(ភ្នំពេញ-បន្ទាយមានជ័យ)៖ ក្រុមការងារចម្រុះ ដើម្បីត្រួតពិនិត្យកាតព្វកិច្ចបិទតែមប្រិ៍អាករសម្រាប់បារី (ក្រុមការងារចម្រុះតែមប្រិ៍) របស់អគ្គនាយកដ្ឋានពន្ធដារ (អពដ) និងអគ្គនាយកដ្ឋាន គយ និងរដ្ឋាករកម្ពុជា (អគរ) នៅថ្ងៃទី១៣-១៤ ខែសីហា ឆ្នាំ២០២៥ ចុះត្រួតពិនិត្យអនុលោមភាព នៅតាមបណ្តាអាជីវកម្មដ្ឋាន ដែលសង្ស័យថា មានចែកចាយបារីខុសច្បាប់ ក្នុងភូមិសាស្រ្តរាជធានីភ្នំពេញ និងខេត្តបន្ទាយមានជ័យ។

ការចុះត្រួតពិនិត្យនេះ ដឹកនាំដោយលោក នូ ស៊ីថា ប្រធាននាយកដ្ឋានបង្ការនិង បង្ក្រាបបទល្មើសគយ នៃ អគរ និងជាអនុប្រធានអចិន្ត្រៃយ៍នៃក្រុមការងារចម្រុះតែមប្រិ៍ និងលោក ម៉ឹង សុខឡៅ អនុប្រធាន នាយកដ្ឋានគ្រប់គ្រងអ្នកជាប់ពន្ធធំ នៃ អពដ និងជាអនុប្រធានក្រុមការងារចម្រុះតែមប្រិ៍ ដោយមានការសម្របសម្រួលពីតំណាង អយ្យការអមសាលាដំបូង រាជធានីភ្នំពេញ និងខេត្តបន្ទាយមានជ័យ ព្រមទាំងកិច្ចសហការពីកងកម្លាំងមានសមត្ថកិច្ចចម្រុះ។

ក្នុងប្រតិបត្តិការខាងលើ ក្រុមការងារចម្រុះតែមប្រិ៍ បានធ្វើការបង្ក្រាបភ្លាមៗលើអាជីវកម្មដ្ឋាន ដែលមានស្តុក និងចែកចាយបារី ខុសច្បាប់ ដោយបានរៀបចំកំណត់ហេតុ ដកហូតបារី ខុសច្បាប់ទាំងនោះ ដើម្បីយកទៅរក្សាទុកជាបណ្តោះអាសន្ននៅមណ្ឌល ឃ្លាំងគយ របស់ អគរ ដើម្បីចាត់ការបន្តតាមនីតិវិធី ហើយដោយមានការយល់ព្រម និងផ្តិតស្នាមមេដៃ ប្រគល់ជូនពីម្ចាស់អាជីវកម្មដ្ឋានផងដែរ។

ជាមួយគ្នានេះ ក្រុមការងារចម្រុះតែមប្រិ៍ ក៏បានណែនាំឱ្យម្ចាស់អាជីវកម្មដ្ឋានទាំងបី ត្រូវបញ្ឈប់ការទិញ លក់ និងចែកចាយ បារី ដែលមិនមានបិទតែមប្រិ៍អាករត្រឹមត្រូវ និងត្រូវចូលរួមសហការ ជាមួយក្រុមការងារក្នុងការផ្តល់ព័ត៌មានអំពីក្រុមហ៊ុន ឬជនណា ដែលយកបារីខុសច្បាប់មកដាក់លក់ ឬចែកចាយ ដើម្បីក្រុមការងារចម្រុះតែមប្រិ៍ អាចចាត់វិធានការឱ្យមានប្រសិទ្ធភាព និងទាន់ពេលវេលាបើពុំនោះទេ ក្រុមការងារនឹងចាត់វិធានការតឹងរ៉ឹងស្របតាមច្បាប់ជាធរមាន៕