(ភ្នំពេញ)៖ ប្រទេសចិន បានឈរលំដាប់លេខ១ ដែលបានមកដាក់ទុនវិនិយោគនៅកម្ពុជាច្រើនជាងគេ នៅរយៈពេល៨ខែ ឆ្នាំ២០២៥ ក្នុងទំហំទឹកប្រាក់ ៣ ៨០៣លានដុល្លារអាមេរិក។ នេះបើតាមរបាយការណ៍ ក្រុមប្រឹក្សាអភិវឌ្ឍន៍កម្ពុជា ដែលបណ្តាញព័ត៌មាន Fresh News ទទួលបាន។

របាយការណ៍របស់ក្រុមប្រឹក្សាអភិវឌ្ឍន៍កម្ពុជា បានបញ្ជាក់ថា ក្នុងរយៈពេល៨ខែ ឆ្នាំ២០២៥ ការវិនិយោគមកពីប្រទេសចិន ស្ថិតនៅលំដាប់លេខទី១ ដែលបានរួមចំណែកប្រមាណ ៥២.៨២% នៃទុនវិនិយោគសរុបនៅក្នុងប្រទេសកម្ពុជា ចំនួន៧,២០០លានដុល្លារអាមេរិក។

ចំណែកកម្ពុជា ស្ថិតនៅលំដាប់លេខរៀងទី២ ដែលបានរួមចំណែកប្រមាណ៣១.២៦% ក្នុងទំហំទឹកប្រាក់២,២៥០លានដុល្លារ ខណៈសិង្ហបុរី ស្ថិតនៅលេខរៀងទី៣ រួមចំណែក៦.៩៤% ក្នុងទំហំទឹកប្រាក់ ៤៩៩លានដុល្លារ។

បើតាមក្រុមប្រឹក្សាអភិវឌ្ឍន៍កម្ពុជា, ក្នុងរយៈពេល៨ខែ ឆ្នាំ២០២៥នេះ គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចុះបញ្ជីគម្រោងវិនិយោគ ចំនួន៤៩១គម្រោង ក្នុងទំហំទុនវិនិយោគសរុបប្រមាណ ៧.២ប៊ីលានដុល្លារអាម៉េរិក គឺគម្រោងវិនិយោគ មានការកើនឡើងចំនួន ២០៤គម្រោង ស្មើនឹងប្រមាណ ៧១%។

ក្រុមប្រឹក្សាអភិវឌ្ឍន៍កម្ពុជា បានគូសបញ្ជាក់ថា ជាការកត់សម្គាល់ បើប្រៀបធៀបនឹង គម្រោងវិនិយោគដែលត្រូវបាន ចុះបញ្ជីក្នុងឆ្នាំ២០២៤ ដែលមានត្រឹមតែ ៤១៤គម្រោង ក្នុងរយៈពេល៨ខែនេះ គណៈកម្មាធិការវិនិយោគកម្ពុជា បានចុះបញ្ជីគម្រោងវិនិយោគ លើសការចុះបញ្ជី គម្រោងវិនិយោគពេញមួយឆ្នាំ២០២៤ រហូតដល់ទៅ៧៧គម្រោង។

សូមជម្រាបថា រយៈពេល៨ខែ ឆ្នាំ២០២៥ វិស័យហេដ្ឋារចនាសម្ព័ន្ធ និងផ្សេងៗ បានទាក់ទាញការវិនិយោគ ចំនួន ១ ៨០០លានដុល្លារ, វិស័យឧស្សាហកម្មចំនួន ៥ ០០០លានដុល្លារ, វិស័យកសិកម្ម កសិ-ឧស្សាហកម្ម ចំនួន ៣៧០លានដុល្លារ និងវិស័យទេសចរណ៍ចំនួន ១៧៥លានដុល្លារ។

ខេត្ដកំពង់ស្ពឺ ជាខេត្ដទទួលបានគម្រោងច្រើងជាងគេមានចំនួន ១១៧គម្រោង, ខេត្ដស្វាយរៀងចំនួន ១១៣គម្រោង, រាជធានីភ្នំពេញចំនួន ៥៤គម្រោង, ខេត្ដតាកែវចំនួន ៥១គម្រោង, ខេត្ដកោះកុងចំនួន ៤៣គម្រោង និងខេត្ដព្រះសីហនុ ចំនួន ៣៨គម្រោង៕