(ភ្នំពេញ)៖ លោក ផល សុជាតិ អគ្គលេខាធិការគណៈកម្មការធិការជាតិជំរុញចលនាភូមិ១ផលិតផល១ បានលើកឡើងថា ការដាស់ស្មារតីគាំទ្រផលិតផលខ្មែរ​​ ជាកម្លាំងដ៏មហិមាជំរុញអ្នកផលិត ឱ្យខិតខំផលិតកាន់តែច្រើន ជាមួយនឹងគុណភាពកាន់តែ​ប្រសើរ។

ការលើកឡើងបែបនេះ ធ្វើឡើងក្នុងឱកាសដែល លោក ផល សុជាតិ អញ្ជើញចូលរួម ក្នុងកិច្ចពិភាក្សាលើប្រធានបទ៖ «សារសំខាន់នៃភូមិមួយផលិតមួយ លើ​ខ្សែច្រវាក់ផលិតកម្ម​កម្ពុជា» ក្នុងកម្មវិធី FRESH BUSINESS។

លោក ផល សុជាតិ បានបញ្ជាក់យ៉ាងដូច្នេះថា «ខ្ញុំសង្កេតឃើញថា នៅក្នុងវិបត្ដិចុងក្រោយ នៃភាពតាន់តឹងរវាងកម្ពុជា-ថៃ ដែលកើតចេញពីជម្លោះខ្សែរបន្ទាត់ព្រំដែន ឃើញថា ប្រជាជនខ្មែរមួយរយៈចុងក្រោយ ងាកមកប្រើប្រាស់ផលិតផលក្នុងស្រុកច្រើន»។

បន្ថែមពីនោះទៀត លោក ផល សុជាតិ បានលើកឡើងថា នេះជាការកម្លាំងចលករមួយ នៅក្នុងការទាក់ទាញទឹកចិត្ដអ្នកផលិត ពីព្រោះជាទូទៅអ្នកផលិតព្យាយាមរកឱកាសយ៉ាងណា ដើម្បីអាចទាញយកប្រយោជន៍ផ្នែកសេដ្ឋកិច្ចបាន ហើយបើសិនជាអ្នកផលិតផលឃើញទីផ្សារបែបនេះ នឹងខិតខំក្នុងការផលិត ជាមួយនឹងគុណភាពកាន់តែល្អប្រសើរ។

ខាងក្រោមនេះ ជាវីដេអូនៃការលើកឡើងទាំងស្រុង របស់លោក ផល សុជាតិ៖