មន្ដ្រីជំនាញហិរញ្ញវត្ថុ៖ ពេលដែលអតិថិជនជួបការលំបាក ជាពេលដែលគ្រឹះស្ថានធនាគារ និងហិរញ្ញវត្ថុ ត្រូវតែចូលជួយតាមលទ្ធភាព ដែលអាចធ្វើបាន «អតិថិជនរីកចម្រើន ទើបគ្រឹះស្ថានរីកចម្រើនដែរ» (Video inside)
01-08-2025 16:17
(ភ្នំពេញ)៖ លោក កាំង តុងងី ប្រធាននាយកដ្ឋានទំនាក់ទំនង សមាគមគ្រឹះស្ថានមីក្រូហិរញ្ញវត្ថុនៅកម្ពុជា បានលើកឡើងថា ពេលដែលអតិថិជន ជួបការលំបាក គឺជាពេលដែល គ្រឹះស្ថានធនាគារ និងហិរញ្ញវត្ថុ ត្រូវតែចូលជួយតាមលទ្ធភាពដែលអាចធ្វើបាន ព្រោះលុះត្រាតែអតិថិជនរីកចម្រើន ទើបគ្រឹះស្ថានធនាគារ និងហិរញ្ញវត្ថុរីកចម្រើនដែរ។
ការលើកឡើងបែបនេះ ធ្វើឡើងក្នុងឱកាសដែល លោក កាំង តុងងី អញ្ជើញចូលរួម ក្នុងកិច្ចពិភាក្សាលើប្រធានបទ៖ «វត្តមានរបស់គ្រឹះស្ថានធនាគារ និងហិរញ្ញវត្ថុ លើការបន្ធូរបន្ទុកហិរញ្ញវត្ថុ របស់ក្រុមអ្នកងាយរងគ្រោះពីបញ្ហាព្រំដែនកម្ពុជា-ថៃ» ក្នុងកម្មវិធី FRESH BUSINESS។
លោក កាំង តុងងី បានបញ្ជាក់យ៉ាងដូច្នេះថា «កាលណាគាត់រីកចម្រើន ធ្វើឲ្យវិស័យធនាគារ និងហិរញ្ញវត្ថុ រីកចម្រើនដូចគ្នា នៅពេលដែលអតិថិជនជួបកាលពិបាក ក៏វាប៉ះពាល់ ដល់ប្រតិបត្ដិការអាជីវកម្ម វិស័យធនាគារ និងហិរញ្ញវត្ថុ ចឹងពេលដែលគាត់ពិបាកនេះហើយ ជាពេលដែលគ្រឹះស្ថានហិរញ្ញវត្ថុ ត្រូវចូលជួយគាត់តាមលទ្ធភាព ដែលអាចធ្វើទៅបាន»។
ទន្ទឹមគ្នានេះ លោក កាំង តុងងី បានលើកឡើងថា អាជីវកម្មនៅក្នុងវិស័យធនាគារ និងហិរញ្ញវត្ថុ ជាអាជីវកម្មរវាងមនុស្ស និងមនុស្ស ដូច្នេះអតិថិជន នៅក្នុងវិស័យធនាគារ និងហិរញ្ញវត្ថុ អត់ដែលចាត់ទុកថា អតិថិជននោះទេ គឺចាត់ទុកដូចជាដៃគូអាជីវកម្ម។
លោក កាំង តុងងី បានបញ្ជាក់ថា អាជីវកម្មនៅក្នុងវិស័យធនាគារ និងហិរញ្ញវត្ថុ អត់ដូចអាជីវកម្មលក់ដូរ ឲ្យផលិតផលទៅយកលុយមកនោះទេ គឺផ្ដល់ឥណទានមួយកញ្ចប់ធំឲ្យអតិថិជន ហើយអតិថិជននឹងមកបង់សងត្រឡប់មកបន្ដិចម្ដងៗ ជារៀងរាល់ខែ តាមរយៈកាលកំណត់៕
ខាងក្រោមនេះ ជាវីដេអូនៃការលើកឡើងទាំងស្រុង របស់លោក កាំង តុងងី៖
