(ភ្នំពេញ)៖ លោកបណ្ឌិត គុណ ញឹម រដ្ឋមន្រ្តីប្រតិភូអមនាយករដ្ឋមន្រ្តី និងជាអគ្គនាយក នៃអគ្គនាយកដ្ឋានគយនិងរដ្ឋាករកម្ពុជា បានបញ្ជាក់ឲ្យដឹងជាថ្មីថា ទំនិញនាំចូលពីប្រទេសថៃ មកប្រទេសកម្ពុជា នៅតែអាចនាំចូលធម្មតា ហាមឃាត់តែបន្លែ ផ្លែឈើ និងប្រេងឥន្ធនៈប៉ុណ្ណោះ ដែលជាទំនិញហាមឃាត់។

ការបញ្ជាក់ឲ្យដឹងបែបនេះ ធ្វើឡើងក្នុងឱកាសដែល លោកបណ្ឌិត គុណ ញឹម ដឹកនាំកិច្ចប្រជុំផ្សព្វផ្សាយខ្លឹមសារ នៃអនុក្រឹត្យលេខ ១៣៩ អនក្រ.បក ចុះថ្ងៃទី៨ ខែសីហា ឆ្នាំ២០២៥ ស្តីពីការដាក់ឱ្យអនុវត្តអត្រាពន្ធគយ លើទំនិញនាំចូលពីសហរដ្ឋអាមេរិក នាថ្ងៃទី៨ ខែសីហា ឆ្នាំ២០២៥នេះ។

លោកបណ្ឌិត គុណ ញឹម បានបញ្ជាក់យ៉ាងដូច្នេះថា «មានការយល់ច្រឡំថា ទំនិញមកពីថៃ ហាមឃាត់មិនឲ្យចូល តាមពិតមុខទំនិញហាមឃាត់ គ្របដណ្តប់ទៅលើបន្លែ និងផ្លែឈើ និងហាមឃាត់ការនាំចូលប្រេងឥន្ធនៈ និងឧស្ម័នឥន្ធនៈ [...] ក្រៅពីមុខទំនិញហាមឃាត់ គឺនៅនាំចូលធម្មតា»។

បន្ថែមពីនោះទៀត លោកបណ្ឌិត គុណ ញឹម បានគូសបញ្ជាក់ថា មកដល់ម៉ោងនេះ អគ្គនាយកដ្ឋានគយ និងរដ្ឋាករកម្ពុជា អត់ទាន់បានទទួលការណែនាំថា ទំនិញផ្សេងៗ ក្រៅពីទំនិញហាមឃាត់ ត្រូវហាមឃាត់មិនឲ្យនាំចូលមកកម្ពុជានោះទេ គឺនៅតែអាចនាំចូលធម្មតា។

អគ្គនាយកអគ្គនាយកដ្ឋានគយ និងរដ្ឋាករកម្ពុជា បានឲ្យដឹងថា ទំនិញដែលដឹកពីថៃមកកម្ពុជា អាចមានពីរប្រភព ទី១៖ ទំនិញរបស់ថៃ និងទី២៖ ទំនិញរបស់ប្រទេសទីបី ដូចជា៖ ចិន, កូរ៉េ, ជប៉ុន ដែលដឹកឆ្លងកាត់ប្រទេសថៃ ចូលមកកម្ពុជា។

សូមជម្រាបថា អគ្គនាយកដ្ឋានគយ និងរដ្ឋាករកម្ពុជា កាលពីថ្ងៃទី១៦ ខែកក្កដា ឆ្នាំ២០២៥ បានធ្វើបច្ចុប្បន្នភាពនូវមុខទំនិញ មានប្រភពដើមពីប្រទេសថៃ ដែលជាប់បម្រាម នាំចូលមកកម្ពុជា ដល់បណ្តាអាជីវករ និងពាណិជ្ជករ ធុរជន និងសាធារណជន មានបន្លែ និងផ្លែឈើ ប្រេងឥន្ធនៈ និងឧស្ម័នឥន្ធនៈ ដែលមានដូចជា៖

១៖ ប្រេងសាំង (Gasoline)
២៖ ប្រេងម៉ាស៊ូត (Diesel)
៣៖ ឧស្ម័នរាវសម្រាប់ដុត (LPG និង LNG)
៤៖ ប្រេងខ្មៅ (Fuel oil) និង
៥៖ ប្រេងសាំងយន្តហោះ (Jet-A1)។

ដោយឡែក មុខទំនិញផ្សេងទៀត ក្រៅពីមុខទំនិញ ខាងលើ មិនមែនជាកម្មវត្ថុ នៃការហាមឃាត់ការនាំចូលទេ។ អាជីវករ/ពាណិជ្ជករ នៅបន្តនាំចូលបានជាធម្មតា ដោយបំពេញបែបបទ និងនីតិវិធីកំណត់ ដោយលិខិតបទដ្ឋានជាធរមាន។

ចំពោះតម្រាយផ្លូវ និងមធ្យោបាយដឹកជញ្ជូនទំនិញ នាំចូលមកកម្ពុជា អាជីវករ/ពាណិជ្ជករ អាចប្រើប្រាស់មធ្យោបាយ ដឹកជញ្ជូនផ្សេងៗ និងតាមមាត់ច្រកផ្លូវការនានា លើកលែងតែមាត់ច្រកព្រំដែនផ្លូវគោក កម្ពុជា-ថៃ ដែលត្រូវបានបិទជាឯកតោភាគីដោយយោធាថៃ៕

១៣៖២១ ដល់១៨៖២០