(ភ្នំពេញ)៖ លោកបណ្ឌិត ឆេង គឹមឡុង ប្រធានវិទ្យាស្ថានចក្ខុអាស៊ី (AVI) បានកត់សម្គាល់ថា វិស័យជលផល និងវារីវប្បកម្ម គឺជាអនុវិស័យដែលផ្តល់នូវសក្តានុពលបន្ថែម និងអាចក្លាយជាអនុវិស័យទាក់ទាញមួយ ដែលវិនិយោគិនមិនគួរមើលរំលងក្នុងវិនិយោគលើការផលិត និងកែច្នៃ សម្រាប់ផ្គត់ផ្គង់ក្នុងស្រុក។

លោកបន្ថែមថា កម្ពុជាមានសមុទ្រស្រាប់ មានអាកាសធាតុអំណោយផលល្អ និងមានដីគ្រប់គ្រាន់សម្រាប់ការចិញ្ចឹម ព្រមទាំងមានកម្លាំងពលកម្មដែលជាពលករត្រឡប់មកពីថៃ ។ដូច្នេះវិនិយោគិនទាំងក្នុងនិងក្រៅស្រុក គួរតែសម្លឹង វិនិយោគក្នុងវិស័យនេះ ដែលអាចជំរុញឱ្យកម្ពុជាក្លាយជាប្រទេសទី៣ក្នុងតំបន់អាស៊ាន បន្ទាប់ពីឥណ្ឌូនេស៊ី និងវៀតណាម ដែលផលិត កែច្នៃ និងនាំចេញផលិតផលវារីវប្បកម្ម ច្រើនជាងគេបំផុតនៅក្នុងតំបន់អាស៊ាន។

លោកបន្ថែមថា បច្ចុប្បន្ននេះ ផលិតផលជលផល និងវារីវប្បកម្មដែលមានក្នុងស្រុកមានប្រមាណតែជាង២០ប៉ុណ្ណោះ ក្រៅពីនេះបាននាំចូលពីក្រៅប្រទេសប្រមាណ៧០%។ ហេតុនេះហើយវិនិយោគទៅលើវិ័យនេះ នឹងអាចជំនួសការនាំចូលរហូតដល់៧០% ។

កម្ពុជាមានសក្តានុពលស្រាប់ ក្នុងការផលិត និងកែច្នៃក្នុងវិស័យកសិកម្ម ទំនិញកសិកម្មមានច្រើនសំបូរបែប ប៉ុន្តែហាក់មិនទាន់មានការកែច្នៃខ្លាំងនៅឡើយទេ ដោយសារបច្ចេកវិទ្យា និងសមត្ថភាពកែច្នៃនៅមានកម្រិត។

បន្ថែមពីនេះលោកកត់សម្គាល់ថា ទំនិញកសិកម្មមួយចំនួនដូចជា ស្វាយចន្ទី ដំឡូងមី និងផលិតផលជលផលក៏ សុទ្ធតែជាទំនិញដែលមានសក្តានុពលក្នុងការកែច្នៃ ដែលនឹងផ្តល់ចំណូល និងការងារយ៉ាងច្រើនសម្រាប់ប្រជាពលរដ្ឋខ្មែរផងដែរ៕

សូមស្តាប់ការពន្យល់បន្ថែមរបស់ លោកបណ្ឌិត ឆេង គឹមឡុង៖