(ភ្នំពេញ)៖ របាយការណ៍លទ្ធផលនៃការអនុវត្តថវិកាឆមាសទី១ និងការវាយតម្លៃលើការអនុវត្តច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៥ របស់ក្រសួងសេដ្ឋកិច្ច និងហិរញ្ញវត្ថុ បានបញ្ជាក់ថា នៅឆមាសទី១ ឆ្នាំ២០២៥នេះ ចំណូលចរន្តថវិកាជាតិកម្ពុជា សម្រេចបានប្រមាណ ១៤ ៩៥៩ពាន់លានរៀល ស្មើនឹងប្រហែលជាង ៣ ៧០០លានដុល្លារអាមរិក ស្មើនឹង ៥៣.៧%នៃច្បាប់ថវិកា។

ចំណូលចរន្តថវិកាជាតិនេះ សម្រេចបានដោយសារចំណូលសារពើពន្ធ (ពន្ធគយ និងពន្ធដារ) ចំនួន ១៣ ១៣៤ពាន់លានរៀល ប្រហែល ៣ ២៧០លានដុល្លារ ស្មើនឹង ៥៤.៣% នៃច្បាប់ថវិកា និងចំណូលមិនមែនសារពើពន្ធ ១ ៨២៤ពាន់លានរៀល ប្រហែល ៤៥០លានដុល្លារ ស្មើនឹង៤៩.៧% នៃច្បាប់ថវិកា។

បើតាមក្រសួងសេដ្ឋកិច្ច ចំណូលសារពើពន្ធ ក្នុងឆ្នាំ២០២៥នេះ គឺអនុវត្តបានខ្ពស់ជាងឆ្នាំ២០២៤ ធៀបនឹងរយៈពេល៦ខែ ដើមឆ្នាំដូចគ្នា ដោយសារទីផ្សារយានយន្តបានងើបវិញ និងអាករលើការនាំចេញខ្សាច់ បន្តមានសកម្មភាពល្អ។

ទោះជាយ៉ាងនេះក្តី, តាមការប៉ាន់ស្មានរហូតដល់ដំណាច់ឆ្នាំ២០២៥ ចំណូលសារពើពន្ធ និងចំណូលមិនមែនសារពើពន្ធ អាចនឹងសម្រេចបានត្រឹម ៩៧.៤% នៃច្បាប់ហិរញ្ញវត្ថុ ឆ្នាំ២០២៥ ពោលគឺទាបជាងច្បាប់ចំនួន ២.៦%។

ក្រសួងសេដ្ឋកិច្ចបញ្ជាក់ថា «តាមការវាយតម្លៃនេះ, ចំណូលចរន្តនឹងសម្រេចបានទាបជាងផែនការ ១៧៩លានដុល្លារ ដោយសារចំណូលពន្ធដារ អាចសម្រេចបានទាបជាងផែនការ ៤៦៧ លានដុល្លារ និងចំណូលគយអាចខ្ពស់ជាងផែនការ ២៨៧ លានដុល្លារ និងចំណូលមិនមែនសារពើពន្ធនឹងសម្រេចខ្ពស់ជាងផែនការប្រមាណ ១លានដុល្លារ»។

បើតាមក្រសួងសេដ្ឋកិច្ច នៅឆមាសទី១នេះ ចំណូលថវិកាជាតិសរុបឆ្លងកាត់អគ្គនាយកដ្ឋានរតនាគារជាតិ មានទឹកប្រាក់ ១៥ ២០០ពាន់លានរៀល ​ប្រហែល ៣៧៩០ លានដុល្លារអាមេរិក៕