(ភ្នំពេញ)៖ លោក ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា (ន.ម.ក) និងជាសហប្រធានកម្មវិធីអភិវឌ្ឍន៍ទីផ្សារមូលធនអាស៊ាន នៃវេទិកាទីផ្សារមូលធនអាស៊ាន (A-MDP) នៅថ្ងៃទី២១ ខែសីហា ឆ្នាំ២០២៥ បានដឹកនាំសហការីចូលរួមផ្តល់សុន្ទរកថាបើកសិក្ខាសាលាស្ដីពី «ការត្រួតពិនិត្យ និងការពង្រឹងការអនុវត្តច្បាប់ទ្រព្យឌីជីថលនៅអាស៊ាន» តាមប្រព័ន្ធអនឡាញ។

កម្មវិធីនេះត្រូវបានរៀបចំឡើងដោយ គណៈកម្មការមូលបត្ររដ្ឋវៀតណាម(SSC) ដែលជាសហប្រធាន A-MDP ក្រោមការគាំទ្ររបស់ធនាគារអភិវឌ្ឍន៍អាស៊ី (ADB) និងត្រូវបានរៀបចំឡើងជាទម្រង់កូនកាត់ នៅទីក្រុងហាណូយ ប្រទេសវៀតណាម ក្រោមអធិបតីភាពរបស់លោក ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃ ន.ម.ក., លោក Bui Hoang Hai អនុប្រធាននៃ SSC និង លោក Shantanu Chakraborty នាយក ADB ប្រចាំប្រទេសវៀតណាម។

សិក្ខាសាលានេះ ត្រូវបានរៀបចំឡើងក្នុងគោលបំណងផ្លាស់ប្ដូរចំណេះដឹង និងបទពិសោធន៍អំពីការអភិវឌ្ឍគោលនយោបាយ និងការអនុវត្តច្បាប់ពាក់ព័ន្ធនឹងការគ្រប់គ្រង ត្រួតពិនិត្យ និងការអភិវឌ្ឍទីផ្សារទ្រព្យឌីជីថល ក្នុងចំណោមសមាជិក ACMF (ASEAN Capital Market Forum ) ដែលជាកាលានុវត្តភាពដ៏សំខាន់មួយ ដើម្បីពិភាក្សាអំពីគម្លាតបទប្បញ្ញត្តិ និងយន្តការសម្រាប់កិច្ចសហប្រតិបត្តិការអន្តរស្ថាប័ន និងកិច្ចសហប្រតិបត្តិការឆ្លងដែន និងបានឆ្លុះបញ្ចាំងពីការប្តេជ្ញាចិត្តរួមគ្នារបស់សមាជិក ACMF ក្នុងការដោះស្រាយបញ្ហាប្រឈម និងការលើកកម្ពស់ការអភិវឌ្ឍទីផ្សារទ្រព្យឌីជីថលប្រកប ដោយចីរភាព ដែលជានិន្នាការរីកចម្រើនទាំងក្នុងតំបន់ និងសកលលោក។

ថ្លែងក្នុងសុន្ទរកថាបើកកម្មវិធីសិក្ខាសាលានេះតាមប្រព័ន្ធអនឡាញ លោក ស៊ូ សុជាតិ បានមានប្រសាសន៍ថា «ទ្រព្យឌីជីថលបាន និងកំពុងផ្លាស់ប្តូរទីផ្សារហិរញ្ញវត្ថុ និងបង្កើតឱកាសថ្មីៗសម្រាប់អាស៊ាន។ នេះគឺជាពេលវេលារបស់យើង ដើម្បីឈានទៅមុខរួមគ្នាជាមួយនឹងនវានុវត្តន៍ និងការទទួលខុសត្រូវ។ យើងត្រូវប្រាកដថាបច្ចេកវិទ្យាថ្មីនឹងមិនប៉ះពាល់ដល់ស្ថិរភាពទីផ្សារ ហើយក្របខ័ណ្ឌបទប្បញ្ញត្តិរបស់យើងអាចជួយគាំទ្រដល់កំណើនប្រកបដោយចីរភាព បរិយាបន្ន ភាពធន់ និងជវភាព។ តាមរយៈកិច្ចសហប្រតិបត្តិការដ៏ជិតស្និទ្ធ ការចែករំលែកបទពិសោធន៍ និងការបន្ស៊ីអភិក្រមនៃការធ្វើនិយ័តកម្ម យើងអាចបង្កើតទីផ្សារដែលទំនើប សុវត្ថិភាព និងគួរឱ្យទុកចិត្តសម្រាប់ការពារវិនិយោគិន និងពង្រឹងសេដ្ឋកិច្ចរបស់យើងឆ្ពោះទៅមុខក្នុងភាពជាតំបន់តែមួយ»។

សិក្ខាសាលានេះ ត្រូវបានរៀបចំឡើងចំនួន ២ថ្ងៃ ដែលបានប្រព្រឹត្តទៅចាប់ពីថ្ងៃទី២១ ដល់ថ្ងៃទី២២ ខែសីហា ឆ្នាំ២០២៥ ដែលក្នុងកម្មវិធីនេះ ន.ម.ក. ក៏បានចូលរួមចែករំលែកបទពិសោធន៍ស្ដីពី «បច្ចុប្បន្នភាពការត្រួតពិនិត្យទ្រព្យឌីជីថលក្នុងប្រទេសកម្ពុជា» ពាក់ព័ន្ធនឹងការត្រួតពិនិត្យទ្រព្យឌីជីថល តាមរយៈការប្រើប្រាស់បច្ចេកវិទ្យានៃបរិស្ថានសាកល្បង និងការអភិវឌ្ឍក្របខ័ណ្ឌបទប្បញ្ញត្តិទ្រព្យឌីជីថលក្នុងវិស័យមូលបត្រនៅកម្ពុជា។

ក្រោមក្របខ័ណ្ឌ A-MDP សមាជិកបានទទួលនូវអត្ថប្រយោជន៍ជាច្រើនតាមរយៈការជំរុញកិច្ចសហការ ការចែករំលែកចំណេះដឹង និងការកសាងសមត្ថភាពនៃកម្មវិធីនិយ័តករវ័យក្មេងក្នុងការអភិវឌ្ឍគោលនយោបាយប្រកប ដោយប្រសិទ្ធភាពសម្រាប់ទីផ្សារមូលបត្រអាស៊ាន ហើយទ្រព្យឌីជីថលជាឧបករណ៍ហិរញ្ញវត្ថុដ៏សំខាន់មួយ ដែលកំពុងផ្លាស់ប្តូរប្រព័ន្ធហិរញ្ញវត្ថុសកលតាមរយៈថូខិនីយកម្មមូលបត្រ ដោយផ្តល់នូវតម្លាភាព ប្រសិទ្ធភាព និងឱកាសរីកចម្រើនកាន់តែច្រើន។

ទ្រព្យឌីជីថលក្រោមទម្រង់មុខងារជាទ្រព្យវិនិយោគ គឺជាឧបករណ៍ហិរញ្ញវត្ថុ ដែលជាប្រភេទមួយនៃមូលបត្រ និងស្ថិតក្រោមការត្រួតពិនិត្យរបស់និយ័តករមូលបត្រ ក៏ប៉ុន្តែជួបប្រទះនូវបញ្ហាប្រឈមដូចជា៖ ភាពស្មុគស្មាញនៃបទប្បញ្ញត្តិ អនុលោមភាព និងភាពប្រែប្រួលដែលទាមទារឱ្យមានការឆ្លើយតបជាសមូហភាព និងការសម្របសម្រួលជាច្រើន។

ដើម្បីពង្រឹងការគ្រប់គ្រង និងការត្រួតពិនិត្យទ្រព្យឌីជីថលក្នុងអាស៊ាន ក្រោមក្របខ័ណ្ឌជាសហប្រធាន A-MDP កាលពីថ្ងៃទី១០ ខែធ្នូ ឆ្នាំ២០២៥ ន.ម.ក. បានរៀបចំសិក្ខាសាលាស្ដីពី «និន្នាការនៃការវិវត្តទ្រព្យឌីជីថល៖ ការអភិវឌ្ឍ និងការគ្រប់គ្រងទ្រព្យឌីជីថលក្នុងតំបន់» នៅរាជធានីភ្នំពេញ ព្រះរាជាណាចក្រកម្ពុជា។ បច្ចុប្បន្ន ACMF បាន និងកំពុងពិនិត្យលទ្ធភាពបង្កើតយន្តការពាក់ព័ន្ធនឹងការអនុវត្តបទប្បញ្ញត្តិ និងត្រួតពិនិត្យទ្រព្យ-ឌីជីថលក្នុងវិស័យមូលបត្រ នៅក្នុងតំបន់អាស៊ាន ហើយ ADB បានចូលរួមយ៉ាងសកម្មនៅក្នុងការគាំទ្រ ACMF ក្នុងការអភិវឌ្ឍ និងពង្រឹងការត្រួតពិនិត្យទ្រព្យឌីជីថល។

សិក្ខាសាលានេះ បានប្រព្រឹត្តទៅដោយរលូន និងប្រកបដោយផ្លែផ្កាខ្ពស់ ក្នុងស្មារតីកាត់បន្ថយគម្លាតរវាងប្រទេសអភិវឌ្ឍន៍ និងប្រទេសកំពុងអភិវឌ្ឍ ក្នុងការអភិវឌ្ឍទីផ្សារទ្រព្យឌីជីថល និងបច្ចេកវិទ្យាហិរញ្ញវត្ថុ ប្រកបដោយប្រសិទ្ធ និងចីរភាពនៅក្នុងតំបន់អាស៊ាន៕