(ភ្នំពេញ)៖ លោកបណ្ឌិត កៅ ថាច ប្រតិភូរាជរដ្ឋាភិបាលទទួល បន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) បានថ្លែងឲ្យដឹងថា គិតត្រឹមថ្ងៃទី៣០ ខែកក្កដា ឆ្នាំ២០២៥នេះ ធនាគាររបស់រដ្ឋ ARDB ផ្ដល់ឥណទាន​ លើវិស័យស្រូវអង្ករ​ប្រមាណ ២០០លានដុល្លារ។

ការលើកឡើងរបស់លោកបណ្ឌិត កៅ ថាច ធ្វើឡើងក្នុងឱកាសលោកអញ្ជើញចូលរួមក្នុងពិធីបិទមហាសន្និបាតបូកសរុបការងារ និងបិទបញ្ចប់អាណត្តិទី ៤ របស់សហព័ន្ធស្រូវ-អង្ករកម្ពុជា នៅរសៀលថ្ងៃទី២៦ ​ខែសីហា ឆ្នាំ២០២៥។

លោកបណ្ឌិត កៅ ថាច បានថ្លែងឲ្យដឹងថា ​«គិតត្រឹមថ្ងៃទី៣១ ខែកក្កដា ឆ្នាំ២០២៥ ARDB បានផ្ដល់ឥណទានលើវិស័យស្រូវអង្ករ ប្រមាណ២០០លានដុល្លារអាមេរិក ស្មើនឹង៣១ភាគរយនៃឥណទានសរុប។ ក្នុងនោះ ARDB នឹងបន្ដជួយគាំទ្រដល់វិស័យមួយនេះ រហូតឆ្ពោះទៅដល់គោលដៅកំណត់របស់រាជរដ្ឋាភិបាល»។

លោកបានបន្ដថា សហព័ន្ធស្រូវអង្ករត្រូវតែពង្រឹងការផ្គត់ផ្គង់ហិរញ្ញាវត្ថុប្រកបដោយតម្លាភាព សម្ដៅធ្វើឲ្យសហព័​ន្ធស្រូវអង្ករមានហិរញ្ញវត្ថុពេញលេញ និងចូលរួមលើកកម្ព​ស់អភិវឌ្ឍន៍សម្ថភាពរបស់ប្រជាកសិករ ដើម្បីក្លាយជាសហគ្រិននៃវិស័យស្រូវអង្ករទាំងមូល។

លោកស្នើឱ្យសហព័ន្ធស្រូវអង្ករកម្ពុជា បន្ដសកម្មភាពរបស់ខ្លួន ឲ្យកាន់តែមានប្រសិទ្ធភាពដែលគាំទ្រគ្រប់តួអង្គ ក្នុងខ្សែច្រវាក់ផលិតកម្មស្រូវអង្ករ ដើម្បីរួមចំណែកអភិវឌ្ឍន៍សង្គម សេដ្ឋកិច្ច ពិសេសជំរុញការនាំចេញអង្ករសម្រេចបាន ១លានតោនក្នុងមួយឆ្នាំ។

ឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានថ្លែងថា រាជរដ្ឋាភិបាលកម្ពុជា បន្ដចាត់ទុកវិស័យស្រូវ-អង្ករ ជាអាទិភាព ដ៏មានសារៈសំខាន់, ដែលមិនត្រឹមតែ ដើម្បីធានានូវសន្តិសុខស្បៀងប៉ុណ្ណោះទេ, ប៉ុន្តែថែមទាំង ដើម្បីបង្កើនល្បឿននៃការកាត់បន្ថយភាពក្រីក្រ, ការលើកកម្ពស់ជីវភាពប្រជាជន និង ការជំរុញកំណើនសេដ្ឋកិច្ចជាតិទៀតផង។

លោកឧបនាយករដ្ឋមន្ត្រីបន្ថែមថា រាជរដ្ឋាភិបាលបានដាក់ចេញនូវយន្តការសម្របសម្រួល និងកម្មវិធីហិរញ្ញប្បទានពិសេសសំដៅលើកស្ទួយផលិតកម្ម, រកទីផ្សារ និង រក្សាលំនឹងថ្លៃកសិផល, តាមរយៈការផ្តល់នូវកញ្ចប់ថវិកាចំនួន ១០០ លានដុល្លារអាម៉េរិក, ដើម្បីធ្វើអន្តរាគមន៍ឲ្យបានទាន់ពេល ក្នុងការប្រមូលទិញកសិផល, ជាពិសេស ស្រូវ, សំដៅរក្សាស្ថិរភាពថ្លៃ និង ធានាសន្តិសុខស្បៀង។

ក្រោមកម្មវិធីហិរញ្ញប្បទានពិសេសនេះ, រាជរដ្ឋាភិបាលបានអនុញ្ញាតឲ្យធនាគារ ARDB ប្រើប្រាស់មូលនិធិចំនួន ៧០លានដុល្លារអាម៉េរិក កាលពីឆ្នាំ ២០២៤ កន្លងទៅ ។ ថ្មីៗនេះ, រាជរដ្ឋាភិបាល ក៏បានសម្រេចដកថវិកា ចំនួន ២០ លានដុល្លារអាម៉េរិក ពីមូលនិធិនេះ ឲ្យ ARDB ដើម្បីផ្តល់ជាទុនបង្វិលដល់រោងម៉ាស៊ីនកិនស្រូវ ក្នុងការប្រមូលទិញស្រូវពីប្រជាកសិករ ក្នុងតម្លៃសមរម្យ។ គណៈកម្មាធិការគោលនយោបាយសេដ្ឋកិច្ច និង ហិរញ្ញវត្ថុ, តាមរយៈក្រុមការងារ បច្ចេកទេសអន្តរក្រសួង ដែលទើបត្រូវបានបង្កើតឡើងថ្មី, នឹងបន្តតាមដានសភាពការណ៍ទីផ្សារស្រូវ-អង្ករ ជាប់ជាប្រចាំ បន្តទៅទៀត, ហើយនឹងសម្របសម្រួលស្នើឡើង នូវវិធានការចាំបាច់នានា សំដៅដោះស្រាយបញ្ហាទីផ្សារ និង ថ្លៃកសិផល ឲ្យបានសមស្រប និងទាន់ពេល៕