អ្នកនាំពាក្យ៖ ការតភ្ជាប់ជើងហោះហើររវាងកម្ពុជា និងថៃ នៅដំណើរការធម្មតា ប៉ុន្តែជើងហោះហើរខ្លះត្រូវបានលុបចោល ដោយសារគ្មានអ្នកដំណើរ (Video inside)
06-01-2026 11:48
(ភ្នំពេញ)៖ អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល បានឱ្យដឹងនៅថ្ងៃទី៦ ខែមករា ឆ្នាំ២០២៦នេះថា ការតភ្ជាប់ជើងហោះហើររវាងកម្ពុជា និងថៃ នៅដំណើរការធម្មតា តែយ៉ាងណាជើងហោះហើរខ្លះ ត្រូវបានលុបចោល ដោយកត្តាទីផ្សារ។
ថ្លែងប្រាប់បណ្តាញព័ត៌មាន Fresh News លោក ស៊ីន ចាន់សេរីវុត្ថា រដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល បានឱ្យដឹងថា គិតមកទល់ពេលនេះ ជើងហោះហើរ រវាងបាងកក-ភ្នំពេញ, បាងកក-សៀមរាប, ភូកេត-សៀមរាប នៅរក្សាប្រក្រតីភាពដដែល។ ប៉ុន្តែយ៉ាងនេះក្តី ជើងហោះហើរមួយចំនួនបានលុបចោល ដោយកត្តាខ្សត់ភ្ញៀវ មិនសូវមានអ្នកធ្វើដំណើរចេញចូលដូចមុន។
បើតាមអ្នកនាំពាក្យរូបនេះ ជាធម្មតាជើងហោះហើររវាងបាងកក-សៀមរាប សរុបមានចំនួនមាន៦៣ជើង ក្នុងមួយសប្តាហ៍ ក្នុងនោះសៀមរាប-សុវណ្ណភូមិ ៣៥ជើង សៀមរាប-ដនមឿង ២១ជើង និងសៀមរាប-ភូកេត ៧ជើង ក្នុងមួយសប្តាហ៍។ ដោយឡែកជើងហោះហើររវាងបាងកក-ភ្នំពេញ មានចំនួន ៧៧ជើង ដោយក្រុមហ៊ុនអាកាសចរណ៍ថៃចំនួន ៥ក្រុមហ៊ុន បានហោះហើរមកកាន់ព្រលានយន្តហោះអន្តរជាតិតេជោចំនួន ៥៣ជើង។ ចំណែកក្រុមហ៊ុនកម្ពុជាចំនួន ២បានហោះហើរចំនួន ២៤ជើងក្នុងមួយសប្តាហ៍។
លោកបានបញ្ជាក់ផងដែរថា ដែនអាកាសដែលបានបិទ កាលពីប៉ះទង្គិចគ្នាលើកដំបូង កាលពីខែកក្កដា គឺនៅបន្តបិទដដែលរហូតមកដល់ពេលនេះ រហូតទាល់តែមានការជូនដំណឹងជាថ្មី។ ទន្ទឹមគ្នានេះ រដ្ឋលេខាធិការដ្ឋានអាកាសចរណ៍ស៊ីវិល មិនអនុញ្ញាតឱ្យមានដ្រូន ឬយន្តហោះគ្មានមនុស្សបើក បើកនៅតាមអាកាសយានដ្ឋានរបស់កម្ពុជាឡើយ៕
