(នីងប៉)៖ លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជា បានថ្លែងថា កម្ពុជាទទួលបានជោគជ័យក្នុងការចរចាជាមួយសហរដ្ឋអាមេរិក ពាក់ព័ន្ធជាមួយបដិការពន្ធដែលចេញពីកម្ពុជាទៅសហរដ្ឋអាមេរិក ក្នុងអត្រា១៩ភាគរយ ដែលជាកម្រិតអាចប្រកួតប្រជែងជាមួយប្រទេសអាស៊ានដូចគ្នា ក៏ដូចជាប្រទេសក្នុងតំបន់អាស៉ីមួយចំនួនផងដែរ។

លោកថ្លែងបែបនេះ ក្នុងឱកាសតបតាមការអញ្ជើញរបស់សម្ព័ន្ធឡូជីស្ទីក AiLA និងសមាគមដឹកជញ្ជូនបន្តអន្តរជាតិប្រចាំទីក្រុងនីងប៉ (Ningbo) ប្រទេសចិន ដឹកនាំសមាជិកមួយចំនួនទៅចូលរួមពិធីតាំងពិពណ៌ពាណិជ្ជកម្ម សេវាកម្មឡូជីស្ទីក និងខ្សែច្រវាក់ផ្គត់ផ្គង់អន្តរជាតិ (Logistics and Supply Chain International Trade Fair) ដោយមានការចូលរួមពីបណ្តារប្រទេសជាច្រើន រួមដៃគូនៅក្នុងស្រុក និងអន្តរជាតិ នៅថ្ងៃទី០៧ និងទី០៨ ខែសីហា ឆ្នាំ២០២៥។

អាមេរិកបានសម្រេចបញ្ចុះអត្រាពន្ធបដិការដល់កម្ពុជាមកត្រឹម១៩% ដែលការសម្រេចនេះបានចូលជាធរមានចាប់ពីថ្ងៃសុក្រទី០១ ខែសីហា ឆ្នាំ២០២៥តទៅ។ ការបញ្ចុះអត្រាពន្ធរបស់អាមេរិកលើទំនិញកម្ពុជាមកត្រឹម ១៩%នេះ ធ្វើឡើងក្រោយពេលដែលកម្ពុជា-ថៃ យល់ព្រមលើកិច្ចព្រមព្រៀងឈប់បាញ់កាលពីពេលថ្មីៗនេះ ជុំវិញជម្លោះនៅតាមតំបន់ព្រំដែននៃប្រទេសទាំងពីរ។

នាឱកាសនោះ លោកប្រធានក៏បានជំរុញឱ្យអ្នកវិនិយោគនៅប្រទេសចិន មកទស្សនកិច្ចនៅកម្ពុជា ដោយធានារកដៃគូដែលត្រឹមត្រូវ និងដៃគូភ្នាក់ងារដឹកជញ្ជូន ឡូជីស្ទីក ដែលជាសមាជិករបស់សមាគមដែលអាចទុកចិត្តបាន។ ក្រៅពីនោះ លោកក៏បានលើកអំពីការបិទព្រំដែនរវាងប្រទេសកម្ពុជា និងប្រទេសថៃ ដែលធ្វើឱ្យអ្នកជំនួញកម្ពុជា និងបរទេសបង្វែទិសដៅបញ្ជាទិញនៅប្រទេសផ្សេង ហើយនេះក៏ជាឱកាសសម្រាប់អ្នកធុរកិច្ចចិនផងដែរ។

សូមបញ្ជាក់បន្ថែមថា ពិធីតាំងពិពណ៍ពាណិជ្ជកម្ម ឡូជីស្ទីក និងខ្សែច្រវាក់ផ្គត់ផ្គង់ជាអន្តរជាតិនៅទីក្រុងនីប៉(Ningbo)ប្រទេសចិននាឆ្នាំនេះ មានអ្នកចូលរួមទស្សនា និងភ្ជាប់បណ្តាញទំនាក់ទនងប្រម៉ាណជាង ១មុឺននាក់ មកពីបណ្តាទីក្រុងផ្សេងៗនៃប្រទេសចិន និងបណ្តាប្រទេសផ្សេងទៀត៕