(ភ្នំពេញ)៖ មន្រ្តីជាន់ខ្ពស់នៃក្រសួងពាណិជ្ជកម្ម បានបង្ហាញសុទិដ្ឋនិយម ចំពោះការរីកចម្រើនយ៉ាងឆាប់រហ័ស នៃការបើកទីផ្សារថ្មីសម្រាប់ផលិតផលស្វាយចន្ទីកែច្នៃ ជាពិសេសទីផ្សារអឺរ៉ុប និងជប៉ុន។ ប៉ុន្តែអ្វីដែលជាបញ្ហាប្រឈមបច្ចុប្បន្ននេះ ការកែច្នៃគ្រាប់ស្វាយចន្ទីនៅកម្ពុជា នៅមានកម្រិតនៅឡើយ។

លោក សំហេង បូរ៉ា រដ្ឋលេខាធិការក្រសួងពាណិជ្ជកម្ម ដែលជាអ្នកស្វែងរកទីផ្សារថ្មីៗសម្រាប់ផលិតផលកម្ពុជា បានលើកឡើងថា នេះគឺជាឱកាសធំមួយ ដែលសហគ្រិនកម្ពុជា គួរគិតគូរ ដោយមិនគួរមើលរំលងទៅលើការបណ្តាក់ទុនវិនិយោគកែច្នៃស្វាយចន្ទី និងផលិតផលសក្តានុពលផ្សេងទៀត ដើម្បីនាំចេញទៅកាន់ទីផ្សារគោលដៅ។

លោកបានគូសបញ្ជាក់ថា ទីផ្សារសំខាន់សម្រាប់ផលិតផលស្វាយចន្ទី រួមមានអឺរ៉ុប អាមេរិក ចិន និងអូស្រ្តាលីជាដើម។ ហើយបច្ចុប្បន្ននេះឱកាសនៃការចាប់យកទីផ្សារទាំងនេះ ពិតជាខ្ពស់។

លោកបន្ថែមថា «ខ្ញុំគិតថា ឱកាសសម្រាប់ការវិនិយោគ និងបង្កើតការនាំចេញធំទូលាយ។ ខ្ញុំតែងតែនិយាយថា កាលនៅរៀនម្នាក់ៗ ដេកសុបិន្តចង់បង្កើតអាជីវកម្ម ឧទាហរណ៍ដូចជា ហាងកាហ្វេជាដើម។ គ្រាន់តែថា ខ្ញុំគិតឡើងវិញ ធ្វើហាងកាហ្វេមួយអស់ ១០ម៉ឺនដុល្លារ ឬ២០ម៉ឺនដុល្លារ ប៉ុន្តែប្រសិនយើងយកថវិកានេះ មកគិតគូរទៅលើរឿងកែច្នៃ ឬក៏ចូលគ្នា ជំរុញទៅលើការកែច្នៃផលិតផលយើង ទៅលើការងារវេចខ្ចប់ យើងគិតថា វាជាឱកាសមួយសម្រាប់ សហគ្រិនយើងគិតគូរ ព្រោះវាជាឱកាសធំមួយ»។

លោកទទួលស្គាល់ថា បច្ចុប្បន្ននេះ អ្នកកែច្នៃដែលអនុលោមតាមស្តង់ដារទីផ្សារអឺរ៉ុប នៅមានកម្រិតនៅឡើយ។ យ៉ាងនេះក្តី លោកកត់សម្គាល់ថា ក្រុមហ៊ុនដែលកែច្នៃនាំចេញទាំងនេះ បាននឹងកំពុងពង្រីកការផលិតរបស់ខ្លួន រហូត៣ដង លើសពីការកែច្នៃបច្ចុប្បន្ន។

ហើយបន្ថែមពីនេះ វិនិយោគិនពីក្រៅប្រទេស ក៏អារម្មណ៍ចាប់យកឱកាសនៃការវិនិយោគលើកែច្នៃគ្រាប់ស្វាយចន្ទីនៅកម្ពុជា មានច្រើនផងដែរ។

លោកលើកឡើងថា ការជំរុញការវិនិយោគទៅលើកែច្នៃចន្ទី បានរួមចំណែកយ៉ាងសំខាន់ ក្នុងការសម្រេចបានគោលដៅ នៃគោលនយោបាយជាតិស្តីពីស្វាយចន្ទី។

យោងតាម «គោលនយោបាយជាតិស្តីពីស្វាយចន្ទី ឆ្នាំ២០២២-២០២៧» ដែលត្រូវបានក្រសួងពាណិជ្ជកម្មបានដាក់ឱ្យប្រើប្រាស់ជាផ្លូវការ កាលពីឆ្នាំ២០២៣ បានជំរុញការកែច្នៃស្វាយចន្ទីឱ្យបាន២៥% នៅឆ្នាំ ២០២៧ និងយ៉ាងតិច៥០% នៅឆ្នាំ២០៣២។ ប៉ុន្តែឆ្នាំ២០២៥នេះ ការកែច្នៃបានត្រឹមតែ ២២ ៦០០តោន ដែលស្មើប្រហែល២.៤% នៃស្វាយចន្ទីប្រមូលផលបានប្រមាណ ៩៥០០០០តោនប៉ុណ្ណោះ។

យោងតាមរបាយការណ៍របស់ក្រសួងពាណិជ្ជកម្ម ក្នុងរយៈពេល៩ខែ ពីខែមករា ដល់ខែកញ្ញា កម្ពុជាបាននាំចេញគ្រាប់ស្វាយចន្ទីទៅកាន់ទីផ្សារអន្តរជាតិ ក្នុងទំហំទឹកប្រាក់ជាង៨០១លានដុល្លារ កើនឡើង៦០.៥៤%៕

សូមស្តាប់ការពន្យល់បន្ថែមរបស់លោក សំហេង បូរ៉ា ពីឱកាសនៃការវិនិយោគ និងទីផ្សារនាំចេញស្វាយចន្ទី៖