(ភ្នំពេញ)៖ បណ្ឌិត ជេត ជាលី សាកលវិទ្យាធិការនៃសាកលវិទ្យាល័យភូមិន្ទភ្នំពេញ (RUPP) បានថ្លែងឲ្យដឹងថា ការធ្វើពាណិជ្ជកម្ម មិនត្រូវពឹងខ្លាំងពេកលើប្រភពតែ ១ឬ២ ដែលនាំឱ្យគេមានអំណាចក្នុងការសង្កត់​ ​​ហើយត្រូវរៀនរស់ដោយខ្លួនឯង។

ការលើកឡើងរបស់បណ្ឌិត ជេត ជាលី ធ្វើឡើងក្នុងកម្មវិធី FRESH BUSINESS: កិច្ចពិភាក្សាលើប្រធានបទ៖ «ទំនាក់ទំនងរវាងសន្តិភាព និងការអភិវឌ្ឍសេដ្ឋកិច្ចរបស់កម្ពុជា»។

បណ្ឌិត ជេត ជាលី បានថ្លែងថា ដូចស្ថានភាពបច្ចុប្បន្ននេះស្រាប់ ខណៈដែលយើងមានបញ្ហាជាមួយប្រទេសថៃ ខណៈយើងទាំងពីរប្រទេសជាប្រទេសដែលមានការធ្វើពាណិជ្ជកម្មរវាងគ្នា និងគ្នាយ៉ាងច្រើន ពេលមានសង្គ្រាមរវាងគ្នានឹងគ្នាបញ្ហានៃការខ្វះខាតការផ្គត់ផ្គង់ទំនិញខ្លះ គឺកើនឡើង ដូចជាទឹកដោះគោស្រស់ជាដើម ព្រោះទឹកដោះគោ កម្ពុជាយើងពឹងផ្អែកច្រើនទៅលើប្រទេសថៃ ជាហេតុនាំឲ្យកង្វះការផ្គត់ផ្គង់ពេលមានបញ្ហា។

លោកបណ្ឌិតបន្ដថា ប៉ុន្ដែពេលនេះយើងមានទំនិញជាច្រើន ដែលគ្រប់គ្រងប​ានល្អ និងផ្គត់ផ្គង់បានគ្រប់គ្រាន់ត្រឹមតែអំឡុងពេលប៉ុន្មានថ្ងៃប៉ុណ្ណោះ។ ដូច្នេះតទៅថ្ងៃមុខ ថ្ងៃនេះជាបទពិសោធន៍ ថ្ងៃខាងមុខកុំរំពឹងលើប្រភពធ្វើពាណិជ្ជកម្មតែ១ ឬ២ ព្រោះថ្ងៃមុខប្រសិនប្រទេសនោះអមិត្តជាមួយកម្ពុជាយើង ជាហេតុនាំឲ្យយើងមានបញ្ហាប្រឈមនានា។

លោកបណ្ឌិតបញ្ជាក់ថា ប្រសិនបើយើងមានប្រភពច្រើនដូចជា ១០ប្រទេសឡើង ដូច្នេះយើងមានបញ្ហាត្រឹម ១០ភាគរយប៉ុណ្ណោះ ប៉ុន្ដែបើយើងរំពឹងលើប្រភព ២ ឬ១ ដូច្នេះពេលមានបញ្ហា គឺច្បាស់ជាមាន៥០ភាគរយ ទៅ១០០ភាគរយតែម្ដង៕

សូមស្តាប់ការលើកឡើងរបស់បណ្ឌិត ជេត ជាលី៖