(ភ្នំពេញ)៖ អ្នកឧកញ៉ា លាង ម៉េង អគ្គនាយកធនាគារ ជីប ម៉ុង បានលើកឡើងថា ក្នុងការធ្វើជំនួញការគ្រប់គ្រងហិរញ្ញវត្ថុឱ្យបានច្បាស់លាស់ គឺពិតជាមានសារៈសំខាន់ ដែលសហគ្រិន ជាពិសេសម្ចាស់សហគ្រាសធុនតូច និងមធ្យម ត្រូវឈ្វេងយល់ឱ្យបានច្បាស់ ព្រោះវាផ្នែកមួយជួយឱ្យក្រុមហ៊ុនមាននិរន្តភាព។

លោកបានពន្យល់ថា លុយប្រៀបដូចជាស្តុក ប្រសិនបើមិនបានរាប់ ឬផ្ទៀងផ្ទាត់ឱ្យបានច្បាស់លាស់ទេនោះ នឹងប៉ះពាល់លំហូរចំណូល និងចំណាយដោយមិនដឹងមុខ នឹងអាចធ្វើឱ្យមានការខាតបង់។

លោកបានពន្យល់ថាបន្ថែមថា «សហគ្រិនយើងមួយចំនួនមិនយល់ពីការគ្រប់គ្រងសាច់ប្រាក់។ សាច់ប្រាក់ប្រចាំថ្ងៃចេញចូលយ៉ាងម៉េចខ្លះ ។ លុយប្រៀបដូចជាស្តុកមួយអីចឹង យើងយកទិញនេះ ទិញនោះ ហើយនៅពេលយើងគ្រប់គ្រងអត់ណែន មួយថ្ងៃបាត់តែមួយរយ បើយើងចំណេញមួយខែបាន២ពាន់ ខាតអស់មួយពាន់បាត់»។

ជាមួយគ្នានេះ លោកលើកទឹកចិត្តដល់អ្នកដែលចង់បង្កើតអាជីវកម្មថ្មី ហើយអាចឈរជើងបានយូរ ត្រូវធ្វើការសិក្សាឱ្យបានច្បាស់លាស់ថា មានទីផ្សារច្បាស់លាស់ ឬយ៉ាងណា? បើសិក្សាទៅឃើញថា អាជីវកម្មនោះធ្វើមិនបានយូរអង្វែង បានត្រឹមតែរយៈពេល១ ឬ៥ឆ្នាំ មិនគួរធ្វើនោះទេ ដូច្នេះហើយត្រូវមានការសិក្សាថាធ្វើទៅ អាចបង្កើតនិរន្តភាពបានដែរ ឬទេ?៕

សូមស្តាប់ការលើកឡើងបន្ថែមរបស់ អ្នកឧកញ៉ា លាង ម៉េង៖