(ភ្នំពេញ)៖ អ្នកជំនាញក្នុងវិស័យដឹកជញ្ជូនបានឱ្យដឹងថា ការដឹកជញ្ជូនទំនិញចេញចូលឆ្លងកាត់ព្រំដែនកម្ពុជា-វៀតណាម ដែលមានសភាពកកស្ទះខ្លាំងខុសពីធម្មតា កាលពីថ្ងៃទី១៥ សីហា ឆ្នាំ២០២៥ បន្ទាប់ពីអាជ្ញាធរគយវៀតណាម បានអនុវត្តបទប្បញ្ញត្តិថ្មី ត្រូវបានដោះស្រាយបណ្តោះអាសន្ន ដែលមកទល់ពេលនេះ ការដឹកជញ្ជូនទំនិញចេញចូលកម្ពុជា-វៀតណាម មានសភាពប្រក្រតីជាធម្មតា។

កាលពីថ្ងៃទី១៥ ខែសីហា ឆ្នាំ២០២៥ អាជ្ញាធរគយវៀតណាម បានចាប់ផ្តើមអនុវត្តបទប្បញ្ញត្តិថ្មី ដែលតម្រូវឱ្យក្រុមហ៊ុនដឹកជញ្ជូន ពីប្រទេសវៀតណាម ចូលមកកម្ពុជា ត្រូវមានលិខិតអនុញ្ញាត ឬអាជ្ញាបណ្ណដឹកជញ្ជូនអន្តរជាតិជាមុនសិន នោះទើបអាចដឹកទំនិញឆ្លងកាត់ចូលមកកាន់ប្រទេសកម្ពុជាបាន។ ការអនុវត្តបទប្បញ្ញត្តិថ្មីនេះ បានបង្កឱ្យមានកកស្ទះយ៉ាងខ្លាំងនៅច្រកព្រំដែនកម្ពុជា និងវៀតណាម។

លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជា បានប្រាប់បណ្តាញព័ត៌មាន Fresh News នៅថ្ងៃទី១៥ ខែសីហា ឆ្នាំ២០២៥នេះថា ដោយសង្កេតឃើញពីការកកស្ទះនេះ ភាគីវៀតណាមបានសម្របសម្រួល និងបានបន្ធូរបន្ថយបើកឱ្យមកជាធម្មតាសិន ចាប់ពីតាំងពីថ្ងៃទី១៥ សីហាម្សិលមិញមក។ ហើយមកទល់ពេលនេះ ស្ថានភាពនៃការដឹកជញ្ជូនទំនិញចេញចូល កម្ពុជា-វៀតណាម មានសភាពប្រក្រតីជាធម្មតា។

លោកបានឱ្យដឹងបន្ថែមថា «នៅថ្ងៃនេះ បន្ទាប់ពីឆែកនៅព្រំដែន គឺទំនិញមានការចូលមកធម្មតា អត់មានបញ្ហាអ្វីទេ ហើយខាងភាគីវៀតណាម នឹងផ្តល់ពេលវេលាបន្ថែមទៀត សម្រាប់ឱ្យខាងក្រុមហ៊ុនដែលមានឡានដឹកទំនិញមកកម្ពុជា ទៅធ្វើអាជ្ញាបណ្ណសម្រាប់ដឹកជញ្ជូនឆ្លងកាត់ព្រំដែន ដោយកន្លងមករថយន្តមួយចំនួនគេមានអាជ្ញាបណ្ណ ហើយមួយចំនួនមិនមានអាជ្ញាបណ្ណ អ៊ីចឹងនៅពេលខាងវៀតណាមរិតបន្តឹងទើបធ្វើឱ្យការកក់ស្ទះ»។

ថ្លែងប្រាប់បណ្តាញព័ត៌មាន Fresh News នៅថ្ងៃទី១៦ ខែសីហា ឆ្នាំ២០២៥នេះ ឧកញ៉ា ស៊ិន ចន្ធី អគ្គនាយកក្រុមហ៊ុនឡាញហល អិចប្រេសបានឱ្យដឹងដែរថា ការបន្ធូបន្ថយនេះ ឱ្យដឹកទំនិញចេញចូលជាធម្មតានេះ ដោះស្រាយមួយគ្រាប៉ុណ្ណោះ ពោលគឺមិនមានលិខិតជូនដំណឹងជាផ្លូវការណាមួយ ពីភាគីវៀតណាមនោះទេ។

លោកបានគូសបញ្ជាក់ថា ប្រសិនបើមានការរិតត្បិតលំហូរដឹកជូនទំនិញចេញចូលរវាងកម្ពុជា និងវៀតណាម នឹងបង្កការលំបាកខ្លះដល់កម្ពុជា ព្រោះតំបន់សេដ្ឋកិច្ចពិសេស នៅតាមបណ្តោយព្រំដែន ត្រូវការវត្ថុធាតុដើមនាំចូលពីក្រៅប្រទេស និងការនាំចេញទំនិញ ដែលធ្វើឡើងតាមច្រកវៀតណាមវិញ។ ការកកស្ទះនេះ ធ្វើឱ្យប៉ះពាល់ដល់រយៈពេលនៃការដឹកជញ្ជូន និងការបង្កើនការចំណាយលើការដឹកជញ្ជូនជាដើម។

លោកពន្យល់បន្ថែមថា «យើងមិនចង់ឱ្យមានការកក់ស្ទះដែរ យ៉ាងណាខាងវៀតណាមបើមានបញ្ញត្តិអីរបស់ខ្លួន សូមឱ្យគោរពទៅតាមការជូនដំណឹង ក៏ដូចជាច្បាប់របស់ប្រទេសយើង ដើម្បីឱ្យការផ្លាស់ប្តូរពាណិជ្ជកម្ម រវាងប្រទេសយើងទាំងពីរកុំឱ្យមានបញ្ហា ព្រោះវាជាតម្រូវការសម្រាប់ផ្គត់ផ្គង់ទៅដល់រោងចក្រ»។

បើតាមឧកញ៉ា ស៊ិន ចន្ធី ក្នុងក្របខណ្ឌទ្វេភាគីកម្ពុជា-វៀតណាម បានផ្តល់កូតាឱ្យរថយន្តដែលអាចឆ្លងកាត់ព្រំដែននៃប្រទេសទាំងពីរគឺ ចំនួន៥០០គ្រឿង ទៅនឹងមក គឺរថយន្តពីកម្ពុជាចំនួន៥០០គ្រឿង និងពីវៀតណាមមកវិញចំនួន៥០០គ្រឿង ប៉ុន្តែរាល់រថយន្តដែលអាចចេញចូល ត្រូវតែមានលិខិតអនុញ្ញាតពីប្រទេសរៀងៗខ្លួន។

ទំហំពាណិជ្ជកម្មរវាងកម្ពុជា និងវៀតណាម ដែលមានការកើតឡើងយ៉ាងខ្ពស់ ក្នុងពេលបច្ចុប្បន្ននេះ ក្នុងនោះត្រឹមតែរយៈពេល៧ ខែនៅឆ្នាំ២០២៥នេះ មានរហូតទៅដល់ប្រមាណ ៧ពាន់លានដុល្លារ ក្នុងនោះកម្ពុជា បាននាំទៅកាន់ប្រទេសវៀតណាមប្រមាណ ៣,៨ ពាន់លានដុល្លារ ហើយវៀតណាមនាំចូលមកកម្ពុជាគឺមានចំនួន៣,២ពាន់លានដុល្លារ៕