(ភ្នំពេញ)៖ ឧកញ៉ា សុង សារ៉ន ប្រធានក្រុមប្រឹក្សាភិបាលសហព័ន្ធស្រូវអង្ករកម្ពុជា នៅថ្ងៃទី២៦ ខែសីហា ឆ្នាំ២០២៥នេះ បានអំពាវនាវដល់សមាជិក សហព័ន្ធស្រូវអង្ករកម្ពុជា​ទាំងអស់ រួមគ្នាជាផ្លុងមួយ ពង្រីកវិសាលភាពស្រូវ ដើម្បីចំណេញដល់កសិករកម្ពុជា ខណៈរយៈពេល៣៦ខែនៃអាណត្តិទី៤ សហព័ន្ធស្រូវអង្ករកម្ពុជា នាំចេញអង្ករសរុប ចំនួន ១ ៧២៨ ៤១៧តោន ដែលគិតជាទឹកប្រាក់ចំនួន ១ ២៦៧.៤០លានដុល្លារអាម៉េរិក។

ការអំពាវនាវបែបនេះ ធ្វើឡើងក្នុងឱកាសដែល ឧកញ៉ា​ សុង​ សារ៉ន អញ្ជើញចូលរួម ក្នុងពិធីសម្ពោធដាក់ឱ្យប្រើប្រាស់ផ្លូវការ នៃ «យុទ្ធសាស្រ្តពង្រីក និងពិពិធកម្មទីផ្សារនាំចេញអង្ករកម្ពុជា ២០២៥-២០៣០» និង «កម្មវិធីមហាសន្និបាត សហព័ន្ធស្រូវអង្ករកម្ពុជា អាណត្តិទី៤ និងការបោះឆ្នោតជ្រើសរើសប្រធានសហព័ន្ធ ប្រធាន និងសមាជិកក្រុមប្រឹក្សាភិបាល នៃសហព័ន្ធស្រូវអង្ករកម្ពុជា (ស.អ.ក) អាណត្តិទី៥»។

ឧកញ៉ា សុង សារ៉ន បានបញ្ជាក់យ៉ាងដូច្នេះថា «រយៈពេល៣ឆ្នាំមកនេះ មានការរីកចម្រើន ជាពិសេសលើប្រភេទស្រូវ ដែលយើងកំពុងតែផ្ដោត គឺស្រូវសែនក្រអូប ស្រង៉ែ និងប្រភេទស្រូវផ្កាលំដួល [...] ខ្ញុំសូមអំពាវនាវឲ្យបងប្អូនរួមគ្នាជាផ្លុងមួយ ដើម្បីទប់សភាពការណ៍ស្រូវរបស់យើង សូមពង្រីកវិសាលភាពស្រូវអង្កររបស់យើង បើសិនជាតម្លៃ៧០០រៀលជាង កសិករនៅតែមានលទ្ធភាពចំណេញ»។

បើតាមឧកញ៉ា សុង សារ៉ន, នៅពេលបច្ចុប្បន្ន សហព័ន្ធស្រូវអង្ករកម្ពុជា មានសមាជិកសកម្មចំនួន២៨៩ ដែលក្នុងនោះ រោងម៉ាស៊ីនកិនស្រូវ និងក្រុមហ៊ុននាំចេញអង្ករ មានចំនួន៨០ ដែលជារោងម៉ាស៊ីនកិនស្រូវ មានសមត្ថភាពសម្ងួតស្រូវ ប្រមាណជា ៥០ ០០០ តោនក្នុងមួយថ្ងៃ ការកិនកែច្នៃបានចំនួន ១ ២០០តោន ក្នុងមួយម៉ោង មានលទ្ធភាពផ្គត់ផ្គង់អង្ករ តាមបទដ្ឋានស្តង់ដារចំណីអាហារអន្តរជាតិ ចំនួនប្រមាណជា ៣ លានតោនអង្ករ សម្រាប់ប្រតិបត្តិការម៉ាស៊ីនកិនស្រូវ ១០ម៉ោងក្នុងមួយថ្ងៃ។

ឧកញ៉ា សុង សារ៉ន បានបញ្ជាក់ថា​ បរិមាណនេះ គឺមិនរាប់បញ្ជូលម៉ាស៊ីនកិនស្រូវ ខ្នាតតូចតាមភូមិ ប្រមាណជាជាង១០ម៉ឺន មូលដ្ឋានផ្សេងទៀត ដែលមានតួនាទីសម្រាប់ផ្គត់ផ្គង់ ក្នុងមូលដ្ឋានរបស់ខ្លួន។

ឧកញ៉ា សុង សារ៉ន បានលើកឡើងថា អាណត្តិទី៤ នៃសហព័ន្ធស្រូវអង្ករកម្ពុជា ដែលមានសុពលភាពចាប់ពីថ្ងៃទី២៣ ខែវិច្ឆិកា ឆ្នាំ២០២២ មកសហព័ន្ធស្រូវអង្ករកម្ពុជា បានរៀបចំនូវផែនការ យុទ្ធសាស្ត្រសម្រាប់អនុវត្តន៍ ដោយសម្រេចបាននូវលទ្ធផលការងារយ៉ាងល្អជាច្រើន ជាពិសេសលើការជំរុញការនាំចេញអង្ករ និងការថែរក្សាស្ថិរភាពតម្លៃស្រូវ ដែលកសិករអាចមានជម្រើសក្នុងការលក់ក្នុងស្រុក និងការនាំចេញស្រូវទៅកាន់ទីផ្សារប្រទេសជិតខាងផងដែរ។

ឧកញ៉ា សុង សារ៉ន បានឲ្យដឹងថា រយៈពេល ៣៦ខែ នៃអាណត្តិទី៤ សហព័ន្ធស្រូវអង្ករកម្ពុជា ដែលមានសមាជិកអ្នកនាំចេញ និងរោងម៉ាស៊ីនកិនស្រូវខ្នាតមធ្យម និងខ្នាតធំ ជាគោលបាននាំចេញអង្ករសរុប ចំនួន ១ ៧២៨ ៤១៧ តោន ដែលគិតជាទឹកប្រាក់ចំនួន ១ ២៦៧.៤០លានដុល្លារអាម៉េរិក តាមរយៈក្រុមហ៊ុននាំចេញអង្ករចំនួន៦៣ ទៅកាន់គោលដៅចំនួន ៦៨ និងទៅកាន់បណ្តាប្រទេសនៅក្នុងសហគមន៍អឺរ៉ុបចំនួន ២៦ប្រទេស បានបរិមាណអង្ករចំនួន ៧៩២ ៦១១ តោន ដែលគិតជាទឹកប្រាក់ចំនួន ៦០១.១០ លានដុល្លារអាម៉េរិក ទៅកាន់ប្រទេសចិន រួមទាំងហុងកុង និងម៉ាកាវ ចំនួន ៤៣៦ ៣០២ តោន គិតជាទឹកប្រាក់ចំនួន ២៧៥.៧៩ លានដុល្លារអាម៉េរិក ទៅកាន់ប្រទេសក្នុងអាស៊ាន រួមទាំងទីម័រខាងកើត ចំនួន ៧ប្រទេសបានបរិមាណ ចំនួន ២៧៧ ៦២៨ តោន គិតជាទឹកប្រាក់ចំនួន ១៩៤.៨៤លានដុល្លារអាម៉េរិក និងទៅកាន់គោលដៅ ៣២ ប្រទេសផ្សេងទៀតមាន អាហ្វ្រិក មជ្ឈឹមបូព៌ា អាមេរិក កាណាដា អូស្ត្រាលី ញ៉ូហ្សេឡេន ។ល។ បានចំនួន ២២១ ៨៧៣ តោន គិតជាទឹកប្រាក់ចំនួន ១៩៥,៦៧ លានដុល្លារអាម៉េរិក និងបាននាំចេញស្រូវ ទៅកាន់ប្រទេសវៀតណាមចំនួន៖ ១៣ ៤៤០ ៥៩៦ តោន ដែលគិតជាទឹកប្រាក់បានចំនួន ៣ ៧៣០.២១ លានដុល្លារអាម៉េរិក។

ក្រៅពីនេះ ឧកញ៉ា សុង សារ៉ន បានគូសបញ្ជាក់ថា សហព័ន្ធស្រូវអង្ករកម្ពុជា នូវមានវឌ្ឈនភាពការងារមួយចំនួនទៀត ដែលកើតឡើងដោយកិច្ចខិតខំជំរុញក្នុងការបើកទីផ្សាររបស់ លោកជំទាវរដ្ឋមន្ត្រី និងថ្នាក់ដឹកនាំក្រសួងពាណិជ្ជកម្ម ដូចជាទីផ្សារប្រទេសហ្វីលីពីន ឥណ្ឌូនេស៊ី ទីម័រខាងកើត សហរដ្ឋអាម៉េរិក និងអូស្ត្រាលី -ល- ទន្ទឹមជាមួយគ្នានេះ កិច្ចការយ៉ាងច្រើន បានសម្រេចបានជាមួយ លោករដ្ឋមន្ត្រី និងថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ លើការជំរុញផលិតកម្មស្រូវ ការអភិវឌ្ឍពូជ និងការបង្កើតទីផ្សារជាក់លាក់ សម្រាប់ប្រជាកសិករ តាមរយៈកិច្ចសន្យាកសិកម្ម រោងម៉ាស៊ីនកិនស្រូវ សហគមន៍កសិកម្ម និងសហគមន៍កសិកម្មទំនើប៕