(ភ្នំពេញ)៖ ថ្លែងប្រាប់បណ្ដាញព័ត៌មាន Fresh News នៅថ្ងៃទី០១ ខែធ្នូ ឆ្នាំ២០២៥នេះ លោក ស៊ីន ចានសិរីវុត្ថា រដ្ឋលេខាធិការ និងជាអ្នកនាំពាក្យនៃរដ្ឋលេខាធិការដ្ឋាន អាកាសចរស៊ីវិល បានបកស្រាយបញ្ហាកង្វល់សុវត្ថិភាព ដែលពាក់ព័ន្ធនឹងយន្តហោះ Airbus ក្នុងប្រតិបត្តិការហោះហើរ របស់ក្រុមហ៊ុនអាកាសចរណ៍ ដែលចុះបញ្ជីនៅកម្ពុជា។

លោក ស៊ីន ចានសិរីវុត្ថា បានបញ្ជាក់ថា បច្ចុប្បន្នកម្ពុជា មានយន្ដហោះ Airbus ចុះបញ្ជីសរុបប្រមាណ ចំនួន១៥គ្រឿង ដែលកំពុងប្រើប្រាស់ ក្នុងប្រតិបត្តិការហោះហើរ របស់ក្រុមហ៊ុនអាកាសចរណ៍។

លោកបានឲ្យដឹងថា បន្ទាប់ពីទទួលបានសេចក្តីប្រកាសអាសន្ន (Emergency Airworthiness Directive – EAD) ពីអាជ្ញាធរ​អាកាស​ចរណ៍​សហគមន៍​អឺរ៉ុប (EASA) ស្តីពីកង្វល់ដល់លទ្ធភាព ហោះហើររបស់យន្តហោះ Airbus មួយចំនួនមក រដ្ឋលេខាធិការដ្ឋានអាកាសចរណ៍ស៊ីវិល (SSCA) បានចាត់ការបន្ទាន់ក្នុងការបញ្ជូន និងផ្សព្វផ្សាយសេចក្ដីជូនដំណឹងនេះ ទៅកាន់គ្រប់ក្រុមហ៊ុនអាកាសចរណ៍ ដែលមានយន្តហោះ Airbus ចុះបញ្ជីនៅកម្ពុជា ដើម្បីអនុវត្តវិធានការទាន់ពេលវេលា។

បន្ថែមពីនេះអ្នកនាំពាក្យរូបនេះបញ្ជាក់ទៀតថា ក្រុមហ៊ុនអាកាសចរណ៍នីមួយៗ (Operators) បានអនុវត្តការវាយតម្លៃ និងអនុវត្តវិធានការបច្ចេកទេស ដោយឯករាជ្យលើយន្តហោះរបស់ខ្លួន ទៅតាមភាពលំដាប់លំដោយដូចជា៖ ការវាយតម្លៃសុវត្ថិភាព (Safety Assessment), ការត្រួតពិនិត្យបច្ចេកទេសជាក់លាក់ (Technical Inspection), ការវាយតម្លៃហានិភ័យ និងផលប៉ះពាល់ (Risk Impact Assessment) និងការអនុវត្តវិធានការអនុលោមភាព (Compliance Measures) ដោយផ្អែកលើតម្រូវការ EAD របស់ EASA។

លោក ស៊ីន ចានសិរីវុត្ថា បានគូសបញ្ជាក់ថា ក្នុងចំណោមយន្តហោះចុះបញ្ជីសរុប ១៥គ្រឿង មានតែ៣គ្រឿងប៉ុណ្ណោះ ដែលត្រូវបានកំណត់ថា ទទួលរងផលប៉ះពាល់បន្ទាប់បន្សំ តាមប្រកាស EAD។ ក្រុមហ៊ុនប្រតិបត្តិដែលពាក់ព័ន្ធនោះ បានអនុវត្តវិធានការបច្ចេកទេសចប់សព្វគ្រប់រួចហើយ ដោយមានការត្រួតពិនិត្យ និងបញ្ជាក់ពីអ្នកបច្ចេកជំនាញរបស់ SSCA ត្រឹមត្រូវ។

លោកបានសង្កត់ធ្ងន់ថា «គ្មានផលប៉ះពាល់ ឬការរំខានណាមួយ លើប្រតិបត្តិការហោះហើរប្រចាំថ្ងៃ ពាក់ព័ន្ធទៅនឹងបញ្ហាសុវត្ថិភាពឡើយ។ ក្រុមហ៊ុនអាកាសចរណ៍ទាំងអស់ នៅតែបន្តប្រតិបត្តិការ តាមស្ដង់ដារសុវត្ថិភាពរបស់ ICAO, EASA និងក្រោមការត្រួតពិនិត្យរបស់ SSCA ដោយសុវត្ថិភាពជាអាទិភាពចម្បង»៕