(ភ្នំពេញ)៖ ក្នុងឆមាសទី១ ឆ្នាំ២០២៥ ការប្រមូលចំណូលពីកាតព្វកិច្ចល្បែងកាស៊ីណូ និងចំណូលពីកាតព្វកិច្ចល្បែងផ្សងសំណាង​ បានចំនួនជាង ១៥៦ ពាន់លានរៀល ឬស្មើនឹងប្រមាណជិត ៤០លានដុល្លារ កើនឡើង៥៥.២% ធៀបនឹងរយៈពេលដូចគ្នាក្នុងឆ្នាំ២០២៤។ នេះបើយោងតាមរបាយការណ៍ ស្តីពីលទ្ធផលនៃការអនុវត្តថវិកាឆមាសទី១ និងការវាយតម្លៃលើការអនុវត្តច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៥។

ក្រសួងសេដ្ឋកិច្ចបានបញ្ជាក់ថា ការប្រមូលចំណូលបានក្នុងទំហំជិត៤០លានដុល្លារនេះ គឺស្មើនឹង ៧១,៩% នៃច្បាប់ហិរញ្ញវត្ថុ​ ​បើធៀបនឹងរយៈពេលដូចគ្នាក្នុងឆ្នាំ២០២៤ ​អនុវត្តបាន ៥៦,២% នៃច្បាប់ហិរញ្ញវត្ថុ​ ប៉ុណ្ណោះ។ ​

​ការកើនឡើងនៃការប្រមូលចំណូលក្នុងឆមាសទី ១ ឆ្នាំ២០២៥នេះ ដោយសារតែកាស៊ីណូណាហ្គាវើលដ៍ ខំផ្លិកស៍ បានបង់បំណុល និងកាស៊ីណូមួយចំនួនបានបង់បន្ថែមនូវចំណូលកាតព្វកិច្ចពីល្បែងដែលបានបង់ខ្វះ តាមរយៈការធ្វើសវនកម្មប្រចាំឆ្នាំ។​ ​

ថ្លែងប្រាប់បណ្តាញព័ត៌មាន Fresh News នៅថ្ងៃទី២៥ ខែសីហានេះ លោក​ រស់ ភីរុណ អគ្គលេខាធិការគណៈកម្មការគ្រប់គ្រងល្បែងពាណិជ្ជកម្មកម្ពុជា​ បានមានប្រសាសន៍ថា​ ក្នុងឆ្នាំ២០២៥នេះ ចំណូលពីវិស័យល្បែងពាណិជ្ជកម្មនៅតែអាចគ្រប់គ្រងបាន​ និងមានកំណើនល្អប្រសើរ។

យ៉ាងនេះក្តី តាមការប៉ាន់ស្មានរបស់ក្រសួងសេដ្ឋកិច្ច រហូតដល់ដំណាច់ឆ្នាំ ២០២៥ ចំណូលពីកាតព្វកិច្ចល្បែងកាស៊ីណូ និងចំណូលពីកាតព្វកិច្ច ល្បែងផ្សងសំណាង អាចសម្រេចបានប្រមាណ ៩៨.៩% នៃច្បាប់ហិរញ្ញវត្ថុឆ្នាំ២០២៥ ដោយសារក្រុមហ៊ុន ផ្សងសំណាងមួយចំនួនបានព្យួរអាជ្ញាបណ្ណ​៕