(ភ្នំពេញ)៖ ក្រុមហ៊ុនក្រេឌីត យូរ៉ូ ខេមបូឌា ឬហៅថា CBC បានឱ្យដឹងថា ឥណទានមិនដំណើរការ ឬឥណទានសងយឺតលើសពី៩០ថ្ងៃ បានកើនឡើងដល់៥.៦៩% ក្នុងត្រីមាសទី៣នេះ ដោយកើនពី ៥.៤១% ក្នុងត្រីមាសទីពីរ ឆ្នាំ២០២៥។ នេះបើយោងតាមរបាយកាណ៍សន្ទស្សន៍ឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួន ​ក្នុងត្រីមាសទី៣ ឆ្នាំ២០២៥ ចេញផ្សាយ​ដោយCBC ។

តាមរបាយការណ៍នេះបានបញ្ជាក់ថា គុណភាពនៃឥណទានបុគ្គលដែលវាស់វែងដោយអនុបាតនៃឥណទាន សំណងយឺតលើសពី៩០ថ្ងៃ (៩០+DPD) មានធ្លាក់បន្តិចបន្តួច ដោយអនុបាតបានកើនឡើងនៅគ្រប់តំបន់។ករណីនេះ បាន ​បង្ហាញពីលទ្ធភាពនៃការបង់សង និងហានិភ័យនៃការខកខាននៅក្នុងត្រីមាសនេះ។​

ចំនួនសមតុល្យឥណទានមិនដំណើរការលើសពី៩០ថ្ងៃ មានការកើនឡើងជារួម ​៦,៥% នៅទូទាំងតំបន់។ ការកើនឡើង​ច្រើន ងគេនៃចំនួនទឹកប្រាក់ឥណទានសំណងយឺតលើសពី៩០ថ្ងៃគឺនៅតំបន់ខ្ពង់រាបកើនឡើងចំនួន ២៤% តំបន់ឆ្នេរកើនឡើងចំនួន ៩% តំបន់ទន្លេសាប និងតំបន់ទំនាបកើនឡើងចំនួន៦%។

​លោក អឿ សុធារ័ត្ន ប្រធាននាយកប្រតិបត្តិនៃក្រុមហ៊ុនក្រេឌីត យូរ៉ូ ខេមបូឌា ខូ អិលធីឌី បានមានប្រសាសន៍ថា «តម្រូវការពាក្យស្នើ សុំឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួនមានការកើនឡើង ជាមួយនឹងសមិទ្ធផលឥណទានសម្រាប់ប្រើប្រាស់ផ្ទាល់ខ្លួន នៅតែវិជ្ជាមាន ជាមួយនឹងចំនួនគណនី និងសមតុល្យកម្ចីក្នុងត្រីមាសទីបីនេះ បើប្រៀបធៀបនឹងត្រីមាសមុន»។

លោកបានបន្ថែមទៀតថា គុណភាពឥណទានមានការធ្លាក់ចុះតិចតួចបើធៀបនឹងត្រីមាសមុន ជាមួយនឹងការធ្លាក់ចុះនៃអនុបាតនៃគណនីប្រាក់កម្ចីជាមួយនឹង ការសងយឺត ៩០ថ្ងៃហួសកាលបរិច្ឆេទកំណត់ពី ៥,៤១% ក្នុងត្រីមាសទីពីរក្នុងឆ្នាំ២០២៥ មក ៥,៦៩% ក្នុងត្រីមាសនេះ។

បើតាម CBC ចំនួនអតិថិជនដែលមានកម្ចីតែមួយស្ថាប័ននៅតែមានកម្រិតខ្ពស់គឺ ៧១,០១%នៃចំនួនអតិថិជនទាំងអស់។ ចំណែកឯអតិថិជនដែល មានកម្ចីច្រើនស្ថាប័ននៅតែមានកម្រិតទាបដដែលត្រឹម ២៨,៩៩%។

អតិថិជនប្រើប្រាស់ឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួនដែលមានគណនីចំនួន ១ មាន ៦០,៩០%, អ្នកមានគណនី ឥណទានចំនួន២ មានចំនួន ២៦,៧៦% អ្នកដែលមានគណនីឥណទានចំនួន ៣ មានចំនួន ៨,៧៥% ហើយអ្នកដែលមានគណនី ឥណទានច្រើនជាង៣ មានចំនួន ៣,៥៩% នៃចំនួនអតិថិជនទាំងអស់។

គិតត្រឹមខែកញ្ញា ឆ្នាំ២០២៥ ចំនួនគណនីឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួនមានការកើនឡើង ចំនួន ​៥,៧៦% ប្រៀបពីត្រីមាសមុន ដែលធ្វើឱ្យចំនួនគណនីនៅទូទាំងប្រទេសសរុបមានចំនួន ២,៣២លានគណនី។ ក្នុងចំណោមចំនួននេះ ៨៣,១៣% ជាឥណទានសម្រាប់ប្រើប្រាស់ផ្ទាល់ខ្លួន ខណៈចំណែកតូចជាងគេគឺកម្ចីប័ណ្ណឥណទាន ៧,៩១% និងកម្ចីអចលនទ្រព្យមាន ៨,៩៦%។ កំណើននេះត្រូវបានគេមើលឃើញនៅក្នុងគ្រប់តំបន់​នៅកម្ពុជា។

គិតត្រឹមពីខែកញ្ញា ឆ្នាំ២០២៥ សមតុល្យឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួន ក៏បានបន្តកើនឡើងជាលំដាប់ក្នុងកម្រិត ​១,២២% ។ នៅចុងត្រីមាសនេះ សមតុល្យឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួនមានចំនួន ១៦,១៧ ប៊ីលានដុល្លារអាមេរិក​៕