(ភ្នំពេញ)៖ ឧកញ៉ា ឡាយ ឈុនហួរ ប្រធានក្រុមប្រឹក្សាភិបាលក្រុមហ៊ុន City Rice បានជាប់ជាប្រធានសហព័ន្ធស្រូវអង្ករកម្ពុជា អាណត្តិថ្មី បានបេ្ដជ្ញាជួយកសិករទូទាំងប្រទេស​ តាមរយៈការពង្រឹង និងពង្រីកខ្សែក្រវាត់តម្លៃ និងខ្សែក្រវាត់ផ្គត់ផ្គង់ ដោយរៀបចំឱ្យមានយន្តការច្បាស់លាស់ និងមានភាពប្រទាក់ក្រឡា លើកិច្ចសម្របសម្រួល និងសហប្រតិបត្តិការ ក៏ដូចជាការបំពេញគ្នាទៅវិញទៅមក សំដៅធ្វើឱ្យធាតុចូលកសិកម្ម មានជី ថ្នាំពុលកសិកម្ម ឱ្យមានតម្លៃទាបជាងមុន និងកាត់បន្ថយថ្លៃដើមឱ្យបានទាបជាអតិបរមា ព្រមទាំងធានាតម្លៃ​ស្រូវឱ្យបានសមសម្យ។

លើកឡើងក្នុងពិធីបិទមហាសន្និបាតបូកសរុបការងារ និងបិទបញ្ចប់អាណត្តិទី ៤ របស់សហព័ន្ធស្រូវ-អង្ករកម្ពុជា នៅរសៀលថ្ងៃទី២៦ ​ខែសីហា ឆ្នាំ២០២៥ ឧកញ៉ា ឡាយ ឈុនហួរ បានប្តេជ្ញាចិត្តខិតខំបំពេញការងារជាប្រធានសហព័ន្ធស្រូវ អង្ករ ឱ្យអស់ពីសមត្ថភាព ប្រកបដោយសុច្ចរិតភាព តម្លាភាព និងគណនេយ្យភាព សាមគ្គីភាពដោយយកប្រយោជន៍រួមរបស់សមាជិក នៅក្នុងវិស័យស្រូវអង្ករជាគោល, ប្តេជ្ញាបំពេញការងារ ដោយគោរពឱ្យបាននូវវិជ្ជាជីវៈ ការទទួលខុសត្រូវ ការអនុវត្តនូវគោលនយោបាយរបស់រាជរដ្ឋាភិបាលដែលបានដាក់ចេញ។

ឧកញ៉ា ឡាយ ឈុនហួរ បានបន្ថែមថា សម្រាប់អាណត្តិទី៥ ក្នុងរយៈពេល ៣ឆ្នាំ ពីឆ្នាំ២០២៥-២០២៨ ថ្នាក់ដឹកនាំនៃសហព័ន្ធស្រូវអង្ករកម្ពុជា នឹងសម្រូចការងារដោយផ្តោតលើសរសរស្តម្ភទាំង៤ របស់រាជរដ្ឋាភិបាលដែលមានដូចជា៖

សរសរស្តម្ភទី១៖ អភិបាលកិច្ច ពង្រឹងការគៀងគរគ្រប់គ្រងហិរញ្ញវត្ថុ ប្រកបដោយការទទួលខុសត្រូវ តម្លាភាព គណនេយ្យភាព និងធ្វើស្ថាបនីយកម្មផ្នែកពាក់ព័ន្ធស្រូវ អង្ករមួយចំនួន និងពង្រីកវិសាលភាពការងារគ្រប់គ្រងប្រឹក្សាភិបាល លេខាធិការ និងគណកម្មាធិការប្រតិបត្តិនានា សំដៅបំពេញតួនាទី និងភារកិច្ចការងារឱ្យមានប្រសិទ្ធភាព និងប្រសិទ្ធផលខ្ពស់ដើម្បីជួយដល់កសិករទូទាំងប្រទេសឱ្យក្លាយទៅជា កសិសហគ្រិន និងវិស័យស្រូវអង្ករទាំងមូល។

សរសរស្តម្ភទី២៖ ការពង្រឹង និងពង្រីកខ្សែក្រវាត់តម្លៃ និងខ្សែក្រវាត់ផ្គត់ផ្គង់ ដោយរៀបចំឱ្យមានយន្តការច្បាស់លាស់ និងមានភាពប្រទាក់ក្រឡាលើកិច្ចសម្របសម្រួល និងសហប្រតិបត្តិការ ក៏ដូចជាការបំពេញគ្នាទៅវិញទៅមក សំដៅធ្វើឱ្យធាតុចូលកសិកម្ម មានជី ថ្នាំពុលកសិកម្ម ឱ្យមានតម្លៃទាបជាងមុន និងកាត់បន្ថយថ្លៃដើមឱ្យបានទាបជាអតិបរមា ក៏ដូចជាជំរុញប្រើប្រាស់ឧត្តមានុវត្តដាំដុះ និងប្រមូលផលហើយរកស្តង់ដារផលិតកម្ម សកសិកម្ម ក្នុងគោលបំណងលើកស្ទួយកម្រិតប្រាក់ចំណេញរបស់ប្រជាកសិករ រោងម៉ាស៊ីនកិនស្រូវ អ្នកនាំចេញ ដែលផ្តល់ផលិតភាពសេដ្ឋកិច្ចដល់គ្រប់ភាគីពាក់ព័ន្ធទាំងអស់នៅគ្រប់វិស័យ និងប្រព័ន្ធសេដ្ឋកិច្ចជាតិទាំងមូល។

សរសរស្តម្ភទី៣៖ ការធ្វើពិពិធកម្ម ផលិតកម្មកែឆ្នៃ និងទីផ្សារ រៀបចំផែនការអនុវត្តឱ្យស្របតាមផែនការជំរុញឱ្យមានកំណើននាំចេញស្រូវ អង្ករ ផលិតផលកែឆ្នៃឱ្យមានប្រភពពីផលិតកម្មស្រូវ អង្ករ ដោយដាក់ចេញនូវផែនការជំរុញលើកទឹកចិត្តឱ្យប្រើប្រាស់នវានុវត្តខ្សែក្រវាត់ផលិតកម្ម និងការឆ្នៃដែលអាចបង្កើតបានផលិតផលមានតម្លៃបន្ថែម សម្រាប់បំរើក្នុងវិស័យម្ហូបអាហារ និងវត្ថុប្រើប្រាស់។

សរសរស្តម្ភទី៤៖ ការជម្រុញលើការដាំដុះឱ្យមានទិន្នផលខ្ពស់ ស្របតាមគោលការណ៍ ESG និងជម្រុញការអនុវត្តកសិកម្មប្រកបដោយចេរភាព និងការចូលរួមដោយជិតស្និទ្ធជាមួយក្រសួងពាក់ព័ន្ធដូចជា៖ ក្រសួងកសិកម្ម និងស្ថាប័នពាក់ព័ន្ធក្នុងការជំរុញផលិតកម្មពូជស្រូវ ដើម្បីចែកជូនប្រជាកសិករ និងធ្វើកិច្ចសន្យាកសិកម្ម ដើម្បីធានាបានតម្លៃស្រូវសមរម្យ ព្រមទាំងយន្តការជំរុញវិស័យឯកជនឱ្យខិតខំសិក្សាស្រាវជ្រាវ ផលិតពូជស្រូវដែលមានទិន្នផលខ្ពស់ និងមានតម្លៃខ្ពស់ ដែលអាចឆ្លើយតបនឹងតម្រូវការទីផ្សាររបស់ពិភពលោក និងចូមរួមប្រយុទ្ធប្រឆាំងនឹងបំរ៉ែបំរួលនៃធាតុអាកាសរបស់អង្គការសហប្រជាជាតិ ដូចជាការជំរុញផលិតកម្មស្រូវ ឫផលិតកម្មស្រូវដែលបញ្ចេញឧស្ម័នកាបូនិចទាប ផលិតកម្មស្រូវសរីរាង្គ នាពេលអនាគត់ផងដែរ៕