(ភ្នំពេញ)៖ របាយការណ៍របស់ក្រសួងសេដ្ឋកិច្ច និងហិរញ្ញវត្ថុស្ដីពី លទ្ធផលនៃការអនុវត្តថវិកាឆមាសទី១ ​និងការវាយតម្លៃលើការអនុវត្តច្បាប់ ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២៥ បានបញ្ជាក់ឱ្យដឹងថា នៅឆមាសទី១ ឆ្នាំ២០២៥នេះ កម្ពុជាបានដកសាច់ប្រាក់យកមកប្រើប្រាស់ ក្នុងគម្រោងកម្មវិធីអភិវឌ្ឍន៍ ក្នុងក្របខណ្ឌនៃកិច្ចព្រមព្រៀង ឥណទានសម្បទាន និងកិច្ចព្រមព្រៀងហិរញ្ញប្បទានឥតសំណង សម្រេចបានសរុប ៤៤៥.០៧ លានដុល្លារ ឬសមមូលនឹង ១៧៩៣.២៦ ប៊ីលានរៀល គឺស្មើនឹងប្រមាណ ២៦.១% នៃច្បាប់ហិរញ្ញវត្ថុឆ្នាំ២០២៥។

ទឹកប្រាក់ចំនួន ៤៤៥.០៧ លានដុល្លារ ដែលដកយកមកប្រើប្រាស់នេះ ក្នុងនោះឥណទានសម្បទានសម្រេចបានចំនួន ៤០៨.៩៨ លានដុល្លារ និងហិរញ្ញប្បទានឥតសំណង សម្រេចបានចំនួន ៣៦.០៨លានដុល្លារ។ ទឹកប្រាក់នេះនៅមិនទាន់បញ្ចូលនៅឡើយ នូវហិរញ្ញប្បទានឥតសំណងមួយចំនួនទៀត ដែលត្រូវបានផ្តល់ទៅដល់គោលដៅអនុវត្តផ្ទាល់ ដោយដៃគូអភិវឌ្ឍន៍តែម្តង ដោយមិនឆ្លងតាមបរិបថក្រសួងសេដ្ឋកិច្ច និងហិរញ្ញវត្ថុ។

ក្រសួងសេដ្ឋកិច្ចបញ្ជាក់ថា ក្នុងឆមាសទី១ ឆ្នាំ ២០២៥ រាជរដ្ឋាភិបាលបានចុះកិច្ចព្រមព្រៀងហិរញ្ញប្បទានឥតសំណង និងឥណទានសម្បទាន មានទឹកប្រាក់សរុបចំនួនប្រមាណ ២៦៦.២២ លានដុល្លារ សម្រាប់អនុវត្ត១០គម្រោងកម្មវិធីអភិវឌ្ឍន៍។

ហិរញ្ញប្បទានឥតសំណងចំនួន៧គម្រោង/កម្មវិធី មានទឹកប្រាក់សរុបចំនួនប្រមាណ ៦៩.៧៤ លាន ដុល្លារអាម៉េរិក។ ទឹកប្រាក់នេះ មិនរាប់បញ្ចូលទឹកប្រាក់ហិរញ្ញប្បទាន ដែលដៃគូអភិវឌ្ឍន៍បានផ្តល់ទៅដល់ បណ្តាគោលដៅអនុវត្តដោយផ្ទាល់ ដោយមិនឆ្លងកាត់រាជរដ្ឋាភិបាលទេ។ ចំណែកឥណទានសម្បទានចំនួន ៣គម្រោង/កម្មវិធី មានទឹកប្រាក់សរុបចំនួនប្រមាណ ១៩៦.៤៨ លានដុល្លារ។

សូមជម្រាបថា គិតត្រឹមត្រីមាសទី១ ឆ្នាំ២០២៥ កម្ពុជាមានបំណុលសាធារណៈសរុបចំនួន ១២.១៨ ប៊ីលានដុល្លារអាម៉េរិក ក្នុងនោះ ៩៩% ត្រូវនឹង១២.០៦ ប៊ីលានដុល្លារអាម៉េរិក ជាបំណុលសាធារណៈក្រៅប្រទេស និង១% ជាបំណុលក្នុងប្រទេស។

ការគ្រប់គ្រងបំណុលសាធារណៈរបស់កម្ពុជា នៅតែគ្មានហានិភ័យ ដោយរាជរដ្ឋាភិបាលប្រកាន់ខ្ជាប់ នូវគោលការណ៍គន្លឹះចំនួន ៥ រួមមាន៖ ១. ខ្ចីឥណទាន ក្នុងទំហំសមស្រប ដែលស្ថានភាពថវិកា និងសេដ្ឋកិច្ចអាចទ្រាំទ្របាន, ២. ខ្ចីតែឥណទានដែលមានកម្រិតសម្បទាន ឬលក្ខខណ្ឌ អនុគ្រោះខ្ពស់, ៣. ខ្ចីសម្រាប់តែវិស័យអាទិភាពទ្រទ្រង់ចីរភាពនៃកំណើនសេដ្ឋកិច្ច និងវិស័យបង្កើនផលិតភាពសេដ្ឋកិច្ច ឬផលិតភាព ផលិតកម្ម, ៤. ប្រើប្រាស់ឥណទានប្រកបដោយតម្លាភាព, គណនេយ្យភាព, ប្រសិទ្ធភាព, និងស័ក្តិសិទ្ធិភាពខ្ពស់បំផុត, និង ៥. ប្រើប្រាស់ ឥណទានសម្រាប់ហិរញ្ញប្បទាន គម្រោងវិនិយោគលើហេដ្ឋារចនាសម្ព័ន្ធសាធារណៈ ដែលមានស្តង់ដារ និងគុណភាពខ្ពស់ ស្របតាម គោលការណ៍នៃការគ្រប់គ្រងការវិនិយោគសាធារណៈ ព្រមទាំងឆ្លើយតបទៅនឹងតម្រូវការនៃការអភិវឌ្ឍជាតិ នៅក្នុងដំណាក់កាលថ្មី ពិសេសធានាបាននូវចីរភាពសេដ្ឋកិច្ច, សង្គម, បរិស្ថាន, និងភាពធន់ទៅនឹងការប្រែប្រួលអាកាសធាតុ៕