(ភ្នំពេញ)៖ តាមរយៈរបាយការណ៍លទ្ធផលនៃការអនុវត្តថវិកាឆមាសទី១ និងការវាយតម្លៃលើការអនុវត្តច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៥ ក្រសួងសេដ្ឋកិច្ច និងហិរញ្ញវត្ថុ បានព្យាករណ៍បន្ទាបកំណើនសេដ្ឋកិច្ចកម្ពុជា សម្រាប់ឆ្នាំ២០២៥ មកនៅត្រឹមតែ៥%ប៉ុណ្ណោះ។

នៅដើមឆ្នាំ មុនពេលការដាក់ពន្ធគយបដិកា និងការបិទខ្ទប់ព្រំដែនគោកកម្ពុជា-ថៃ សេដ្ឋកិច្ចកម្ពុជាត្រូវបានប៉ាន់ស្មានថានឹងមានកំណើន ក្នុងអត្រាប្រមាណ ៦,៣%។

ទោះជាយ៉ាងណាការព្យាការណ៍សេដ្ឋកិច្ចរបស់កម្ពុជាជាថ្មីនេះ ធ្វើឡើងក្នុងពេលវេលាដែលពន្ធបដិការបស់អាមេរិក មានអត្រា៣៦% តែពេលនេះ ពន្ធបដិកាបានធ្លាក់ចុះមកនៅត្រឹម ១៩% ហើយរបាយការណ៍នេះក៏ធ្វើឡើងមុនពេលកើតមាននៃការផ្ទុះអាវុធ តាមព្រំដែនជាមួយថៃផងដែរ ដូច្នេះឥទ្ធិពលទាំងនេះ អាចមានការប្រែប្រួលដល់កំណើនសេដ្ឋកិច្ច។

ក្រសួងសេដ្ឋកិច្ចបារម្ភថាពន្ធបដិកានឹងបង្អាក់កំណើនវិស័យសំខាន់ៗ ដែលគាំទ្រដល់សេដ្ឋកិច្ចកម្ពុជា ដូចជា ការនាំចេញផលិតផលកាត់ដេរ និងកម្មន្តសាល មិនមែនកាត់ដេរ (គ្រឿងសង្ហារិម, សំបកកង់ និងគ្រឿងបង្គំអេឡិចត្រូនិក) ទៅកាន់ទីផ្សារសហរដ្ឋអាមេរិក ដែលការណ៍នេះធ្វើឱ្យនិន្នាការកំណើននៃវិស័យទាំងពីរមានការថមថយជាងការរំពឹងទុក។

បើផ្អែកតាមការវាយតម្លៃ វិស័យឧស្សាហកម្ម ត្រូវបានវាយតម្លៃថានឹងមានកំណើនក្នុងរង្វង់ ៧.១% គឺថមថយជាងការរំពឹងទុកបន្តិច ដោយសារការថមថយចលនការនៃកំណើនអនុវិស័យកាត់ដេរ និងអនុវិស័យកម្មន្តសាលមិនមែនកាត់ដេរ ខណៈដែលអនុវិស័យសំណង់បន្តងើបវិញ ក្នុងល្បឿនយឺត។ អនុវិស័យកាត់ដេរ ត្រូវបានប៉ាន់ស្មានថាសម្រេចនូវកំណើនក្នុងរង្វង់ ១០.១% ទាបជាងការរំពឹងទុកបន្តិច ដោយសារការរំពឹងទុកបច្ច័យអវិជ្ជមាននៃការអនុវត្តពន្ធគយបដិកា មកលើការបញ្ជាទិញ និងការនាំចេញទៅ សហរដ្ឋអាម៉េរិកជាពិសេសក្នុងត្រីមាសទី៤ ឆ្នាំ ២០២៥ នេះ ប៉ុន្តែការនាំចេញទៅទីផ្សារផ្សេងទៀត ដូចជា សហភាពអឺរ៉ុប និងចិន ជាអាទិ៍ រំពឹងថានឹងនៅបន្តរក្សាបាននិន្នាការល្អ។

កំណើនជារួមនៃអនុវិស័យនេះ ត្រូវបានរុញច្រានដោយកំណើនល្អប្រសើរជាងការរំពឹងទុកនៃការនាំចេញផលិតផលកាត់ដេរក្នុងឆមាសទី១ ដោយសារការខិតពន្លឿនការនាំចេញ ក្នុងអំឡុងដែលពន្ធគយបដិការសហរដ្ឋអាមេរិក ត្រូវបានដាក់ឱ្យអនុវត្តបណ្តោះអាសន្ន (ក្នុងអត្រា ១០%) មុននឹងអត្រាផ្លូវការដាក់ឱ្យអនុវត្ត។

អនុវិស័យកម្មន្តសាលមិនមែនកាត់ដេរ ត្រូវបានប៉ាន់ស្មានថានឹងមានកំណើនថមថយជាងការរំពឹងទុក ក្នុងរង្វង់ ៦.៩% ដោយសារបញ្ហាព្រំដែនរវាងថៃ និងកម្ពុជានឹងអាចបន្ទុចបង្អាក់ដល់រំហូរនាំចូលនៃវត្ថុធាតុដើម និងការរំពឹងទុកផលប៉ះពាល់នៃការអនុវត្តគោលនយោបាយពន្ធគយបដិកា មកលើការនាំចេញពោលទៅសហរដ្ឋអាមេរិក។ យ៉ាងនេះក្តី បញ្ហាព្រំដែននឹងមិនជះឥទ្ធិពលខ្លាំងដល់ច្រវាក់ផលិតកម្មទាំងស្រុងឡើយ ដោយក្រុមហ៊ុន ភាគច្រើនបានបង្វែរការដឹកជញ្ជូនវត្ថុធាតុដើមរបស់ខ្លួនទៅតាមផ្លូវទឹក និងផ្លូវអាកាសជាដើម។

យោងតាមក្រសួងសេដ្ឋកិច្ច គិតត្រឹម៦ខែ ដើមឆ្នាំ២០២៥ ការនាំចេញផលិតផលកម្មន្តសាលមិនមែនកាត់ដេរ ដូចជា៖ គ្រឿងបង្គំអេឡិចត្រូនិក មានកំណើនក្នុងរង្វង់២៤.៣%, គ្រឿងសង្ហារិម ៣៩.៤%, គ្រឿងបន្លាស់យានយន្ត ១០.១%, កង់៤១.៦%, សំបកកង់រថយន្ត ៨០.៤%, និងខ្សែភ្លើង មានកំណើនល្អ ១៩៤.៩%។ ប៉ុន្តែការនាំចេញសូឡាក៏បន្តធ្លាក់ចុះ យ៉ាងគំហុក ក្នុងរង្វង់ -៩៨.៩% ដោយសារការដំឡើងពន្ធគយក្នុងអត្រាខ្ពស់ខ្លាំងរបស់សហរដ្ឋអាម៉េរិក៕ '