(ភ្នំពេញ)៖ លោក ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យអាកាសចរស៊ីវិល បានស្នើសុំអ្នកដំណើរប្រើប្រាស់ចំណត នៅអាកាសយានដ្ឋានអន្ដរជាតិតេជោ សូមប្រើប្រាស់​ឱ្យបានត្រឹមត្រូវ និងចតតាមការណែនាំ ចៀសវាងការចំណាយខ្ពស់ ខណៈប្រតិបត្តិករព្រលាន នឹងដាក់កម្លាំងជួយសម្រួលចរាចរណ៍បន្ថែមទៀត។

ការស្នើសូមបែបនេះ ធ្វើឡើងក្នុងឱកាសដែល លោក ស៊ីន ចាន់សិរីវុត្ថា អញ្ជើញចូលរួម ក្នុងកិច្ចពិភាក្សាលើប្រធានបទ៖ «យន្តការគ្រប់គ្រងអាកាសយានដ្ឋានកម្ពុជា ប្រកបដោយប្រសិទ្ធភាព» ក្នុងកម្មវិធី FRESH BUSINESS។

លោក ស៊ីន ចាន់សិរីវុត្ថា បានបញ្ជាក់យ៉ាងដូច្នេះថា «តម្លៃចំណតនៅអាកាសយានថ្មីនេះ មានតម្លៃខ្ពស់ជាង នៅអាកាសយានដ្ឋានចាស់បន្តិច អីចឹងយើងត្រូវប្រយ័ត្នប្រយែង ក្នុងការប្រើ​ប្រាស់ បើសិនយើងប្រើប្រាស់ខុសពីការណែនាំ គឺត្រូវបង់ថ្លៃ»។

សូមជម្រាបថា ចំណតយានយន្តគ្រប់ប្រភេទ (កង់ ម៉ូតូ ឡាន) នៅអាកាសយានដ្ឋានអន្តរជាតិតេជោ ត្រូវគិតប្រាក់ទៅតាមម៉ោងកំណត់ រួមមាន៖

ទី១៖ ផ្លូវដាក់អ្នកដំណើរ (Drop‑off lane):
  * សម្រាប់រថយន្តប្រភេទសណ្ដោងរ៉ឺម៉ក, TukTuk និងរថយន្ដប្រភេទ SUV និង MPV អាចឈប់ឡានបាន១០នាទី ដោយមិនគិតថ្លៃ។
  * សម្រាប់រថយន្តប្រភេទឡានក្រុង ឬឡានដឹកទំនិញ អាចឈប់ឡានបាន២០នាទី ដោយមិនគិតថ្លៃ។
  * បើផុតពីរយៈពេលនេះ នឹងចាប់ផ្តើមគិតថ្លៃ «បន្ថែម» រៀងរាល់៥នាទីម្ដង។

ទី២៖ ចំណតធម្មតា (Regular Parking):
  * រយៈពេលពេល៣០នាទី តម្លៃ៤,០០០រៀល សម្រាប់រថយន្តប្រភេទ SUV និង MPV។ ដោយឡែក ឡានក្រុង ឬឡានដឹកទំនិញ តម្លៃ៥,០០០រៀល។
  * បន្ទាប់ពី៣០នាទីដំបូងនេះ ប្រភេទរថយន្តប្រភេទ SUV និង MPV ត្រូវបន្ថែមថ្លៃ២,០០០រៀល រៀងរាល់៣០នាទី និងប្រភេទឡានក្រុង ឬឡានដឹកទំនិញ ត្រូវបន្ថែមថ្លៃ៣,០០០រៀល។

ទី៣៖ ចំណតពិសេស (Premium Parking):
* រថយន្តប្រភេទ SUV និង MPV ចតរយៈពេល៣០នាទី តម្លៃ១២,០០០រៀល។
 * បន្ទាប់ពី៣០នាទីដំបូងនេះ ត្រូវបន្ថែមថ្លៃ៦,០០០រៀល រៀងរាល់៣០នាទី។

ដោយឡែក ចំពោះតម្លៃចំណតម៉ូតូ/កង់៖ រយៈពេលក្រោម១២ម៉ោង តម្លៃ២,០០០រៀល បន្ទាប់ពី១២ម៉ោង បន្ថែម១,០០០រៀល រៀងរាល់១ម៉ោងម្ដង៕

សូមស្តាប់ការលើកឡើងទាំងស្រុង រ​បស់លោក ស៊ីន ចាន់សិរីវុត្ថា៖