(ភ្នំពេញ)៖ ធនាគារជាតិនៃកម្ពុជា បានចុះហត្ថលេខាលើអនុស្សរណៈយោគយល់គ្នា ជាមួយក្រុមហ៊ុន TenPay Global បង្កើតក្របខ័ណ្ឌកិច្ចសហប្រតិបត្តិការ រវាងធនាគារជាតិនៃកម្ពុជា និង ក្រុមហ៊ុន TenPay Global ដើម្បីជំរុញអន្តរប្រតិបត្តិការ រវាងប្រព័ន្ធបាគង (KHQR) របស់ប្រទេសកម្ពុជា និងបណ្តាញទូទាត់ចល័ត Weixin Pay របស់ប្រទេសចិន សំដៅលើកកម្ពស់ការទូទាត់ឌីជីថល រវាងប្រទេសកម្ពុជា និងប្រទេសចិន ឱ្យកាន់តែទូលំទូលាយ និងឆាប់រហ័ស។

ការចុះអនុស្សរណៈគ្នានេះធ្វើឡើងនៅថ្ងៃទី១២ ខែវិច្ឆិកា ឆ្នាំ២០២៥ ស្តីពី «កិច្ចសហប្រតិបត្តិការក្នុងការអភិវឌ្ឍវិស័យហិរញ្ញវត្ថុ ប្រកបដោយសក្តានុពល» ក្រោមការចូលរួមរបស់លោកស្រីបណ្ឌិត ជា សិរី ទេសាភិបាលធនាគារជាតិនៃកម្ពុជា និងលោក Daniel Hong អនុប្រធាន ក្រុមហ៊ុន Tencent Financial Technology ដែលជាក្រុមហ៊ុនមេរបស់ក្រុមហ៊ុន TenPay Global ក្នុងព្រឹត្តិការណ៍ បច្ចេកវិទ្យាហិរញ្ញវត្ថុសិង្ហបុរី ឆ្នាំ២០២៥ នៅប្រទេសសិង្ហបុរី។

អនុស្សរណៈយោគយល់នេះ មានគោលបំណងបង្កើតក្របខ័ណ្ឌកិច្ចសហប្រតិបត្តិការរវាងធនាគារជាតិនៃកម្ពុជា និងក្រុមហ៊ុន TenPay Global ដើម្បីធ្វើការរួមគ្នាក្នុងការជំរុញអន្តរប្រតិបត្តិការ រវាងប្រព័ន្ធបាគង (KHQR) របស់ប្រទេសកម្ពុជា និងបណ្តាញទូទាត់ចល័ត Weixin Pay របស់ប្រទេសចិន សំដៅលើកកម្ពស់ការទូទាត់ឌីជីថល រវាងប្រទេសកម្ពុជា និងប្រទេសចិន ឱ្យកាន់តែទូលំទូលាយ និងឆាប់រហ័ស។

តាមរយៈកិច្ចសហប្រតិបត្តិការនេះ ភាគីទាំងពីរនឹងសហការគ្នាអភិវឌ្ឍវិស័យហិរញ្ញវត្ថុ ប្រកបដោយសក្តានុពល ព្រមទាំងជំរុញសមាហរណកម្ម ការទូទាត់ឆ្លងដែន និងផ្ទេរប្រាក់ឆ្លងដែន (ការផ្ទេរប្រាក់ចេញ និងការផ្ទេរប្រាក់ចូល) រវាងប្រទេសទាំងពីរ។

លោកកស្រីបណ្ឌិត ជា សិរី ទេសាភិបាលបានថ្លែងឲ្យដឹងថា «កិច្ចសហប្រតិបត្តិការរវាងធនាគារជាតិនៃកម្ពុជា និង ក្រុមហ៊ុន TenPay Global ជាជំហានឆ្ពោះទៅមុខដ៏ សំខាន់មួយក្នុងការលើកកម្ពស់ ការតភ្ជាប់ការទូទាត់ឆ្លងដែន និងជំរុញនវានុវត្តន៍ហិរញ្ញវត្ថុ។ ជាមួយគ្នានេះ កិច្ចសហប្រតិបត្តិការនេះ ក៏នឹងរួមចំណែកដល់ការជំរុញបរិយាបន្នហិរញ្ញវត្ថុ ការបង្កើនប្រសិទ្ធភាពនៃការទូទាត់ ការលើកកម្ពស់ការប្រើប្រាស់រូបិយវត្ថុក្នុងស្រុក និងការគាំទ្រដល់ការផ្លាស់ប្តូរឌីជីថលជាបន្តបន្ទាប់ ព្រមទាំងការជំរុញការផ្លាស់ប្តូរសេដ្ឋកិច្ច រវាងប្រទេសកម្ពុជា និងប្រទេសចិន តាមរយៈការប្រើប្រាស់បច្ចេកវិទ្យាទទាត់ហិរញ្ញវត្ថុកាន់តែងាយស្រួល សុវត្ថិភាព និងប្រសិទ្ធភាព»។

លោក Daniel Hong បានថ្លែងឲ្យដឹងថា «ការបោះជំហានទៅរកការធ្វើប្រតិបត្តិការទូទាត់ឆ្លងដែន អាចប្រព្រឹត្តិទៅបានដោយសារការរីកចម្រើននៃ ច្ចសហប្រតិបត្តិការប្រកបដោយនិរន្តរភាព។ តាមរយៈកិច្ចសហប្រតិបត្តិការរួមគ្នាជាមួយ ដៃគូជាសកល ពួកយើងបានផ្តល់លទ្ធភាពឱ្យអ្នកប្រើប្រាស់អាចប្រើកាបូបឌីជីថល (e-Wallet) បាននៅគ្រប់ ទីកន្លែងក្នុងពិភពលោក ប្រកបដោយភាពងាយស្រួល សុវត្ថិភាព និងមានទំនុកចិត្ត»។

លោកបានបន្ដថា ការណ៍នេះនឹងជំរុញ ឱ្យមានប្រព័ន្ធអេកូឡូស៊ីទូទាត់ដែលអាចឱ្យជឿទុកចិត្តបាន និងអាចតភ្ជាប់គ្នា ដើម្បីជាអត្ថប្រយោជន៍សម្រាប់អ្នកប្រើប្រាស់ និងកាលានុវត្តន៍ភាពបន្ថែមសម្រាប់ពាណិជ្ជកម្មសកល៕