(ភ្នំពេញ)៖ អ្នកឧកញ៉ា លាង ម៉េង ស្ថាបនិកក្រុមហ៊ុន ខ្មែរ ប៊ែរវើរីជីស បានលើកឡើងថា ដើម្បីធានាការគាំទ្រពីពលរដ្ឋខ្មែរ ឱ្យមានស្ថេរភាពយូរអង្វែរ សហគ្រាសធុនតូច និងមធ្យម ត្រូវពង្រឹងខ្លួនឯងជាមុនសិននេះ និងត្រូវធានាដល់ការផ្គត់ផ្គង់ឱ្យគ្រប់គ្រាន់តាមត្រូវតម្រូវការ។

លោកបានលើកឡើងថា ស្របពេលដែលពលរដ្ឋមានស្មារតីជាតិនិយម គាំទ្រផលិតផលខ្មែរ គឺជាឱកាសដ៏ល្អសម្រាប់សហគ្រាសក្នុងស្រុក ដូច្នេះត្រូវសង្កេតមើលពីអ្វីដែលមានការចន្លោះប្រហោង និងពង្រឹងការផលិតអ្វីដែលមានការខ្វះខាតឱ្យទាន់ពេល និងមានគុណភាព នោះនឹងធ្វើឱ្យប្រជាពលរដ្ឋខ្មែរបន្តគាំទ្ររហូត មិនមែនធ្វើឡើងតែមួយឆាវឡើយ។

លោកបន្ថែមថា ស្មារតី នឹងជួយឱ្យពលរដ្ឋខ្មែរដែលធ្លាប់តែគាំទ្រផលិតផលនាំចូល នឹងងាកមកសាកផលិតផលខ្មែរ ដូច្នេះហើយយើងត្រូវគ្រប់គ្រងការផលិត និងតម្លៃដើមឱ្យច្បាស់។

អ្នកឧកញ៉ា លាង ម៉េង លើកឡើងបែបនេះ ធ្វើឡើងក្នុងកម្មវិធី FRESH BUSINESS ពិភាក្សាលើប្រធានបទ៖ «យន្តការផលិតផលិតផលថ្មី ស្របពេលនិន្នាការគាំទ្រផលិតផលក្នុងស្រុកមានសន្ទុះខ្លាំង»។

សូមស្តាប់ការលើកឡើងបន្ថែមរបស់ អ្នកឧកញ៉ា លាង ម៉េង៖