(ភ្នំពេញ)៖ អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នៅថ្ងៃទី២៦ ខែសីហា ឆ្នាំ២០២៥នេះ បានថ្លែងបញ្ជាក់ពីវិធានការគន្លឹះមួយចំនួន ដែលរាជរដ្ឋាភិបាលកម្ពុជា បាននិងកំពុងផ្ដល់ការគាំទ្រ និងធ្វើអន្តរាគមន៍យ៉ាងសកម្ម ជួយដល់វិស័យស្រូវ-អង្ករ។

ថ្លែងក្នុងពិធីបិទមហាសន្និបាតបូកសរុបការងារ និងបិទបញ្ចប់អាណត្តិទី៤ របស់សហព័ន្ធស្រូវ-អង្ករកម្ពុជា នៅរសៀលថ្ងៃទី២៦ ខែសីហា ឆ្នាំ២០២៥នេះ ឧបនាយករដ្ឋមន្រ្តី អូន ព័ន្ធមុនីរ័ត្ន បានបញ្ជាក់ថា ចំពោះវិស័យស្រូវ-អង្ករ រាជរដ្ឋាភិបាលសម្រាប់នីតិកាលទី៧នេះ នៃរដ្ឋសភា នៅតែបន្តយកចិត្តទុកដាក់ខ្ពស់ ដូចនីតិកាលមុនៗផងដែរ។

ឧបនាយករដ្ឋមន្រ្តី អូន ព័ន្ធមុនីរ័ត្ន បានបន្ដថា រាជរដ្ឋាភិបាលបាន និងកំពុងផ្ដល់ការគាំទ្រ និងធ្វើអន្តរាគមន៍យ៉ាងសកម្ម ចំពោះវិស័យស្រូវ-អង្ករ តាមរយៈវិធានការគន្លឹះមួយចំនួន រួមមាន ជាអាទិ៍៖

ទី១៖ ការដាក់ចេញនូវយន្តការសម្របសម្រួល និងកម្មវិធីហិរញ្ញប្បទានពិសេសសំដៅលើកស្ទួយផលិតកម្ម, រកទីផ្សារ និង រក្សាលំនឹងថ្លៃកសិផល, តាមរយៈការផ្តល់នូវកញ្ចប់ថវិកា ចំនួន១០០ លានដុល្លារអាម៉េរិក, ដើម្បីធ្វើអន្តរាគមន៍ឲ្យបានទាន់ពេល ក្នុងការប្រមូលទិញកសិផល, ជាពិសេស ស្រូវ, សំដៅរក្សាស្ថិរភាពថ្លៃ និង ធានាសន្តិសុខស្បៀង។

ត្រង់ចំណុចនេះ ឧបនាយករដ្ឋមន្រ្តី អូន ព័ន្ធមុនីរ័ត្ន សូមគូសបញ្ជាក់ថា ក្រោមកម្មវិធីហិរញ្ញប្បទានពិសេសនេះ, រាជរដ្ឋាភិបាល បានអនុញ្ញាតឲ្យធនាគារអភិវឌ្ឍន៍ជនបទ និងកសិកម្ម (ARDB) ប្រើប្រាស់មូលនិធិ ចំនួន ៧០ លានដុល្លារអាម៉េរិក កាលពីឆ្នាំ ២០២៤ កន្លងទៅ។ ថ្មីៗនេះ រាជរដ្ឋាភិបាល ក៏បានសម្រេចដកថវិកា ចំនួន២០លានដុល្លារអាម៉េរិក ពីមូលនិធិនេះ ឲ្យ ARDB ដើម្បីផ្តល់ជាទុនបង្វិលដល់រោងម៉ាស៊ីនកិនស្រូវ ក្នុងការប្រមូលទិញស្រូវ ពីប្រជាកសិករ ក្នុងតម្លៃសមរម្យ។

គណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ, តាមរយៈក្រុមការងារ បច្ចេកទេសអន្តរក្រសួង ដែលទើបត្រូវបានបង្កើតឡើងថ្មី, នឹងបន្តតាមដានសភាពការណ៍ទីផ្សារ ស្រូវ-អង្ករ ជាប់ជាប្រចាំ បន្តទៅទៀត, ហើយនឹងសម្របសម្រួលស្នើឡើង នូវវិធានការចាំបាច់នានា សំដៅដោះស្រាយបញ្ហាទីផ្សារ និង ថ្លៃកសិផល ឲ្យបានសមស្រប និងទាន់ពេល។

ទី២៖ ការដាក់ពង្រាយមន្រ្តីកសិកម្មនៅតាមឃុំ/សង្កាត់ ក្រោមការរៀបចំរបស់ ក្រសួងកសិកម្ម រុក្ខាប្រមាញ់ និង នេសាទ សំដៅបង្ខិតសេវាកសិកម្ម ឲ្យបានទៅជិតប្រជាពលរដ្ឋ នៅមូលដ្ឋានឃុំទាំងអស់នៅជនបទទូទាំងប្រទេស ដើម្បីជួយដល់គ្រួសារកសិករ ក្នុងការ-លើកស្ទួយផលិតភាពកសិកម្ម និង ប្រាក់ចំណូល។

ទី៣៖ ការផ្តល់ឥណទានជាមួយអត្រាការប្រាក់សមរម្យ និងលក្ខខណ្ឌអនុគ្រោះដល់វិស័យស្រូវ-អង្ករ តាមរយៈ ធនាគារអភិវឌ្ឍន៍ជនបទ និង កសិកម្ម សម្រាប់ការ-វិនិយោគ លើហេដ្ឋារចនាសម័្ពន្ធរោងម៉ាស៊ីនកិនស្រូវ, ឃ្លាំង និង ឡសម្ងួត។

ទី៤៖ ការលើកកម្ពស់លទ្ធភាពទទួលបានឥណទានបន្ថែម ពីធនាគារឯកជន តាមរយៈយន្ដការធានាឥណទាន របស់សាជីវកម្មធានាឥណទានកម្ពុជា ក្រោមគម្រោងធានាឥណ- ទាន សម្រាប់ការនាំចេញអង្ករ ដែលកន្លងមក បានផ្តល់ការធានាលើកម្ចី សរុបប្រមាណ ៣៨ លានដុល្លារអាម៉េរិក។

ទី៥៖ ការផ្ដល់ការលើកទឹកចិត្ត ដល់វិស័យស្រូវ-អង្ករ តាមរយៈការលើកលែងពន្ធគយ លើការនាំចូលសម្ភារៈបរិក្ខារ និង ការផ្តល់ការអនុគ្រោះ ខាងពន្ធដារ រួមបញ្ចូលនូវការដាក់ ជាបន្ទុករបស់រដ្ឋ នូវអាករលើតម្លៃបន្ថែម, ព្រមទាំងការព្យួរទុក នូវការបង់ពន្ធអប្បបរមា និង ការបង់ប្រាក់រំដោះពន្ធលើប្រាក់ចំណូល។

ពាក់ព័ន្ធចំណុចនេះ, សហព័ន្ធស្រូវ-អង្ករ ក៏បានស្នើសុំមកក្រសួងសេដ្ឋកិច្ច និង ហិរញ្ញវត្ថុ ដើម្បីបន្តផ្តល់ការលើកទឹកចិត្ត ផ្នែកពន្ធដារ ចំពោះវិស័យស្រូវ-អង្ករ សម្រាប់រយៈពេល៥ឆ្នាំ បន្ថែមទៀត។ ឧបនាយករដ្ឋមន្រ្តី អូន ព័ន្ធមុនីរ័ត្ន សូមគូសបញ្ជាក់ថា ជាគោលការណ៍ រាជរដ្ឋាភិបាល តាមរយៈក្រសួងសេដ្ឋកិច្ច និងហិរញ្ញវត្ថុ បានដាក់ចេញនូវប្រកាសលេខ ១៧០ សហវ.ប្រក.អពដ ចុះថ្ងៃទី២០ ខែមីនា ឆ្នាំ២០២៤ ស្តីពីការលើកទឹកចិត្តពន្ធដារ ចំពោះវិស័យកសិកម្ម ដែលនឹងត្រូវអស់សុពលភាព នៅដំណាច់ឆ្នាំ ២០២៥ខាងមុខនេះ។

យ៉ាងណាមិញ, ផ្អែកតាមតម្រូវការចាំបាច់ជាក់ស្តែងចំពោះមុខ, ក្រសួងសេដ្ឋកិច្ច និង ហិរញ្ញវត្ថុ នឹងគោរពស្នើសុំការអនុញ្ញាតដ៏ខ្ពង់ខ្ពស់ ពីប្រមុខរាជរដ្ឋាភិបាល ដើម្បីបន្តសុពលភាព ប្រកាសខាងលើ សម្រាប់រយៈពេល២ឆ្នាំ បន្ថែមទៀត។ បន្ទាប់ពីនោះ, ក្រសួងសេដ្ឋកិច្ច និង ហិរញ្ញវត្ថុ នឹងពិនិត្យ និងវាយតម្លៃស្ថានការណ៍ជាក់ស្តែង ដើម្បីពិនិត្យលទ្ធភាពបន្តសុពលភាព នៃការផ្តល់ការលើកទឹកចិត្តផ្នែកពន្ធដារ ចំពោះវិស័យ កសិកម្មបន្ថែមទៀត ក្នុងករណីចាំបាច់។

ទី៦៖ ការធ្វើពិពិធកម្មទីផ្សារនាំចេញអង្កររបស់កម្ពុជា ក្រោមការដឹកនាំ របស់ក្រសួងពាណិជ្ជកម្ម ដែលបានខិតខំបើកទីផ្សារនាំចេញថ្មីបន្ថែម ក៏ដូចជាការលើកកម្ពស់កិច្ចសហប្រតិបត្តិការ ពាណិជ្ជកម្ម ជាមួយដៃគូពាណិជ្ជកម្មធំៗ និង ការចរចាកិច្ចព្រមព្រៀងពាណិជ្ជកម្មសេរី ជាមួយបណ្ដាប្រទេសធំៗមួយចំនួនផងដែរ។

ទី៧៖ កិច្ចប្រឹងប្រែង របស់ ក្រសួងកសិកម្ម រុក្ខាប្រមាញ់ និងនេសាទ ក្នុងការអភិវឌ្ឍពូជស្រូវ រហូតទទួលបានពានរង្វាន់អង្ករល្អបំផុត លើពិភពលោក ចំនួន ៦ លើក និង ក្នុងការចងក្រងសហគមន៍កសិកម្មទំនើប ដើម្បីប្រែក្លាយវិស័យកសិកម្មកម្ពុជា, ពីលក្ខណៈគ្រួសារ ទៅជាសហគ្រាសសេដ្ឋកិច្ចកសិកម្មដ៏រឹងមាំ, ដែលមានសមាហរណកម្មខ្ពស់, មានសេដ្ឋកិច្ច មាត្រដ្ឋាន និង មានសមត្ថភាពប្រកួតប្រជែង, ទាំងបរិមាណ និង គុណភាព។

ទី៨៖ ការគាំទ្ររបស់ សហគ្រិនខ្មែរ (Khmer Enterprise) ក្រោមការដឹកនាំ របស់ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង នវានុវត្តន៍ ក្នុងការជំរុញការផ្សព្វផ្សាយអង្ករកម្ពុជា ក្នុងវេទិកាអន្តរជាតិនានា។

និងទី៩៖ ការចូលរួមកាត់បន្ថយថ្លៃដើមផលិតកម្ម ក្នុងការកែច្នៃអង្ករ តាមរយៈការបញ្ចុះថ្លៃអគ្គិសនីដល់រោងម៉ាស៊ីនកិនស្រូវ សម្រាប់ប្រតិបត្តិការសម្ងួត និង កែច្នៃអង្ករ ក្នុងរដូវប្រមូលផល៕