(ភ្នំពេញ)៖ លោក សុខ ចាន់ ប្រធាននាយកដ្ឋានទំនាក់ទំនងសាធារណៈ សមាគមធនាគារនៅកម្ពុជា បានកត់សម្គាល់ថា គ្រឹះស្ថានធនាគារ និងហិរញ្ញវត្ថុនៅកម្ពុជា បានចូលរួមចំណែកយ៉ាងសស្រាក់សស្រាំជួយ ដល់​យោធិនដែលបានបំពេញប្រតិបត្តិការក្នុងសមរភូមិការពារបូរណភាពទឹកដីកម្ពុជា​ ​​និងជនភៀសសឹកនៅតាមព្រំដែន​​ លើសពីសេចក្តីណែនាំរបស់ធនាគារជាតិនៃកម្ពុជា។

បើតាមលោក សុខ ចាន់ គិតមកដល់ថ្ងៃទី១ ខែសីហា ឆ្នាំ២០២៥នេះ ​គ្រឹះស្ថានធនាគារ និងហិរញ្ញវត្ថុប្រមាណ៤៦ហើយដែលបានប្រកាស​លុបចោលបំណុលទាំងស្រុង ជូនដល់យោធិនពលីជីវិត និងអ្នករួមខ្ចី និងសម្រួលអនុគ្រោះដល់យោធិន​រងរបួស ពិការ និងជនភៀសសឹក ក្នុងនោះគ្រឹះស្ថានធនាគារមានចំនួន២២ និងគ្រឹះស្ថានមីក្រូហិរញ្ញវត្ថុ មានចំនួន២៤ស្ថាប័ន។

លោកពន្យល់ថា តាមសេចក្តីណែនាំរបស់ធនាគារជាតិ បាន​ណែ​នាំឱ្យ​​គ្រឹះ​ស្ថាន​ធនាគារ និងហិរញ្ញវត្ថុ​លុបចោលឥណទាន រហូតដល់ចំនួន១០លានរៀល របស់​អតិ​ថិជន​ជាកងទ័ពពិការនៅសមរភូមិ និង​លុបចោលឥណទានរហូតដល់ចំនួន៨០លាន​រៀល របស់អតិថិជន ឬអ្នករួមខ្ចី ជាយោធិនពលី​​ ប៉ុន្តែធនាគារខ្លះបានប្រកាសលុបចោលទាំងស្រុងតែម្តង។

លោក កាំង តុងងី ប្រធាននាយកដ្ឋានទំនាក់ទំនង សមាគមគ្រឹះស្ថានមីក្រូហិរញ្ញវត្ថុនៅកម្ពុជាបានលើកឡើងដែរថា ដើម្បីឱ្យការអនុវត្តកាន់តែមានប្រសិទ្ធិភាព សមាគមទាំងពីរនឹងធ្វើការតាមដានយ៉ាងហ្មត់ចត់​៕

សូមស្តាប់ការលើកឡើងបន្ថែមរបស់ លោក សុខ ចាន់ និងលោក កាំង តុងងី៖