CBC: ការស្នើសុំឥណទានសម្រាប់អាជីវកម្មខ្នាតតូច មានការថយចុះគួរឱ្យកត់សម្គាល់ ក្នុងត្រីមាសទី២
07-08-2025 11:59
(ភ្នំពេញ)៖ ក្រុមហ៊ុនក្រេឌីត ប្យួរ៉ូ ឬហៅថា CBC បានឱ្យដឹងថា ក្នុងត្រីមាសទី២ ឆ្នាំ២០២៥នេះ ចំនួនពាក្យស្នើសុំឥណទានលក្ខណៈបុគ្គលប្រើប្រាស់ សម្រាប់អាជីវកម្មខ្នាតតូចមានការថយចុះប្រមាណ ១៥.៧% និងចំនួនពាក្យស្នើសុំកម្ចីប្រើប្រាស់សម្រាប់អាជីវកម្មខ្នាតតូចថយចុះចំនួន ១៦.៣% ប្រៀបធៀបនឹងត្រីមាសមុន។
លោក អឿ សុធារ័ត្ន ប្រធាននាយកប្រតិបត្តិនៃក្រុមហ៊ុនក្រេឌីត ប្យួរ៉ូ ខេមបូឌា ខូ អិលធីឌីបានមានប្រសាសន៍ថា «ចំនួននៃពាក្យស្នើសុំឥណទានលក្ខណៈបុគ្គល ប្រើប្រាស់សម្រាប់អាជីវកម្មខ្នាតតូចមានការថយចុះ និងសមតុល្យនៃពាក្យស្នើសុំឥណទានមានការថយចុះដូចគ្នា នៅក្នុងត្រីមាសនេះបើប្រៀបធៀបនឹងត្រីមាសមុន។ ចំនួនគណនីនៃដំណើរការឥណទានលក្ខណៈបុគ្គល ប្រើប្រាស់សម្រាប់អាជីវកម្មខ្នាតតូចក៏មានការថយចុះចំនួន ១.២% ប៉ុន្តែសមិទ្ធផលឥណទានលក្ខណៈបុគ្គលប្រើប្រាស់ សម្រាប់អាជីវកម្មខ្នាតតូចនៅតែមានភាពវិជ្ជាមាន ជាមួយនឹងចំនួនសមតុល្យ ០.៨% នៅក្នុងត្រីមាសទី២នេះ»។
លោកបានបន្ថែមទៀតថា គុណភាពឥណទានមានការធ្លាក់ចុះទាបជាងត្រីមាសមុន ជាមួយនឹងការកើនឡើងនៃអនុបាតនៃគណនីប្រាក់កម្ចីជាមួយនឹងការសងយឺត ៩០ថ្ងៃហួសកាលបរិច្ឆេទកំណត់ត្រឹម +៧.៤% ក្នុងត្រីមាសនេះ។
យោងតាមរបាយការណ៍ CBC បានឱ្យដឹងថា គិតត្រឹមខែមិថុនា ឆ្នាំ២០២៥នេះ ចំនួនគណនីឥណទានលក្ខណៈបុគ្គល ប្រើប្រាស់សម្រាប់អាជីវកម្មខ្នាតតូចមានការថយចុះចំនួន ១.២% បើធៀបនឹងត្រីមាសមុនដែលធ្វើឱ្យចំនួនគណនី នៅទូទាំងប្រទេសសរុបមានចំនួន ១.៧៩ លានគណនី។ ក្នុងចំណោមចំនួននេះ ៥២.៦% ជាឥណទានមូលធន ខណៈកម្ចីសំណង់មាន ០.៩% កម្ចីកសិកម្ម ២៩.៦% កម្ចីទិញទ្រព្យសកម្មមាន ៥.៤% និងកម្ចីប្រភេទផ្សេងៗមាន១១.៥%។
របាយការណ៍នេះបានបញ្ជាក់ថា ការថយចុះនេះត្រូវបានគេមើលឃើញមាននៅក្នុងគ្រប់តំបន់ គឺនៅតំបន់ទន្លេសាបថយចុះ២.៣% នៅតំបន់ខ្ពង់រាបថយចុះ១.៤% នៅតំបន់ឆ្នេរថយចុះ០.២% និងនៅតំបន់ទំនាបថយចុះ១%។
នៅត្រឹមត្រីមាសទីពីរ នៃឆ្នាំ២០២៥នេះ ចំនួនអតិថិជនដែលព្យាយាមស្នើសុំឥណទាន ក្នុងទម្រង់៥ផ្សេងៗគ្នា ដូចជា កម្ចីមូលធន, កម្ចីកសិកម្ម ,កម្ចីទិញទ្រព្យសកម្ម,កម្ចីសំណង់ និងកម្ចីផ្សេងៗ ។ ពាក្យស្នើសុំឥណទានលក្ខណៈបុគ្គលប្រើប្រាស់ សម្រាប់អាជីវកម្មខ្នាតតូច បាន ថយចុះជារួម១៥.៧% បើធៀបនឹងត្រីមាសមុន។
ពាក្យស្នើសុំកម្ចីប្រើមូលធនមានបានថយចុះ ១៦.៣%ដោយមានការថយចុះខ្លាំងនៅតំបន់ឆ្នេរ។ ចំណែកការស្នើសុំកម្ចីកសិកម្មវិញមានការថយចុះ ៩.៣%ដែលមានការថយចុះខ្លាំង នៅតំបន់ឆ្នេរដូចគ្នា។ រីឯការស្នើសុំកម្ចីផ្សេងៗវិញមានការកើនឡើងបន្តិចបន្តួច ២៤.៥% ។ ទន្ទឹមគ្នានេះ ការស្នើសុំកម្ចីទ្រព្យសកម្ម មានការថមថយ ២០.៣% ក្នុងនេះមានការថយចុះនៅតំបន់ខ្ពង់រាប ខណៈការស្នើសុំកម្ចីសំណង់កើនឡើង ៤.៤% ក្នុងនេះមានការកើនឡើងខ្លាំងនៅតំបន់ទន្លេសាប៕
