(ភ្នំពេញ)៖ លោក ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា បានឱ្យដឹងថា បច្ចុប្បន្ននេះ ក្រុមហ៊ុន ពីកាសូ ស៊ីធី ហ្កាដិន (Picasso City Garden) ដែលជាក្រុមហ៊ុនស្ថិតក្នុងវិស័យអចលនទ្រព្យ កំពុងត្រៀមខ្លួនចុះបញ្ជីមូលបត្រកម្មសិទ្ធនៅទីផ្សារមូលបត្រកម្ពុជា ដើម្បីកៀរគរទុនពីសសាធារណជន។

លោកបានលើកឡើងថា ស្របដែលមានក្រុមហ៊ុនថ្មីចុះបញ្ជី វិនិយោគិនគួរសាកល្បងចូលរួមទិញមូលបត្រកម្មសិទ្ធិក្នុងដំណាក់កាល IPO នេះ ដើម្បីមានឱកាសទទួលបានផលចំណេញលើកំណើនថ្លៃជួញដូរមូលបត្រដំបូង។

លោក ស៊ូ សុជាតិ លើកឡើងបែបនេះ ធ្វើឡើង ក្នុងវេទិកាវិនិយោគិនស្តីពី «ការសន្សំមូលបត្រ» នាថ្ងៃទី២៧ ខែសីហា ឆ្នាំ២០២៥នេះ។

លោកមានប្រសាសន៍ថា «តាមរយៈផលិតផលចុះបញ្ជីជាបន្តបន្ទាប់នេះផងដែរ បានបង្ហាញឱ្យឃើញពីការរីកចម្រើនគួរឱ្យកត់សម្គាល់ ដែលកំពុងឆ្ពោះទៅកាន់ការវិវត្តដ៏ល្អ មាននូវជម្រើសផលិតផលវិនិយោគកាន់តែសំបូរបែប មានដំណើរការទីផ្សារល្អប្រកបដោយទំនុកចិត្ត ក្រោមការគ្រប់គ្រងរបស់ ន.ម.ក. និងមានការចូលរួមអភិវឌ្ឍយ៉ាងពេញទំហឹងពីសំណាក់សមាជិក និងអ្នកចូលរួមក្នុងទីផ្សារ»។

លោកបន្ថែមថា ជាការពិតណាស់ ទីផ្សារមូលបត្រគឺជាប្រភពហិរញ្ញប្បទានមួយ ដែលអនុញ្ញាតឱ្យម្ចាស់ក្រុមហ៊ុនប្រមូលសាច់ប្រាក់ពីសាធារណៈជនតាមការបោះផ្សាយលក់មូលបត្រដើម្បីពង្រីកអាជីវកម្ម និងផ្ដល់ឱកាសឱ្យសាធារណៈក្លាយខ្លួនជាម្ចាស់បំណុល ឬម្ចាស់កម្មសិទ្ធិតាមរយៈការទិញនិងកាន់កាប់មូលបត្ររបស់ក្រុមហ៊ុនក្នុងរយៈពេលវែង ឬជាវិនិយោគិនម្នាក់ដែលអាចរកបានប្រាក់ចំណេញបន្ថែមតាមការជួញដូរមូលបត្រនោះនៅក្នុងទីផ្សារមូលបត្រ។ សកម្មភាពទាំងនេះបានជំរុញនូវការអភិវឌ្ឍទីផ្សារមូលបត្រនៅកម្ពុជា ព្រមទាំងជាការរួមចំណែកដល់ស្ថិរភាព និងចរន្តសេដ្ឋកិច្ចជាតិ តាមរយៈកំណើននៃការវិនិយោគរយៈពេលវែងរបស់ប្រជាជន ដែលស្របតាមគោលដៅទូលំទូលាយនៃនិរន្តរភាពសេដ្ឋកិច្ច និងការបែងចែកធនធាននៅទូទាំងវិស័យទាំងអស់។

ក្នុងការគាំទ្រដល់ការអភិវឌ្ឍន៍ទាំងនេះ ន.ម.ក.ក៏យកចិត្តទុកដាក់ខ្ពស់លើការត្រៀមខ្លួនរបស់ម្ចាស់អាជីវកម្ម និងសាធារណៈជន ក្នុងការទទួលបានហិរញ្ញប្បទាន និងវិនិយោគប្រកបដោយសុវត្ថិភាព និងប្រសិទ្ធភាព តាមការបង្កើតនូវការបណ្ដុះបណ្ដាលជាច្រើនដើម្បីបំពេញនូវគម្លាតចំណេះដឹងអំពីវិស័យមូលបត្ររវាងទ្រឹស្ដី និងការអនុវត្តជាក់ស្ដែងពីវាគ្មិនជំនាញ។

គិតត្រឹមឆមាសទី១ ក្នុងឆ្នាំ២០២៥ ទីផ្សារមូលបត្រមានវិនិយោគិនសរុបចំនួន ៦១.៣០៦ នាក់ ដែលក្នុងនោះចំនួនវិនិយោគិនបានកើនឡើងចំនួន ៣.៧៤០នាក់ ក្នុងឆមាសទី១ ឆ្នាំ២០២៥។

បើតាមលោក ស៊ូ សុជាតិ ផ្សារមូលបត្រកម្ពុជា ទទួលបានការចុះបញ្ជីមូលបត្រជាបន្តបន្ទាប់ ដោយបច្ចុប្បន្នមានក្រុមហ៊ុនបោះផ្សាយសរុបចំនួន២៥បានចុះបញ្ជី ក្នុងនោះរួមមានក្រុមហ៊ុនចុះបញ្ជីមូលបត្រកម្មសិទ្ធិចំនួន១១ និងក្រុមហ៊ុនចុះបញ្ជីមូលបត្របំណុលចំនួន ១៤ ក្រុមហ៊ុន។ ក្រុមហ៊ុនចុះបញ្ជីទាំងនេះបានប្រមូលទុនពីទីផ្សារប្រមាណ ៥៤៨ លានដុល្លារអាមេរិក។

ក្នុងរយៈពេលមួយឆមាសដើមឆ្នាំ២០២៥ កន្លងទៅ ការជួញដូរមូលបត្រនៅផ្សារមូលបត្រ បង្ហាញពីសន្ទុះនៃកំណើន ដោយទំហំជួញដូរសរុបមានចំនួនប្រហែល១២ លានភាគហ៊ុន ក្នុងតម្លៃជួញដូរសរុបជាង ១៣ លានដុល្លារអាមេរិក ដែលគិតជាមធ្យមប្រមាណជា ១០ ម៉ឺនភាគហ៊ុន និងគិតជាតម្លៃប្រមាណជា ១១ ម៉ឺនដុល្លារ ក្នុងមួយថ្ងៃ៕