(ភ្នំពេញ)៖ ​ការនាំចូលទំនិញពីថៃ មកកម្ពុជា ក្នុងរយៈពេលមួយខែកក្កដា ក្នុងឆ្នាំ២០២៥ តម្លៃជាង ១៦៦លានដុល្លារ ធ្លាក់ចុះប្រមាណ ៤៤.១% ​ដែលបើធៀបនឹងរយៈពេល ១ខែដូចគ្នាកាលពីឆ្នាំមុន ដែលក្នុងតម្លៃជាង ២៩៧លានដុល្លារ។ នេះបើយោងតាមរបាយការណ៍របស់អគ្គនាយកដ្ឋាន និងរដ្ឋាករកម្ពុជា ដែលបណ្តាញព័ត៌មាន Fresh News ទទួលបាននៅថ្ងៃទី១១​ ខែកក្កដា ឆ្នាំ២០២៥នេះ។

ដោយឡែកការនាំចេញពីកម្ពុជាទៅថៃវិញ ក្នុងខែកក្កដាកន្លងទៅនេះ មានតម្លៃជាង ៤០លានដុល្លារ ធ្លាក់ចុះប្រមាណ ៣១.៣% បើធៀបនឹងរយៈពេលដូចគ្នាកាលពីឆ្នាំមុន មានតម្លៃជាងជាង ៥៩លានដុល្លារ។ នេះបើយោងតាមទិន្នន័យដដែល។

នាចុងសប្តាហ៍កន្លងទៅនេះ ​លោកបណ្ឌិត គុណ ញឹម រដ្ឋមន្រ្តីប្រតិភូអមនាយករដ្ឋមន្រ្តី និងជាអគ្គនាយក នៃអគ្គនាយកដ្ឋានគយនិងរដ្ឋាករកម្ពុជា បាន​ឲ្យដឹង​ថា ការធ្វើពាណិជ្ជកម្មរវាងកម្ពុជា និងថៃមានប្រក្រតីភាពធម្មតា ពោលគឺទំនិញនាំចូលពីប្រទេសថៃ មកប្រទេសកម្ពុជា នៅតែអាចនាំចូលធម្មតា ហាមឃាត់តែបន្លែ ផ្លែឈើ និងប្រេងឥន្ធនៈប៉ុណ្ណោះ ​។ គិតមកទល់ពេលនេះ រាជរដ្ឋាភិបាលមិនទាន់បានទទួលការណែនាំថា ទំនិញផ្សេងៗ ក្រៅពីទំនិញហាមឃាត់ ត្រូវហាមឃាត់មិនឲ្យនាំចូលមកកម្ពុជានោះទេ គឺនៅតែអាចនាំចូលធម្មតា។

លោកបន្ថែមថា ទំនិញដែលដឹកពីថៃមកកម្ពុជា អាចមានពីរប្រភព ទី១៖ ទំនិញរបស់ថៃ និងទី២៖ ទំនិញរបស់ប្រទេសទីបី ដូចជា៖ ចិន, កូរ៉េ, ជប៉ុន ដែលដឹកឆ្លងកាត់ប្រទេសថៃ ចូលមកកម្ពុជា។​

លោក លឹម ហេង អនុប្រធានសភាពាណិជ្ជកម្មកម្ពុជា បានប្រាប់បណ្តាញព័ត៌មាន Fresh News នៅថ្ងៃទី១១ ខសីហា ឆ្នាំ២០២៥នេះថា ការនាំចូលទំនិញពីថៃបង្ហាញសញ្ញាណធ្លាក់ចុះយ៉ាងគំហុកក្នុងខែកក្កដា​ កន្លងទៅនេះ ដោយសារភាពតានតឹងរវាងភាគីកម្ពុជានិងថៃ ដែលឈានទៅដល់ការបិទព្រំដែនគោក ​ស្របពេលជាមួយស្មារតីជាតិនិយមរបស់ពលរដ្ឋកម្ពុជាបានផុសឡើង ដែលនាំឱ្យការប្រើប្រាស់ទំនិញថៃនៅកម្ពុជា មានការថយចុះជាងមុន បើទោះបីជាមានការ​ហាមឃាត់នាំចូលតែបន្លែផ្លែឈើ និងឧស្ម័ន ប្រេងឥន្ធនៈក៏ដោយ។

ជាមួយគ្នានេះអ្នកឧកញ៉ាក៏បានឱ្យដឹងដែរថា បច្ចុប្បន្ននេះ ទំនិញថៃក៏ពិបាកប្រកួតប្រជែងជាមួយទំនិញពីបណ្តាប្រទេសផ្សេងផងដែរ ព្រោះការដឹកជញ្ជូនតាមផ្លូវទឹក ឬការដឹកពង្វាងតាមច្រកប្រទេសផ្សេង បានបង្កើនថ្លៃដើម​​នៃទំនិញថៃ ខណៈកន្លងមក​ទំនិញនាំចូលពីថៃដែលមានតម្លៃសមរម្យ​ និងលឿន គឺតាមរយៈផ្លូវគោក។

ជាមួយគ្នានេះ លោក មៀវ សុខទ្រី ប្រធានសមាគមអ្នកផលិតចំណីអាហារកម្ពុជា លើកឡើងដែរថា បច្ចុប្បន្ននេះទំនិញដែលនាំចូលមកពីប្រទេសផ្សេងៗ ដូចជាចិន វៀតណាម ម៉ាឡេស៊ីជាដើម បានលប់លើទំនិញថៃ ដោយសារតម្លៃនៃដឹកជញ្ជូនមកពីថៃ មានតម្លៃថ្លៃ។

ចំណែកលោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់​ បានឱ្យដឹងដែរថា បន្ទាប់ពីថៃបានចូលឈ្លានពានកម្ពុជា ចាប់តាំងពីថ្ងៃទី២៤ កក្កដាមក ការបញ្ជាទិញ និងការដឹកជញ្ជូនទំនិញពីថៃបានធ្លាក់ចុះយ៉ាងគំហុក ពោលគឺធ្លាក់ចុះទាំងការដឹកជញ្ជូនតាមផ្លូវទឹក ផ្លូវអាកាស និងផ្លូវគោក។

យោងតាមរបាយការណ៍អគ្គនាយកដ្ឋាន និងរដ្ឋាករកម្ពុជា ក្នុងរយៈពេល៧ខែ ឆ្នាំ២០២៥នេះ ការធ្វើពាណិជ្ជកម្មរវាងកម្ពុជា និងថៃ មានតម្លៃ ២.៤ពាន់លានដុល្លារ ថយចុះ០.៦% បើធៀបនឹងរយៈពេលដូចគ្នា កាលពីឆ្នាំ២០២៤ ក្នុងនោះកម្ពុជានាំចេញទៅថៃ មានតម្លៃជាង៤៨៨លានដុល្លារ ខណៈថៃនាំចូលមកកម្ពុជា មានតម្លៃ ជិត២ពាន់លានដុល្លារ៕