(ភ្នំពេញ)៖ លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជា បានលើកឡើងពីគំរូនៃការនាំចេញទំនិញរបស់ប្រទេសចិន ដែលកម្ពុជាគួរតែអនុវត្តតាម ដើម្បីជំរុញការនាំចេញបានកាន់តែច្រើន និងជួយដល់សហគ្រាសធុនតូច និងមធ្យម (SME) នៅកម្ពុជាឱ្យកាន់តែរីកចម្រើន។​

លោកបានពន្យល់ថា ​ការនាំចេញទំនិញ​ពីប្រទេសចិនមកកម្ពុជា គឺអាចគេអាចប្រមូលផ្តុំ​ ទំនិញចម្រុះ ដាក់​បញ្ចូលគ្នាតែមួយទូកុងតឺន័រ ​ដឹកនាំចូលកម្ពុជា ហើយយកមកបែកចែកឱ្យម្ចាស់ផ្សេងៗគ្នា​ជាច្រើននាក់ ទៅតាមការបញ្ជាទិញ និងក្រុមហ៊ុនដឹកនាំជញ្ជូន។​ ការធ្វើបានបែបនេះ ​ទំនិញចិន​មានលទ្ធភាពនាំចូលមកកម្ពុជាបានយ៉ាងច្រើន ដែលក្នុងមួយខែ អាចនាំចូលមករាប់ពាន់ទូកុងតឺន័រ។

ប៉ុន្តែយ៉ាងណាមិញ ​កម្ពុជាមិនទាន់អាចធ្វើបានឡើយ។ លោកថា ប្រសិនបើ SME នៅកម្ពុជាអាចប្រមូលនូវទំនិញផ្សេងៗពីម្ចាស់ផ្សេងគ្នា ដាក់តែមួយទូនាំចេញដូចគេ ហើយយកទៅចែកចាយដល់មនុស្សផ្សេងៗគ្នាបានដូចគ្នា អាចនឹងជំរុញឱ្យការនាំចេញប្រសើរឡើង។ បើធ្វើបានមែននោះ ការផលិតរបស់ SME នឹងមានដំណើរការល្អ ដែលរួមចំណែកជួយដល់សេដ្ឋកិច្ចកម្ពុជាកាន់តែរីកចម្រើន និងមានលទ្ធភាពកាន់តែខ្ពស់ក្នុងការផលិតសម្រាប់នាំចេញ និងផ្គត់ផ្គង់ក្នុងស្រុក។

លោកបានសង្កត់ធ្ងន់ថា «ខ្ញុំគិតថា គួរតែគិតចំពោះថាតើកម្ពុជាអាចធ្វើបានដូចគេ យើងអាចបញ្ចេញម្តង១០០ម្ចាស់ មានតាំងពីទំនិញវេចខ្ចប់ផ្សេងៗ ដូចជាម្រេច ស្ក អង្ករ ជាដើម។ ជាធម្មតា បើគាត់អាចធ្វើបាន គាត់មានការទំនាក់ទំនងពីខាងក្រៅ គេចង់ទិញរបស់គាត់ហើយ ប៉ុន្តែគាត់រកមធ្យោបាយក្នុងការនាំចេញអត់រួច ចឹងទាមទារឱ្យមានការគិតគូរទាំងអស់គ្នាថា ធ្វើយ៉ាងណាឱ្យទំនិញកម្ពុជា អាចនាំចេញទៅខាងក្រៅបាន អាហ្នឹងក៏ជាការចាំបាច់មួយដែរ»។

លោកបញ្ជាក់ថា ការមិនទាន់អាចធ្វើបាននេះ ដោយសារតែនិតិវិធីមួយចំនួន ហេតុដូច្នេះហើយ ទាមទារឱ្យមានការជួយគិតគូរ និងជួយសម្រួលដល់ពួកគាត់ ដើម្បីឱ្យពួកគាត់អាចនាំចេញ​បានដូចគេ៕

សូមស្តាប់ការលើកឡើងរបស់លោក ជា ចាន់ដារ៉ា៖