(ភ្នំពេញ)​៖ ធនាគារជាតិនៃកម្ពុជា និងធនាគាររដ្ឋវៀតណាម ជំរុញការទូទាត់ឆ្លងដែនតាមរយៈប្រព័ន្ធ QR Code សំដៅរួមចំណែកអភិវឌ្ឍវិស័យធនាគារនៅក្នុងប្រទេសទាំងពីរ។

កិច្ចប្រជុំទ្វេភាគីប្រចាំឆ្នាំ២០២៥ ធ្វើឡើងក្រោមការចូលរួមពីលោកស្រីបណ្ឌិត ជា សិរី ទេសាភិបាលធនាគារជាតិនៃកម្ពុជា និងលោកស្រី Nguyen Thi Hong ទេសាភិបាល ធនាគាររដ្ឋវៀតណាមនៅថ្ងៃទី២៦ ខែសីហា ឆ្នាំ២០២៥។

កិច្ចប្រជុំទ្វេភាគីប្រចាំឆ្នាំ២០២៥នេះ ត្រូវបានរៀបចំឡើងក្នុងគោលបំណងពង្រឹងមិត្តភាព និងពង្រីកកិច្ចសហប្រតិបត្តិការ រវាងធនាគារកណ្តាលទាំងពីរ សំដៅរួមចំណែកអភិវឌ្ឍវិស័យធនាគារនៅក្នុងប្រទេសទាំងពីរ។ ថ្នាក់ដឹកនាំធនាគារកណ្តាលទាំងពីរ បានពិភាក្សាផ្លាស់ប្តូរយោបល់ពីស្ថានភាពសេដ្ឋកិច្ច នយោបាយ រូបិយវត្ថុ និងការអភិវឌ្ឍនៃវិស័យធនាគារនៃប្រទេសទាំងពីរ។

ភាគីទាំងពីរបានពិនិត្យ និងវាយតម្លៃលើវឌ្ឍនភាពនៃកិច្ចសហប្រតិបត្តិការទ្វេភាគី ដែលបានរួមចំណែកពង្រឹងសមាហរណកម្មវិស័យធនាគារ ព្រមទាំងបានពិនិត្យលើវឌ្ឍនភាពគួរឱ្យកត់សម្គាល់ នៃការប្រើប្រាស់ប្រព័ន្ធទូទាត់ឆ្លងដែនរវាងប្រទេសទាំងពីរ ដែលបានដាក់ឱ្យដំណើរការកាលពីឆ្នាំ២០២៣កន្លងទៅ។

ក្រោមស្មារតីនៃកិច្ចសហប្រតិបត្តិការល្អប្រសើរ ថ្នាក់ដឹកនាំនៃធនាគារកណ្តាលទាំងពីរបានពិភាក្សា និងឯកភាពលើកិច្ចសហប្រតិបត្តិការ សម្រាប់ឆ្នាំ២០២៥-២០២៦ ដែលរួមមានដូចខាងក្រោម៖
១៖ បង្កើនវិសាលភាពនៃការទូទាត់ទ្វេភាគី តាមរយៈការជំរុញឱ្យគ្រឹះស្ថានធនាគារនិងហិរញ្ញវត្ថុកាន់តែច្រើនចូលរួម។
២៖ លើកកម្ពស់ការប្រើប្រាស់រូបិយវត្ថុជាតិ (ប្រាក់រៀលខ្មែរនិងប្រាក់ដុងវៀតណាម) សម្រាប់ការទូទាត់ឆ្លងដែន នៃប្រជាជនក្នុងប្រទេសទាំងពីរ។
៣៖ លើកកម្ពស់តួនាទីរបស់គ្រឹះស្ថានធនាគារ និងហិរញ្ញវត្ថុក្នុងការរួមចំណែកអភិវឌ្ឍសេដ្ឋកិច្ច និងហិរញ្ញវត្ថុនៃប្រទេសទាំងពីរ៕