(ភ្នំពេញ)៖ លោក ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យអាកាសចរណ៍ស៊ីវិល បានប្រាប់បណ្តាញព័ត៌មាន Fresh News ថា ក្រោយពេលព្រំដែនគោក កម្ពុជា និងថៃបានបិទទាំងស្រុង ធ្វើឱ្យការដឹកជញ្ជូនទំនិញតាមផ្លូវអាកាសរវាងផ្លូវហោះហើរភ្នំពេញ និងបាងកក បានកើនឡើង។

យោងតាមរបាយការណ៍របស់អាកាសចរណ៍ស៊ីវិល គិតត្រឹមថ្ងៃទី៣០ ខែកក្កដា ឆ្នាំ២០២៥ ដល់ថ្ងៃទី៥ ខែសីហា ឆ្នាំ២០២៥ ការដឹកជញ្ជូនទំនិញតាមផ្លូវអាកាសពីទីក្រុងបាងកកប្រទេសថៃមកកម្ពុជា មានបរិមាណ ជាង២ពាន់តោនគីឡូក្រាម។

ទន្ទឹមគ្នានេះ លោក ស៊ីន ចាន់សិរីវុត្ថា បានឱ្យដឹងថា ជើងហោះហើររវាងកម្ពុជា និងថៃ គឺជើងហោះហើរភ្នំពេញ-បាងកក និងសៀមរាប-បាងកក នៅនៅរក្សាប្រក្រតីភាពដដែល ដោយក្រុមហ៊ុនអាកាសចរណ៍ Viet Jet និង Thai Airways បានបើកដំណើរការធម្មតាឡើងវិញ លើកលែងតែក្រុមហ៊ុន Bangkok Air បានផ្អាកការហោះហើរពេលព្រឹកមួយជើងចាប់ពីថ្ងៃទី៧ ខែសីហាដល់ថ្ងៃទី១៥ ខែកញ្ញា ឆ្នាំ២០២៥ ដោយសារកត្តាថយចុះអ្នកណើរ។

ជុំវិញការដឹកជញ្ជូនរវាងកម្ពុជា និងថៃ, លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់បានប្រាប់បណ្តាញព័ត៌មាន Fresh News នៅថ្ងៃទី៦ ខែសីហា ឆ្នាំ២០២៥នេះថា ដោយសារ កម្ពុជា និងថៃ ជាប្រទេសជិតខាងគ្នាកន្លងមកការដឹកទំនិញ ភាគច្រើនធ្វើឡើងតាមផ្លូវគោក ហើយការដឹកជញ្ជូនតាមផ្លូវទឹក និងផ្លូវអាកាស មានសកម្មភាពតិចតួចប៉ុណ្ណោះ ប៉ុន្តែក្រោយពេលដែលព្រំដែនគោកបានបិទ ការដឹកជញ្ជូនទំនិញបង្វែរទៅដឹកជញ្ជូនតាមផ្លូវទឹក និងផ្លូវអាកាសវិញ។ តែការដឹកជញ្ជូនតាមផ្លូវអាកាស ធ្វើឡើងសម្រាប់តែទំនិញដែលមានតម្លៃថ្លៃ និងចាំបាច់ប៉ុណ្ណោះ។

ប៉ុន្តែយ៉ាងនេះក្តីលោកកត់សម្គាល់ថា ក្រោយពេលដែលថៃ បើកការឈ្លានពានមកកម្ពុជាកាលពីថ្ងៃទី២៤ ខែកក្កដា ឆ្នាំ២០២៥ ការបញ្ជាទិញទំនិញពីថៃបានថយចុះយ៉ាងគំហុក ដោយអាជីវករ ពាណិជ្ជកម្មខ្មែរមួយចំនួនបានបង្វែរ ការបញ្ជាទិញទំនិញពីប្រទេសផ្សេងវិញ ដែលធ្វើឱ្យការដឹកជញ្ជូនទំនិញទាំងផ្លូវទឹក និងផ្លូវអាកាសរវាងកម្ពុជា និងថៃមានការថយចុះ។

យោងតាមរបាយការណ៍របស់ អគ្គនាយកដ្ឋានគយ និងរដ្ឋាករកម្ពុជា ក្នុងខែមិថុនា ឆ្នាំ២០២៥ បន្ទាប់ពីកើតមានជម្លោះព្រំដែនរវាងប្រទេសទាំងពីរ ការនាំចូលទំនិញពីថៃមកកាន់កម្ពុជា មានតម្លៃជាង ២៦២លានដុល្លារ ថយ៤.៥% ខណៈកម្ពុជានាំចេញទៅថៃវិញមានតម្លៃជាង៥២លានដុល្លារ កើនឡើង៨.២%៕