(ភ្នំពេញ)៖ សមាគមពាណិជ្ជកម្ម និងវិនិយោគកម្ពុជា-ជប៉ុន (CJBI) នឹងរៀបចំសិក្ខាសាលាប្រចាំឆ្នាំ ដែលធ្វើឡើងក្រោមប្រធានបទ «ការយល់ដឹងអំពីវិស័យដឹកជញ្ជូន និងខ្សែសង្វាក់ផ្គត់ផ្គង់ប្រកបដោយនិរន្តរភាព» ដើម្បីជំរុញការធ្វើអាជីវកម្មឆ្លងប្រទេស និងការនាំចេញទំនិញកាន់តែប្រសើរឡើង។

សិក្ខាសាលានេះ នឹងរៀបចំឡើងនៅថ្ងៃទី១ ខែកញ្ញា ឆ្នាំ២០២៥ នៅមជ្ឈមណ្ឌលសហប្រតិបត្ដិការកម្ពុជា-ជប៉ុន (CJCC)។ គោលបំណងនៃកម្មវិធីនេះ គឺដើម្បីផ្តល់ជាវេទិកាមួយដែលអ្នកដឹកនាំអាជីវកម្ម អ្នកគ្រប់គ្រង និងអ្នកជំនាញអាចចែករំលែកករណីជាក់ស្តែង និងពិភាក្សាអំពីដំណោះស្រាយ អំពីវិស័យដឹកជញ្ជូន និងខ្សែសង្វាក់ផ្គត់ផ្គង់ឆ្លងប្រទេស។

លោក Masuda Chikahiro ទីប្រឹក្សាមជ្ឈមណ្ឌលសហប្រតិបត្ដិការកម្ពុជា-ជប៉ុន (CJCC) ដែលចាត់តាំងដោយទីភ្នាក់ងារសហប្រតិបត្តិការអន្តរជាតិជប៉ុន JICA បានឱ្យដឹងថា កម្មវិធីបណ្តាញធុរកិច្ច CJBI គឺជាព្រឹត្តិការណ៍ដែលបានរៀបចំឡើងជារៀងរាល់ឆ្នាំ ដោយបានជ្រើសរើសប្រធានបទដែលមានសារៈសំខាន់សម្រាប់អាជីវកម្មទាំងកម្ពុជា និងអន្តរជាតិ រួមទាំងជប៉ុនផងដែរ។ កម្មវិធីនេះគឺជាវេទិកាមួយដែលអ្នកចូលរួមអាចភ្ជាប់ទំនាក់ទំនងគ្នាទៅវិញទៅមក ផ្លាស់ប្តូរគំនិត និងស្វែងរកឱកាសថ្មីៗសម្រាប់ការសហការ។ កម្មវិធីនេះគឺ ត្រូវបានរៀបចំឡើងសម្រាប់អ្នកគ្រប់គ្នា ហើយវាមានប្រយោជន៍ជាពិសេសសម្រាប់ អ្នកដឹកនាំធុរកិច្ច និងនាយកប្រតិបត្តិដែលចង់ស្វែងយល់ពីបញ្ហាខ្សែសង្វាក់ផ្គត់ផ្គង់សកល និងតំបន់, អ្នកគ្រប់គ្រងផ្នែកដឹកជញ្ជូន នាំចូល និងនាំចេញ និងផ្នែកពាក់ព័ន្ធដែលត្រូវការការយល់ដឹងជាក់ស្តែងសម្រាប់ប្រតិបត្តិការប្រចាំថ្ងៃ និងអ្នកដែលមានចំណាប់អារម្មណ៍លើការធ្វើពាណិជ្ជកម្មឆ្លងប្រទេស ការអនុវត្តអាជីវកម្មប្រកបដោយនិរន្តរភាព ក៏ដូចជាការកសាងបណ្តាញភាពជាដៃគូរថ្មី។

លោកបន្តថា «ដូចដែលអ្នកបានដឹងហើយថា កត្តាអន្តរជាតិ និងក្នុងតំបន់កំពុងជះឥទ្ធិពលយ៉ាងសំខាន់លើខ្សែសង្វាក់ផ្គត់ផ្គង់ ដូចជាគោលនយោបាយពន្ធបន្ថែមដែលណែនាំដោយប្រធានាធិបតី Trump ចំពោះភាពចម្រុះនៃការធ្វើពាណិជ្ជកម្មនៃខ្សែសង្វាក់ផ្គត់ផ្គង់រួមទាំងប្រទេសចិន ក៏ដូចជាប្រទេសផ្សេងៗ និងបញ្ហាប្រឈមថ្មីៗដែលកំពុងកើតមានទាក់ទងនឹងវិស័យដឹកជញ្ជូន និងខ្សែសង្វាក់ផ្គត់ផ្គង់ ដែលក្រុមហ៊ុនត្រូវសម្របខ្លួនឱ្យបានឆាប់រហ័ស។ តាមរយៈកម្មវិធីនេះ អ្នកចូលរួមអាចស្វែងយល់អំពីនិន្នាការចុងក្រោយបំផុត និងអំពីរបៀបដែលក្រុមហ៊ុនត្រូវគ្រប់គ្រងហានិភ័យ ដើម្បីកសាងខ្សែសង្វាក់ផ្គត់ផ្គង់ប្រកបដោយនិរន្តរភាព»។

លោក ស៊ី វណ្ណា ប្រធានជាន់ខ្ពស់ផ្អែកអភិវឌ្ឍន៍ធនធានមនុស្សនៃ CJCC អំពាវនាវដល់អ្នកដែលប្រកបរបររកស៊ី ឬធ្វើពាណិជ្ជកម្មឆ្លងប្រទេស ដែលបានជួបបញ្ហា ឬមិនទាន់ជួបបញ្ហា ចូលរួមក្នុងវេទិកានេះ។ វាគិ្មនដែលមានបទពិសោធន៍ក្នុងវិស័យដឹកជញ្ជូន និងពាណិជ្ជកម្មឆ្លងដែន នឹងមកចែករំលែក និងពិភាក្សាស៊ីជម្រៅលើការដឹកជញ្ជូន ខ្សែច្រវ៉ាក់ផ្គត់ផ្គង់ ដំដោះស្រាយ និងយុទ្ធសាស្រ្តនានា ដើម្បីជំរុញឱ្យការធ្វើអាជីវកម្មឆ្លងប្រទេសកាន់តែប្រសើរឡើង។

លោកបន្ថែមថា «វេទិកាយើងនេះ គឺផ្តោតទៅលើការធ្វើពាណិជ្ជកម្មឆ្លងប្រទេស អ៊ីចឹង SME ដែលគាត់កំពុងតែប្រកបរបរ អាជីវកម្មពាក់ព័ន្ធនឹងការដឹកជញ្ជូន ខ្សែច្រវ៉ាក់ផ្គត់ផ្គង់ ឆ្លងព្រំដែន ឆ្លងប្រទេសនេះ ខ្ញុំគិតថាមានប្រយោជន៍សម្រាប់គាត់ ទី១.គាត់នឹងអាចយល់ដឹងអំពីបញ្ហាប្រឈមអ្វីខ្លះ ដែលវាគ្មិនរបស់យើងនឹងចែករំលែក ដូចជាថ្លៃដើមអាចនឹងកើនជាងមុន ការដឹកជញ្ជូនអាចនឹងពន្យាពេល ហើយថាតើគាត់ត្រូវដោះស្រាយបែបម៉េចប្រសិនបើពួកបញ្ហាហ្នឹង»។

ក្នុងសិក្ខាសាលា ស្តីពី ការយល់ដឹងអំពីវិស័យដឹកជញ្ជូន និងខ្សែសង្វាក់ផ្គត់ផ្គង់ប្រកបដោយនិរន្តរភាព នេះ ក៏នឹងមានការជួបជុំដើម្បីផ្តល់ឱកាសអ្នកចូលរួមអាចបង្កើតបណ្តាញទំនាក់ទំនងរវាងគ្នានឹងគ្នាផងដែរ ដែលនឹងក្លាយជាឱកាសដ៏មានតម្លៃក្នុងការជួបគ្នាមិនត្រឹមតែក្រុមហ៊ុនកម្ពុជា និងជប៉ុនប៉ុណ្ណោះទេ ប៉ុន្តែក៏មានអង្គការផ្សេងទៀតមកពីវិស័យផ្សេងៗ ដើម្បីកសាងទំនាក់ទំនងសម្រាប់កំណើនអាជីវកម្មនាពេលអនាគត៕