(ភ្នំពេញ)៖ ឧត្ដមសេនីយ៍ទោ រៀល សុភា អនុប្រធាននាយកដ្ឋានប្រឆាំងបទល្មើសបច្ចេកវិទ្យា បានបញ្ជាក់ឲ្យដឹងថា ក្នុងសង្គមកម្ពុជានាពេលបច្ចុប្បន្ន ជនល្មើសបានប្រើប្រាស់មធ្យោបាយ២យ៉ាង ដើម្បីបោកបញ្ឆោតជនរងគ្រោះតាមប្រព័ន្ធ Telegram។

ការបញ្ជាក់ឲ្យដឹងបែបនេះ ធ្វើឡើងក្នុងឱកាសដែល ឧត្ដមសេនីយ៍ទោ រៀល សុភា អញ្ជើញចូលរួមជជែកពីសន្តិសុខសាយប័រ លើប្រធានបទ៖ «ការ​ដោះស្រាយ​បញ្ហានៃ​ការ​កំណើន​ឆរបោក​តាម​ប្រព័ន្ធ​តេឡេក្រាម» ក្នុងកម្មវិធី CYBER SECURITY។

ឧត្ដមសេនីយ៍ទោ រៀល សុភា បានបញ្ជាក់យ៉ាងដូច្នេះថា «ដោយសារការប្រើប្រាស់ Telegram ច្រើនជាងគេ ដែលធ្វើឲ្យឧក្រិដ្ឋជនងាយស្រួល បង្វែរមកជនប្រើប្រាស់ Telegram ជាទិសដៅ​ក្នុងការឆបោក តាមបទល្មើសបច្ចេកវិទ្យា ហើយ២រូបភាព រួមមាន៖ ការក្លែងបន្លំគណនីអ្នកប្រើប្រាស់ និងលួចទៅកាន់កាប់គណនីអ្នកប្រើប្រាស់»។

ទន្ទឹមគ្នានេះ ឧត្ដមសេនីយ៍ទោ រៀល សុភា បានឲ្យដឹងថា នៅក្នុងប្រទេសកម្ពុជា មួយរយៈចុងក្រោយ បណ្ដាញសង្គម Telegram មានការកើនឡើងខ្លាំង ដែលមានចំនួនអ្នកប្រើប្រាស់ រហូតដល់១០លាននាក់ បើធៀបជាមួយនឹងបណ្ដាញសង្គមផ្សេងៗ៕

ខាងក្រោមនេះ ជាវីដេអូនៃការលើកឡើងទាំងស្រុង របស់ឧត្ដមសេនីយ៍ទោ រៀល សុភា៖