(ភ្នំពេញ)៖ លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជា បានបញ្ជាក់ពីស្ថានភាពស្រូវអង្ករ និងមូលហេតុការធ្លាក់ចុះនៃតម្លៃស្រូវ អង្ករ នាពេលបច្ចុប្បន្ននេះ ដោយសារកំណើននៃផលិតកម្មក្នុងការដាំដុះស្រូវ របស់ប្រទេស ដែលធ្លាប់តែនាំចូលស្រូវអង្ករ មានការកើនឡើងគួរឱ្យគត់សម្គាល់, ទោះយ៉ាងណាសហព័ន្ធស្រូវអង្ករកម្ពុជា បានដាក់គោលដៅបង្កើនការនាំចេញស្រូវ អង្ករពី ៣ទៅ ៥ភាគរយ ក្នុងឆ្នាំ២០២៥នេះ។

លើកឡើងក្នុងពិធីសម្ពោធយុទ្ធសាស្ត្រពង្រីក និងពិពិធកម្មទីផ្សារនាំចេញអង្ករកម្ពុជា នាព្រឹកថ្ងៃទី២៦ ខែសីហា ឆ្នាំ២០២៥នេះ លោក លន់ យ៉េង បានឱ្យដឹងថា ការនាំចេញអង្ករក្នុងរយៈពេល ៨ខែនេះ មានការនាំចេញបានល្អប្រសើរ ដែលមានកំណើរប្រមាណជិត ១២ភាគរយ ដែលបាននាំចេញប្រមាណ ៤២ម៉ឺនតោន ជាមួយគ្នានោះការនាំចេញស្រូវ ក៏មានកំណើនគួរឱ្យគត់សម្គាល់ផងដែរ ដែលមានកំណើនប្រមាណជាង ២០ភាគរយ ដែលគិតមកដល់ពេលនេះការនាំចេញបានប្រមាណជិត ៥លានតោនស្រូវ ក្នុងរយៈពេល ៨ខែមកនេះ។

លោក លន់ យ៉េង បានបន្ថែមទៀតថា ស្របជាមួយនឹងការកំណើននៃការនាំចេញនេះ យើងក៏សង្គេតឃើញដែរពីការធ្លាក់ចុះនៃតម្លៃស្រូវ អង្ករ នៅក្នុងប្រទេសកម្ពុជា ក៏ដូចជាការធ្លាក់ចុះនៃតម្លៃស្រូវអង្ករ នៅក្នុងទីផ្សារពិភពលោកផងដែរ ដែលមូលហេតុនៃការធ្លាក់ចុះនេះ ដោយសារកំណើននៃផលិតកម្មកម្មនៃ​ប្រទេសមួយចំនួន ដែលធ្លាប់ជាប្រទេសនាំចូល ដូចជាហ្វីលីពីន ឥណ្ឌូនេស៊ី ជាដើមនោះ ឆ្នាំនេះបែរជាមានការដាំដុះកើនឡើង ដែលធ្វើឱ្យបរិមាណស្រូវមានការកើនឡើងផងដែរ។

លោក លន់ យ៉េង បានបន្ថែមថា នាពេលចុងក្រោយនេះ ដោយសារការដាំដុះមានការកើនឡើង និងមានសំពាធទីផ្សារតម្លៃមួយចំនួនផងនោះ បានធ្វើឱ្យប្រទេសហ្វីលីពីន ផ្អាកការនាំចូលអង្ករចំនួន ៦០ថ្ងៃ ខណៈដែលប្រទេសហ្វីលីពីន គឺជាប្រទេសនាំចូលអង្ករដ៏ធំមួយក្នុងពិភពលោក ដែលបាននាំចូលប្រមាណ ៤លានតោន ដែលអង្ករភាគច្រើន គឺចេញពីអាស៊ីទៅ ដែលមានអង្ករពី កម្ពុជា ថៃ វៀតណាម និងប្រទេសមួយចំនួនទៀតផងដែរ។

ជាមួយគ្នានោះលោក លន់ យ៉េង បានបន្ថែមទៀតថា មកដល់ពេលបច្ចុប្បន្ននេះ កម្ពុជានៅតែកំណត់គោលដៅក្នុងការនាំចេញស្រូវ អង្ករ ឱ្យមានកំណើនបន្ថែមចាប់ពី ៣ ទៅ ៥ភាគរយ ជារៀងរាល់ឆ្នាំលើការនាំចេញអង្ករ ទៅកាន់គោលដៅទិញទីផ្សារអង្កររបស់កម្ពុជាផងដែរ៕