(ភ្នំពេញ)៖ លោកបណ្ឌិត ឆេង គឹមឡុង ប្រធានវិទ្យាស្ថានចក្ខុវិស័យអាស៊ី (AVI) បានស្នើឱ្យរាជរដ្ឋាភិបាល និងវិស័យជនរបស់កម្ពុជា ចាប់យកឱកាសពេជ្រ ដែលកើតឡើងពីស្មារតីជាតិនិយមរបស់ជនជាតិខ្មែរ ជំរុញឱ្យមានការផលិតផលិតផលសម្រាប់ប្រើប្រាស់ក្នុងស្រុក ជំនួសការនាំចូលពីប្រទេសជិតខាង។

ថ្លែងក្នុងកិច្ចពិភាក្សាក្នុងកម្មវិធី FRESH BUSINESS លើប្រធានបទ៖ «បញ្ហា​របស់ថៃ​បច្ចុប្បន្ន​ បង្ហាញ​ឱកាស​អ្វី​ខ្លះ​សម្រាប់​សេដ្ឋកិច្ច​កម្ពុជា?» លោកយល់ឃើញថា ឱកាសបែបនេះមិនងាយកើតឡើងនោះទេ ១០០ឆ្នាំ ទើបកម្រើកឡើង។

លោកបណ្ឌិត ឆេង គឹមឡុង បានថ្លែងឲ្យដឹងថា «ជុំវិញជម្លោះខ្មែរ-ថៃ បើមើលដោយឡែកអាចហៅបានថា ជាឱកាសមាសពេជ្រ ដូច្នេះទាំងវិស័យរដ្ឋ និងឯកជន គួរចាប់យកឱកាសនេះឲ្យបាន ចំពោះ​ឱកាសនេះសឹងតែមិនអាចកើតមានឡើងស្ទើរតែ១០០ ឬសឹងតែមិនដែលកើតមានលើបណ្ដាប្រទេសទាំងអស់»។

លោកបណ្ឌិត ឆេង គឹមឡុង បានបន្ថែមថា នៅពេលមានបញ្ហាប្រឈមទាំងនេះ យើងអាចដកបទពិសោធន៍បានអំពីប្រទេសកូរ៉េខាងត្បូង ដែលក្រោយពីសង្គ្រាមកូរ៉េទទួលបាន​ឯករាជ្យ និងចាប់ផ្ដើមស្ដារ និងអភិវឌ្ឍន៍ប្រទេសឡើងវិញ។ រំលឹកពេលនោះកូរ៉េខាងត្បូងចាប់ផ្ដើមធ្វើពហិការ ទំនិញពីបណ្ដាប្រទេសមួយចំនួនដែលខ្លួនចាត់ទុកថា ជាអមិត្តរបស់កូរ៉េខាងត្បូង និងបានចាប់ផ្ដើមពង្រឹងនូវសមត្ថភាពភាពរស់ដោយខ្លួនឯង តាមរយៈការបណ្ដុះបណ្ដាលធនធានមនុស្ស។

លោកបណ្ឌិត ឆេង គឹមឡុង បានបញ្ជាក់ថា ចំពោះផលប្រយោជន៍សង្គមរបស់កម្ពុជា ដែលពលករកម្ពុជាត្រឡប់មកពីប្រទេសថៃវិញ សរុបប្រមាណ ១លាននាក់ ដូច្នេះកម្លាំងស្នូលដែលស្រូបចូលសេដ្ឋកិច្ចកម្ពុជា បានមានប្រមាណ ៨០ម៉ឺននាក់ នេះហៅថាកម្លាំងស្នូលបន្ថែម ចំពោះកម្លាំងស្នូលបន្ថែមនេះទាមទារការគាំទ្របណ្ដុះបណ្ដាល នូវជំនាញវិជ្ជាជីវៈសម័យថ្មីផងដែរ៕

សូមស្តាប់ការលើកឡើងរបស់បណ្ឌិត ឆេង គឹមឡុង៖