(ភ្នំពេញ)៖ រាជរដ្ឋាភិបាលកម្ពុជា បានម្រេចដាក់ឱ្យអនុវត្តអត្រាពន្ធគយ០% ចំពោះមុខទំនិញដែលមានដើមកំណើតនៅសហរដ្ឋអាម៉េរិក ហើយនាំចូលមក​កម្ពុជា ​លើកលែងតែទំនិញដែលប្រើប្រាស់រួច។ យ៉ាងនេះក្តីក៏មានលក្ខខណ្ឌតម្រូវមួយចំនួនអ្នកនាំចូលត្រូវឈ្វេងយល់ ដើម្បី​ទទួលបានអត្រាពន្ធគយអនុគ្រោះ០% នេះ។

​​យោងតាម​ប្រកាស​របស់ក្រសួងសេដ្ឋកិច្ច និងហិរញ្ញវត្ថុ ស្តីពីការអនុវត្តអត្រាពន្ធគយលើទំនិញនាំចូលពីសហរដ្ឋអាម៉េរិក និងបទប្បញ្ញត្តិពាក់ព័ន្ធជាធរមាន អគ្គនាយកដ្ឋានគយ និងរដ្ឋាករកម្ពុជា ​បានបញ្ជាក់ថា ​ទំនិញដែលទទួលបានអត្រាពន្ធគយអនុគ្រោះ ០% លុះត្រាតែជាទំនិញថ្មី ដែលមិនត្រូវបានប្រើប្រាស់រួច។

អគ្គនាយកដ្ឋានគយបានបញ្ជាក់ថា ទំនិញប្រើរួច គឺសំដៅដល់ទំនិញដែលបានឆ្លងកាត់ការប្រើប្រាស់រួច ឬបានកាន់កាប់រួចដោយអ្នកប្រើប្រាស់ដែលមិនមែនជាអ្នកផលិត, អ្នកចែកចាយ, ឬអ្នកលក់បន្ត។

​ជាក់ស្តែងការនាំចូលរថយន្ត​មកពីអាមេរិក ដែលអាចស្នើសុំអត្រាពន្ធគយ ០%បាន ត្រូវគោរពលក្ខខណ្ឌដូច​ជា៖
* ផលិតនៅសហរដ្ឋអាម៉េរិក
* ជារថយន្តដែលមានឆ្នាំម៉ូដែល១ឆ្នាំមុនឆ្នាំបច្ចុប្បន្ន (N-1) ឬក្នុងឆ្នាំបច្ចុប្បន្ន (N) ឬ ១ឆ្នាំក្រោយឆ្នាំបច្ចុប្បន្ន (N+1) និងមានចម្ងាយប្រើប្រាស់មិនលើសពី ៥ ០០០គីឡូម៉ែត្រ ក្នុងកញ្ចក់ម៉ែត្ររថយន្ត (Odometer) និង
* ជារថយន្តដែលមានស្ថានភាពល្អក្នុងទម្រង់ដើម ដែលមិនបុក ប៉ះទង្គិច ខូចខាត រងការលិចទឹក ឬរងគ្រោះថ្នាក់ផ្សេងទៀត។

​ចំណែកការនាំចូលចក្រយានយន្ត ត្រីចក្រយានយន្ត និង ATV ត្រូវមានលក្ខខណ្ឌដូចខាងក្រោម៖

* ផលិតនៅ សហរដ្ឋអាម៉េរិកជាយានយន្តដែលមានឆ្នាំម៉ូដែល១ឆ្នាំមុនឆ្នាំបច្ចុប្បន្ន (N-1) ឬក្នុងឆ្នាំបច្ចុប្បន្ន (N) ឬ ១ឆ្នាំក្រោយឆ្នាំ បច្ចុប្បន្ន (N+1) និងមានចម្ងាយប្រើប្រាស់មិនលើសពី ២ ០០០ គីឡូម៉ែត្រ ក្នុងកញ្ចក់ម៉ែត្រយានយន្ត (Odometer) និង
* ជាយានយន្តដែលមានស្ថានភាពល្អក្នុងទម្រង់ដើម ដែលមិនបុក ប៉ះទង្គិច ខូចខាត រងការលិចទឹក ឬ រងគ្រោះថ្នាក់ផ្សេងទៀត​៕

​ចំណែកការការនាំចូលនូវមុខទំនិញហាមឃាត់ ឬទំនិញជាប់កម្រិតកំណត់ ត្រូវអនុវត្តតាមបញ្ញត្តិនៃអនុក្រឹត្យលេខ៣៧០ អនក្រ.បក ចុះថ្ងៃទី២៨ ខែធ្នូ ឆ្នាំ២០២៣ ស្តីពីការដាក់ឱ្យអនុវត្តបញ្ជីទំនិញហាមឃាត់ និងទំនិញជាប់កម្រិតកំណត់ និងបទប្បញ្ញត្តិពាក់ព័ន្ធជាធរមាន​៕