(ភ្នំពេញ)៖ ឧកញ៉ាឱសថបណ្ឌិត ហៃ លីអ៊ាង ប្រធានអគ្គនាយកសហគ្រាស​ PPM-Confirel បានមានប្រសាសន៍ថា ក្នុងចំណោមពលករខ្មែរ ដែលត្រឡប់មកពីប្រទេសថៃ មានមួយចំនួនអាចនឹង​មានជំនាញ ក្នុងការកែច្នៃ ឬផលិតផលិតផល សម្រាប់បំពេញតម្រូវការក្នុងស្រុក ហេតុដូច្នេះ Confirel បាននិងកំពុងរៀបចំផ្លូវដើម្បីឱ្យពួកគេមានលទ្ធភាព អាចផលិតបាន ហើយក្រុមហ៊ុននឹងប្រមូលទិញមកវិញ។

លោកបានពន្យល់ថា កន្លងមក កម្ពុជាមិនទាន់ហេដ្ឋារចនាសម្ព័ន្ធគ្រប់គ្រាន់ ក្នុងការទទួលពលករដែលមានជំនាញទាំងនោះក្នុងការចូលបម្រើការងារនោះទេ ​​ហេតុនេះប្រសិនបើគាត់ត្រឡប់មកវិញ ហើយចង់ផលិតនិងកែច្នៃអ្វីមួយ គឺជាឱកាសដ៏ល្អសម្រាប់កម្ពុជា ដូច្នេះហើយជំហានបន្ទាប់ ត្រូវធ្វើការអង្កេតថាពួកគាត់ចេះអ្វី ហើយធ្វើការនៅរោងចក្រណាខ្លះ និងត្រូវមានរៀបចំផ្លូវ ឬហេដ្ឋារចនាសម្ព័ន្ធ ដើម្បីជំរុញឱ្យអាចមានលទ្ធភាព ក្នុងការផលិតដោយខ្លួនឯង ហើយទៅទិញពីគាត់មកវិញ។

លោកមានប្រសាសន៍យ៉ាងដូច្នេះថា «មានកន្លែងខ្លះដែលយើងប្រគល់ឱ្យទៅគាត់ ឱ្យគាត់ធ្វើ ហើយយើងទៅទិញពីគាត់មកវិញ យើងមានទីផ្សារ យើងមានលទ្ធផលសម្រេច បើយើងធ្វើម្នាក់យើងធ្វើមិនអស់ទេ ហើយយើងធ្វើមិនបានច្រើនទេ អ៊ីចឹងយើងត្រូវបំបែក​ផលិតកម្មរបស់យើងមានទៅឱ្យអ្នកដែលគាត់ចេះ គាត់អាចជួយយើងបាន បានការផលិតរបស់យើងវាឡើង ហើយវានឹងច្បាស់លាស់»។

​ឧកញ៉ាឱសថបណ្ឌិត ហៃ លីអ៊ាង លើកឡើងបែបនេះ ធ្វើឡើងក្នុងកម្មវិធី FRESH BUSINESS​ ពិភាក្សាលើប្រធានបទ៖ «ឱកាសជំរុញផលិតកម្មរបស់ប្រទេសកម្ពុជា​»។ ​

សូមទស្សនាការលើកឡើងបន្ថែម របស់ ឧកញ៉ាឱសថបណ្ឌិត ហៃ លីអ៊ាង៖