(ភ្នំពេញ)៖ លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា (CDC) បានលើកឡើងថា ក្រុមហ៊ុន GM ជ្រើសរើសយកប្រទេសកម្ពុជា ដែលជាប្រទេសតែមួយគត់ក្នុងតំបន់អាស៊ាន ដែលទទួលបានសិទ្ធិពិសេសក្នុងការផ្គុំដំឡើងរថយន្ត Chevrolet។

ការលើកឡើងរបស់មន្ដ្រីជាន់ខ្ពស់ CDC ក្នុងឱកាសអញ្ជើញ ជាអធិបតីពិធីសម្ពោធរថយន្តប្រភេទ ភីកអាប់ ហ្សេវរ៉ូឡេ ខូឡូរ៉ាដូ (Chevrolet Colorado)។ លោកអគ្គលេខាធិការ បានសម្តែងនូវការអបអរសាទរចំពោះក្រុមហ៊ុន យូណាយធីត អូតូ ត្រេឌីង ក្នុងការសម្រេចបាននូវសមិទ្ធិផលដ៏អស្ចារ្យមួយនេះ។

អគ្គលេខាធិការរូបនេះ បានលើកឡើងនូវយុទ្ធសាស្ត្រចម្បងចំនួនពីរ សម្រាប់ឲ្យក្រុមហ៊ុនធ្វើការពិចារណា ដែលយុទ្ធសាស្ត្រទី១៖ ការពង្រឹងខ្សែច្រវាក់តម្លៃក្នុងស្រុក និងទី២៖ សូមឲ្យក្រុមហ៊ុន យូណាយធីត អូតូ ត្រេឌីង ចូលរួមជំរុញធ្វើឲ្យប្រទេសកម្ពុជាក្លាយជាមជ្ឈមណ្ឌលប្រមូលផ្តុំការនាំចេញទាំងផលិតផលរថយន្ត និងទាំងគ្រឿងបង្គុំរថយន្ត។

លោកបានបញ្ជាក់ អំពីការបន្តប្តេជ្ញាចិត្តរបស់រាជរដ្ឋាភិបាលក្នុងការរក្សាបាននូវបរិយាកាសវិនិយោគមួយ ដែលមានភាពអំណោយផល និងអាចប៉ាន់ប្រមាណទុកជាមុនបាន។ ជាក់ស្តែងដូចជាកាលពីពេលថ្មីៗនេះ កម្ពុជាបានឆ្លើយតបយ៉ាងឆាប់រហ័សទៅលើបញ្ហាពន្ធគយបដិការរបស់សហរដ្ឋអាមេរិក ដែលកម្ពុជាសម្រេចបានការកាត់បន្ថយអត្រាពន្ធគយបដិការពី៤៩% មកត្រឹម៣៦% ហើយចុងក្រោយមកត្រឹម ១៩%។ នេះជាដំណឹងដ៏ល្អសម្រាប់ប្រជាពលរដ្ឋកម្ពុជា វិនិយោគិន និងធុរជនទាំងអស់ដែលកំពុងមានសកម្មភាពអាជីវកម្មនៅកម្ពុជា។

ឆ្លៀតក្នុងឱកាសនេះ អគ្គលេខាធិការ CDC បានថ្លែងអំណរគុណដល់ប្រធានាធិបតី Donald Trump ដែលបានយកចិត្តទុកដាក់ដោយផ្ទាល់នៅក្នុងការផ្ដួចផ្ដើម និងជំរុញឲ្យមានការឈប់បាញ់គ្នារវាងកងទ័ពកម្ពុជា និងកងទ័ពថៃ និងបន្តតាមដានការអនុវត្តបទឈប់បាញ់ដោយផ្ទាល់។

បន្ថែមលើនេះ ប្រធានាធិបតីអាមេរិក ក៏បានមានការយោគយល់សម្រាប់កម្ពុជា ដោយបានផ្ដល់នូវការអនុគ្រោះពន្ធចុងក្រោយត្រឹម ១៩% ដើម្បីកម្ពុជាអាចបន្តពង្រឹងការអភិវឌ្ឍសេដ្ឋកិច្ចរបស់ខ្លួន ពិសេសការពង្រឹងទំនាក់ទំនងពាណិជ្ជកម្មរវាងកម្ពុជា និងសហរដ្ឋអាម៉េរិកបន្ថែមទៅទៀត។

សូមជម្រាបថា ក្រុមហ៊ុន ធីអេច អូតូម៉ូជីវ មេនូហ្វេកឆឺរីង ឯ.ក និងក្រុមហ៊ុន ចេណីរល ម៉ូទ័រ នៅថ្ងៃទី០១ ខែសីហា ឆ្នាំ២០២៥នេះ បានចុះហត្ថលេខាផ្តល់សិទ្ធិផ្តាច់មុខតម្លើងរថយន្ត ហ្សេវរ៉ូឡេនៅកម្ពុជា។

ពិធីចុះហត្ថលេខានេះបានបើកផ្លូវដល់ក្រុមហ៊ុន ក្រុមហ៊ុន យូណាយធីត អូតូ ត្រេឌីង ក្នុងការសាងសង់រោងចក្រតម្លើងរថយន្តទំនើប ការផ្តល់សេវាកម្មកាន់តែប្រសើរ ព្រមទាំងជួយជម្រុញដល់ការផលិត និងចែកចាយនៅក្នុងតំបន់កាន់តែរីកចម្រើននាពេលអនាគត។

ក្រុមហ៊ុន ធីអេច អូតូម៉ូជីវ មេនូហ្វេកឆឹរឹង ឯ.ក គ្រោងបោះទុន ១៩លានដុល្លារអាមេរិក ដើម្បីដំណើរការរោងចក្រ តម្លើងរថយន្ត ដែលអាចផលិតឡានចន្លោះពី ១ម៉ឺនដល់១ម៉ឺនពីរពាន់គ្រឿងក្នុងរយៈ ពេល១ឆ្នាំ។