(ភ្នំពេញ)៖ លោក ប៊ូ ច័ន្ទភីរូ អគ្គនាយកនៃនិយ័តករធានារ៉ាប់រងកម្ពុជា នៅថ្ងៃទី១៩ ខែសីហា ឆ្នាំ២០២៥នេះ បានគូសបញ្ជាក់ថា ការធានារ៉ាប់រង គឺជាឧបករណ៍ហិរញ្ញវត្ថុដ៏មានឥទ្ធិពល ក្នុងការជំរុញដំណើរការសេដ្ឋកិច្ច ជួយសង្គមក្នុងការរក្សាសុវត្ថិភាពហិរញ្ញវត្ថុ និងជំរុញស្ថិរភាពហិរញ្ញវត្ថុរយៈពេលវែង។

ការគូសបញ្ជាក់បែបនេះ ធ្វើឡើងក្នុងឱកាសដែល លោក ប៊ូ ច័ន្ទភីរូ អញ្ជើញចូលរួម ក្នុងពិធីចុះអនុស្សរណៈនៃការយោគយល់គ្នា រវាងនិយ័តករធានារ៉ាប់រងកម្ពុជា និងសាកលវិទ្យាល័យជាតិមានជ័យ ដើម្បីពង្រឹងកិច្ចសហប្រតិបត្តិការ ក្នុងការលើកកម្ពស់ការយល់ដឹង និងការអភិវឌ្ឍធនធានមនុស្ស នៅក្នុងវិស័យធានារ៉ាប់រងនៅកម្ពុជា។

លោក ប៊ូ ច័ន្ទភីរូ បានបញ្ជាក់ថា «ខ្ញុំសូមជម្រាបថា ការធានារ៉ាប់រង គឺជាឧបករណ៍ហិរញ្ញវត្ថុដ៏មានឥទ្ធិពល ក្នុងការជំរុញដំណើរការសេដ្ឋកិច្ច ជួយសង្គមក្នុងការរក្សាសុវត្ថិភាពហិរញ្ញវត្ថុ និងជំរុញស្ថិរភាពហិរញ្ញវត្ថុរយៈពេលវែង។ ទីផ្សារធានារ៉ាប់រងនៅកម្ពុជា គឺជាទីផ្សារមួយ ដែលកំពុងមានការវិវត្ត ឆ្ពោះទៅមុខយ៉ាងឆាប់រហ័ស គួរឱ្យកត់សម្គាល់ពីមួយឆ្នាំទៅមួយឆ្នាំ»។

បើតាមអគ្គនាយកនិយ័តករធានារ៉ាប់រងកម្ពុជា, គិតត្រឹមឆ្នាំ២០២៤ ក្រុមហ៊ុន ធានារ៉ាប់រងចំនួន៤០ កំពុងធ្វើប្រតិបត្តិការអាជីវកម្មនៅកម្ពុជា ជាមួយនឹងទំហំបុព្វលាភដុល ប្រមាណ៣៥៧លានដុល្លារអាម៉េរិក និងទ្រព្យសកម្ម សរុបប្រមាណជាង១ប៊ីលានដុល្លារអាម៉េរិក។

យ៉ាងណាមិញ ក្នុងឆ្នាំ២០២៤ ទំហំទីផ្សារនេះ បានរួមចំណែកក្នុងសេដ្ឋកិច្ច តែប្រមាណ១.១៣% ប៉ុណ្ណោះ ដោយមនុស្សម្នាក់ប្រើប្រាស់សេវាធានារ៉ាប់រងប្រមាណតែ ២០.៦៥ ដុល្លារអាម៉េរិកតែប៉ុណ្ណោះ។ នេះជាការបញ្ជាក់បន្ថែម របស់លោក ប៊ូ ច័ន្ទភីរូ។

លោក ប៊ូ ច័ន្ទភីរូ បានលើកឡើងថា បើធៀបនឹងប្រទេសក្នុងតំបន់ និងលើសកលលោក ទំហំទីផ្សារធានារ៉ាប់រងកម្ពុជា នៅមានកម្រិតទាប ដែលបង្ហាញនូវសក្តានុពលធំធេង សម្រាប់ការអភិវឌ្ឍនាពេលខាងមុខ ក៏ដូចជារំលេចនូវចំណុចខ្វះខាត និងបញ្ហាប្រឈមមួយចំនួន រួមមាន៖

* កង្វះការយល់ដឹងរបស់សាធារណជន អំពីអត្ថប្រយោជន៍នៃការធានារ៉ាប់រង
* និងកង្វះមូលធនមនុស្ស ក្នុងវិស័យធានារ៉ាប់រង ដែលការណ៍នេះ ទាមទារឱ្យមានកិច្ចសហប្រតិបត្តិការ ជាមួយស្ថាប័នពាក់ព័ន្ធ ពិសេសគ្រឹះស្ថានឧត្តមសិក្សា។

ទន្ទឹមគ្នានេះ លោក ប៊ូ ច័ន្ទភីរូ បានឲ្យដឹងថា ក្នុងនាមជាអាណាព្យាបាល នៅក្នុងវិស័យធានារ៉ាប់រង និយ័តករធានារ៉ាប់រងកម្ពុជា បានរៀបចំនឹងដាក់ចេញនូវ ផែនការយុទ្ធសាស្ត្រ អភិវឌ្ឍន៍វិស័យធានារ៉ាប់រងកម្ពុជា ២០២១-២០៣០ ដើម្បីកំណត់ទិសដៅអភិវឌ្ឍន៍ទីផ្សារធានារ៉ាប់រងនៅកម្ពុជា។

ជាពិសេសដើម្បីធានាថា ប្រជាពលរដ្ឋ គ្រប់រូបនឹងទទួលបាន ការការពារហិរញ្ញវត្ថុ តាមរយៈការប្រើប្រាស់សេវាធានារ៉ាប់រង។ នេះជាការគូសបញ្ជាក់បន្ថែម របស់អគ្គនាយកនិយ័តករធានារ៉ាប់រងកម្ពុជា។

លោក ប៊ូ ច័ន្ទភីរូ បានឲ្យដឹងទៀតថា និយ័តករធានារ៉ាប់រងកម្ពុជា កំណត់អាទិភាព លើការលើកកម្ពស់អក្ខរកម្មធានារ៉ាប់រង តាមរយៈការបង្កើនការផ្សព្វផ្សាយអប់រំសាធារណជន អំពីអត្ថប្រយោជន៍នៃការធានារ៉ាប់រង និងការជំរុញការដាក់បញ្ចូលមុខវិជ្ជា «ធានារ៉ាប់រង» ក្នុងកម្មវិធីសិក្សាកម្រិតឧត្តមសិក្សា៕