(បន្ទាយមានជ័យ)៖ ពលរដ្ឋរស់នៅក្រុងប៉ោយប៉ែត ខេត្តបន្ទាយមានជ័យ បាននាំគ្នាបន្ថយឥទ្ធិពលការចាយវាយប្រាក់បាតរបស់ថៃ នៅក្នុងជីវភាពរស់នៅប្រចាំថ្ងៃរបស់ពួកគាត់ ដោយអ្នកខ្លះលេងទទួលយកលុយបាតសោះ តម្រូវឱ្យដូចជាលុយរៀលរបស់ជាតិខ្មែរ ទើបទទួលយក ហើយការចាយវាយទៀតសោធ គឺលែងគគ្រឹងគគ្រេងដូចមុនហើយ។

ការបន្ថយឥទ្ធិពលប្រាក់បាត ក្នុងការចាយវាយប្រចាំថ្ងៃនេះ ប្រជាពលរដ្ឋបញ្ជាក់ថា ដោយសារពួកគាត់ឈឺចាប់ពីការរំលោភបំពានទាំងកំរោលរបស់យោធាថៃ មកលើកម្ពុជា។

លោក យ៉ា សុខុន ពលរដ្ឋរស់នៅក្រុងប៉ោយប៉ែត បានប្រាប់បណ្តាញព័ត៌មាន Fresh News នៅថ្ងៃទី៣ ខែសីហា ឆ្នាំ២០២៥នេះថា ចាប់តាំងពីមានជម្លោះព្រំដែន និងប្រយុទ្ធគ្នារវាងកម្ពុជា-ថៃ មិនថាប្រជាពលរដ្ឋក្រុងប៉ោយប៉ែតទេ គឺទូទាំងប្រទេសកម្ពុជា មានការឈឺចាប់យ៉ាងខ្លាំង ចំពោះអំពើឈ្លានពានទាំងកំរោលនេះ។ ដូច្នេះហើយទើបស្មារតីជាតិនិយម បានជំរុញពលរដ្ឋក្រុងប៉ោយប៉ែត លែងឃើញមានសកម្មភាពចាយវាយលុយបាត គគ្រឹកគគ្រេងដូចមុនទៀត ដោយកន្លែងលក់ដូរ ពិសេសអ្នកលក់ដូរតូចៗ គឺមិនទទួលយកលុយបាតទេ គឺតម្រូវឱ្យប្តូរជាលុយរៀលសិន។

លោក សុខុន និយាយថា «ការចាយវាយលុយបាតប្រចាំថ្ងៃ របស់អ្នកក្រុងប៉ោយប៉ែតមិនដូចមុនទេ ខ្ញុំអាចនិយាយបានថា ពួកគាត់ចាប់ផ្តើមពហិកាលែងចង់ទទួលលុយបាតទៀតហើយ។ តាមខ្ញុំសម្គាល់មើល មានតែការជួញដូរទឹកប្រាក់ច្រើន ដែលនៅទទួលយកលុយបាត។ តែមិនយូរទេ បើសិនជាស្ថានភាពនៃការបំពានរបស់ថៃនៅតែបែបនេះ នឹងឈានដល់ការឈប់ចាយតែម្តង»។

លោក ប៉ាន់ ខេមវឌ្ឍនា ដែលកំពុងស្នាក់នៅក្រុងប៉ោយប៉ែត បានឱ្យដឹងស្រដៀងគ្នានឹងលោក យ៉ា សុខុន ដែរ។ លោកថា ក្តីឈឺចាប់ និងស្មារតីជាតិនិយមរបស់ប្រជាពលរដ្ឋខ្មែរ គឺធំធេងណាស់ ដោយពួកគាត់ខ្លះចាប់ផ្តើមលែងគាំទ្រផលិតផលថៃ និងមួយចំនួនទៀត លែងទទួលចាយវាយលុយបាតរបស់ថៃទៀតហើយ។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានគត់ស្គាល់ថា ការផ្លាស់ប្តូរពីការចាយវាយលុយបាត មកចាយវាយលុយរៀលរបស់ជាតិ របស់ប្រជាពលរដ្ឋនៅតាមព្រំដែន គឺជារឿងល្អសម្រាប់ជាតិយើង ស្របទៅតាមការអំពាវនាវរបស់រាជរដ្ឋាភិបាល និងធនាគារជាតិនៃកម្ពុជា ដើម្បីបង្កើនគ្រឹះសេដ្ឋកិច្ចកម្ពុជា ឱ្យកាន់តែរឹងមាំ។

លោកសង្កត់ធ្ងន់ថា «សូមឱ្យស្មារតីជាតិនិយមដ៏ខ្លាំងក្លារបស់ប្រជាជនកម្ពុជា នៅពេលនេះគួរនាំគ្នាលើកតម្កើងចាយវាយ ប្រើប្រាស់ប្រាក់រៀលដែលជាផលិតផលខ្មែរ ឱ្យកាន់តែច្រើន ដើម្បីសេដ្ឋកិច្ចជាតិរបស់យើង»៕