(ភ្នំពេញ)៖ និយ័តករមូលបត្រកម្ពុជា សហការជាមួយផ្សារមូលបត្រកម្ពុជា (ផមក) និងក្រុមហ៊ុនមូលបត្រ រ៉ូយ៉ាល់គ្រុប ម.ក (RGS) រៀបចំវេទិកាវិនិយោគិនស្តីពី «ការសន្សំមូលបត្រ» ជូនដល់ថ្នាក់ដឹកនាំ និងមន្រ្តីរាជការនៃក្រសួង-ស្ថាប័នសាធារណៈជាលើកទី២ ដោយមានសមាសភាពចូលរួមពីថ្នាក់ដឹកនាំ-មន្រ្តីរាជការនៃក្រសួងសេដ្ឋកិច្ច និងហិរញ្ញវត្ថុ, ក្រសួងយុត្តិធម៌, ក្រុមប្រឹក្សាអភិវឌ្ឍន៍កម្ពុជា, ក្រសួងរៀបចំដែនដី នគររូបនីយកម្ម និងសំណង់, និងក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍។

វេទិកាវិនិយោគិន ដែលរៀបចំឡើងនាថ្ងៃទី២៧ ខែសីហា ឆ្នាំ២០២៥នេះ មានគោលដៅចម្បងក្នុងការបញ្រ្ជាបការយល់ដឹងពីវិស័យមូលបត្រឱ្យកាន់តែស៊ីជម្រៅតាមរយៈការចែករំលែកចំណេះដឹង និងបទពិសោធន៍ថ្មីៗ ព្រមទាំងការអនុវត្តជាក់ស្តែងលើការជួញដូរតាមរយៈកម្មវិធី CSX Trade ជាពិសេសដើម្បីស្នើសុំកិច្ចសហប្រតិបត្តិការពីក្រសួងពាក់ព័ន្ធចូលរួមផ្សព្វផ្សាយដល់ប្រជាពលរដ្ឋ និងក្រុមហ៊ុនដែលស្ថិតនៅក្រោមការគ្រប់គ្រងក្រសួងផ្ទាល់ អំពីសកម្មភាពដែលធ្វើឡើងដោយក្រុមហ៊ុនគ្មានអាជ្ញាបណ្ណ ក្នុងគោលដៅដើម្បីការពារប្រយោជន៍ប្រជាជន។

ថ្លែងក្នុងវេទិកានេះ លោក ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា មានប្រសាសន៍ថា វត្តមានរបស់ដឹកនាំ និងមន្រ្តីរាជការនៃក្រសួង-ស្ថាប័នសាធារណៈ នាថ្ងៃនេះ មិនត្រឹមតែជាអ្នកចូលរួមការបណ្ដុះបណ្ដាលតែមួយប៉ុណ្ណោះទេ ប៉ុន្តែជាតួអង្គយ៉ាងសំខាន់ដែលរួមចំណែកដល់ការអភិវឌ្ឍទីផ្សារមូលបត្រ និងសេដ្ឋកិច្ចនៃប្រទេសកម្ពុជានាពេលខាងមុខ។

លោកមានប្រសាសន៍បន្ថែមថា «ខ្ញុំសូមប្រើប្រាស់ឱកាសនេះដើម្បីបង្កើនការយល់ដឹងពីវិស័យមូលបត្រ និងពង្រឹងនូវទំនាក់ទំនងរវាងស្ថាប័ន ព្រមទាំងចូលរួមចំណែកដល់ការអភិវឌ្ឍន៍ប្រកបដោយចីរភាពនៃវិស័យហិរញ្ញវត្ថុរបស់កម្ពុជា។ សូមលោកអ្នកក្រេបយកចំណេះដឹងប្រកបដោយផ្លែផ្កា និងរួមគ្នាកសាងអនាគតសេដ្ឋកិច្ចដ៏ត្រចះត្រចង់ និងរុងរឿងបន្ថែមទៀត»។

លោកបានលើកឡើងដែរថា ទន្ទឹមនឹងមានការរីកចម្រើននៃវិស័យមូលបត្រនៅកម្ពុជា ក៏មានជនខិលខូចមួយចំនួន បាននិងកំពុងឆ្លៀតឱកាសទាក់ទាញវិនិយោគិនដាក់សាច់ប្រាក់វិនិយោគដោយសន្យាផ្តល់ផលត្រឡប់ទៅវិញខ្ពស់ហួសពីការរំពឹងទុក។ ដូច្នេះដើម្បីជៀសវាងពីសកម្មភាពទាំងនោះ និងដើម្បីបន្តអភិវឌ្ឍន៍សមត្ថភាពក្នុងវិស័យមូលបត្រ សូមសាធារណជន និងមន្រ្តីរាជការទាំងអស់ គប្បីចាប់ផ្តើមរៀនវិនិយោគក្នុងវិស័យមូលបត្រ ដើម្បីក្លាយខ្លួនជាចំណែកដ៏សំខាន់នៃការអភិវឌ្ឍន៍វិស័យមូលបត្រ ព្រមទាំងបន្តសិក្សាស្វែងយល់ និងអភិវឌ្ឍន៍វិជ្ជាជីវៈដើម្បីសម្របខ្លួនទៅនឹងបរិបទទីផ្សារបច្ចុប្បន្ន និងទីផ្សារអភិវឌ្ឍន៍នាពេលខាងមុខ។

សូមបញ្ជាក់ថា តាមរយៈវេទិកានេះ អ្នកចូលរួមនឹងទទួលបានអត្ថប្រយោជន៍ដូចជា ការលើកលែងកម្រៃសេវាស្នើសុំលេខអត្តសញ្ញាណវិនិយោគិន និងបើកគណនីជួញដូរ ចំណេះដឹងអនុវត្តន៍ក្នុងការជួញដូរមូលបត្រ ជាពិសេសគឺទទួលបាននូវមូលបត្រកម្មសិទ្ធិរបស់ក្រុមហ៊ុន ខេម ជ្ជីអេសអឹម ម.ក (សែលកាត) ចំនួន៥ ភាគហ៊ុន ព្រមទាំងមានផ្ដល់ជូនជាលិខិតបញ្ជាក់ការចូលរួមនៅពេលបញ្ចប់វគ្គសិក្សាពេលរសៀល និងរង្វាន់ជាច្រើនទៀត។

សូមរំលឹកផងដែរថា វេទិកាវិនិយោគិន បានរៀបចំម្តងរួចមកហើយ កាលពីថ្ងៃទី៩ ខែឧសភា ឆ្នាំ២០២៥ កន្លងទៅ បានបញ្ចប់ទៅដោយជោគជ័យ ក្រោមការចូលរួមយ៉ាងផុសផុលពីមន្រ្តីរាជការប្រហែល១០០នាក់ ដែលក្នុងនោះមានទិន្នន័យអ្នកបើកគណនីជួញដូរប្រហែល៩០% និងបានអនុវត្តជាក់ស្តែងក្នុងការទិញ-លក់ភាគហ៊ុនផងដែរ៕