមក្នុងបុព្វហេតុរបស់ជាតិ ដូច្នេះការប៉ះពាល់ពិតជាមាន ប៉ុន្ដែយើងអាចគ្រប់គ្រងបាន ហើយនេះជាការលះបង់នៅក្នុងប្រទេស ដែលកំពុងមានការលំបាក»៕
ខាងក្រោមនេះ ជាវីដេអូនៃការលើកឡើងទាំងស្រុងរបស់លោក កាំង តុងងី និងលោក សុខ ចាន់៖
