​(ភ្នំពេញ)៖ ធនាគារជាតិនៃកម្ពុជា បានគូសបញ្ជាក់ថា ប្រព័ន្ធធនាគារបន្តរក្សាបានភាពធន់ និងបានរួមចំណែកគាំទ្រសកម្មភាពសេដ្ឋកិច្ច ដែលឆ្លុះបញ្ចាំងតាមរយៈកំណើនទ្រព្យសកម្ម ៧,៣% កំណើនឥណទាន ២,៩% និងកំណើនប្រាក់បញ្ញើ១៤,៥%។​ នេះបើយោងតាមរបាយការណ៍ប្រចាំឆមាសទី១ និងទិសដៅការងារឆមាសទី២ របស់ធនាគារជាតិនៃកម្ពុជា​។

តាមរបាយការណ៍ របស់ធនាគារជាតិនៃកម្ពុជាបានឱ្យដឹងដែរថា​ «ទ្រព្យសកម្មរបស់គ្រឹះស្ថានធនាគារ និងហិរញ្ញវត្ថុ មានកំណើន៧,៣% ដល់៣៨៨,៥ ទ្រីលានរៀល ឬស្មើ៩៧,១ប៊ីលានដុល្លារអាមេរិក ក្នុងនោះឥណទានអតិថិជនកើនឡើង២,៩% ដល់២៤៧,៣ ទ្រីលានរៀល ឬស្មើរ ៦១,៨ ប៊ីលាន ដុល្លារអាមេរិក»។

​ចំណែកប្រាក់បញ្ញើអតិថិជនមានកំណើន១៤,៥% កើនដល់២៤៥,៩ ទ្រីលានរៀល ឬស្មើរ៦១,៥ ប៊ីលានដុល្លារអាមេរិក និងដើមទុនមានកំណើន ៥,៣% ដល់៤១,២ទ្រីលានរៀល ឬស្មើរ១០,៣ ប៊ីលានដុល្លារអាមេរិក។ គ្រឹះស្ថានធនាគារ និងហិរញ្ញវត្ថុបានបន្តចូលរួម លើកកម្ពស់បរិយាបន្នហិរញ្ញវត្ថុ តាមរយៈការផ្តល់សេវាហិរញ្ញវត្ថុកាន់តែមានប្រសិទ្ធភាព រហ័ស និងទូលំទូលាយជាងមុន ដែលឆ្លុះបញ្ចាំង តាមរយៈកំណើននៃចំនួនគណនីប្រាក់បញ្ញើអតិថិជនដល់២៨,២លានគណនី និងគណនីឥណទានអតិថិជនដល់៤,៣លានគណនី។

​ជាមួយគ្នានេះ ឥណទានរបស់គ្រឹះស្ថានធនាគារ និងហិរញ្ញវត្ថុទទួលប្រាក់បញ្ញើ កើនឡើង២,៩% ដល់២៣៦,៤ ទ្រីលានរៀល ឬស្មើរនឹង៥៩,១ ប៊ីលានដុល្លារអាមេរិក និងបានផ្តល់ទៅកាន់វិស័យសំខាន់ៗដូចជា សកម្មភាពផ្នែកអចលនទ្រព្យ ២២,៨% អាជីវកម្មលក់រាយ ១៧,១% សកម្មភាពគ្រួសារ ១០,៥% កសិកម្ម រុក្ខាប្រមាញ់ និងនេសាទ ៩,៨% សំណង់ ៩,៦% អាជីវកម្មលក់ដុំ ៨,៧% និងផ្សេងៗ ២១,៥%។

ធនាគារជាតិបានបញ្ជាក់ថា «កំណើនឥណទានបន្តមានកម្រិតទាប ដូចឆ្នាំមុនដែរ ហើយឥណទានមិនដំណើរការបានកើនឡើងបន្តិចដល់៨.៣%។ ក្នុងស្ថានភាពនេះ គ្រឹះស្ថានធនាគារនិងហិរញ្ញវត្ថុបាន ធ្វើសំវិធានធនគ្រប់គ្រាន់ ព្រមទាំងរក្សាបានភាពរឹងមាំនៃដើមទុននិងកម្រិតខ្ពស់នៃសន្ទនីយភាព ដោយអនុបាតភាពគ្រប់គ្រាន់នៃដើមទុនមានកម្រិត ២២,៨% សម្រាប់គ្រឹះស្ថានធនាគារនិងហិរញ្ញវត្ថុ ទទួលប្រាក់បញ្ញើ និង ៣១,៦% សម្រាប់គ្រឹះស្ថានធនាគារនិងហិរញ្ញវត្ថុមិនទទួលប្រាក់បញ្ញើ»។

ទន្ទឹមនេះ ធនាគារជាតិនៃកម្ពុជាបានពង្រឹងការត្រួតពិនិត្យ តាមដាននិងវិភាគ ការវិវត្តនៃហានិភ័យនានា ព្រមទាំងសហការយ៉ាងជិតស្និទ្ធជាមួយនឹងភាគីពាក់ព័ន្ធ ក្នុងការជំរុញ ការផ្តល់ឥណទាន ការបន្ធូរបន្ថយអត្រាការប្រាក់ និងការរៀបចំឥណទានឡើងវិញ។

បើតាមធនាគារជាតិ បច្ចុប្បន្ននេះ​ទីស្នាក់ការកណ្តាល និងសាខារបស់គ្រឹះស្ថានធនាគារនិងហិរញ្ញវត្ថុមានចំនួន២.៧៥៦ទីតាំង និងមានម៉ាស៊ីនដក និងដាក់ប្រាក់ស្វ័យប្រវត្តិ (ATM) ចំនួន ៥.៩៦៦ ម៉ាស៊ីន​៕