(​ភ្នំពេញ)៖ អ្នកតាមដានទីផ្សារហាងឆេងមាស នៅលើទីផ្សារអន្តរជាតិ និងទីផ្សារកម្ពុជា បានឱ្យដឹងថា នៅថ្ងៃទី៦ ខែមករា ឆ្នាំ២០២៦នេះ តម្លៃមាសបានហក់ឡើងដល់ ៤ ៤៦៨ ដុល្លារក្នុងមួយអោន នៅលើទីផ្សារអន្តរជាតិ​ ដែលស្មើនឹងប្រមាណ៥ ៣៨៣ដុល្លារ ក្នុងមួយតម្លឹងនៅលើទីផ្សារកម្ពុជា។

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន PP Link Securities ប្រាប់បណ្តាញព័ត៌មាន Fresh news នៅថ្ងៃទី៦ ខែមករានេះថា តម្លៃហាងមាសហក់ឡើងថ្លៃ​តាំងពីថ្ងៃចន្ទម្សិលមិញ​ ដោយសារការចាប់ខ្លួនមេដឹកនាំវ៉េណេស៊ុយអេឡា លោក នីកូឡាស់ ម៉ាឌូរ៉ូ ដោយកងកម្លាំងអាមេរិក។ ការចាប់ខ្លួននេះ បានធ្វើឱ្យប៉ះពាល់ដល់វិនិយោគិនធំជាច្រើន នៅក្នុងប្រទេសវ៉េណេស៊ុយអេឡា ទាំងវិនិយោគិនក្នុងស្រុក និងវិនិយោគិនបរទេស ដែលនាំឱ្យប៉ះពាល់ទៅដល់សេដ្ឋកិច្ចវ៉េណេស៊ុយអេឡាទាំងមូល។

លោកបានបន្តថា ផលប៉ះពាល់សេដ្ឋកិច្ចនេះ វាបាន​ជះឥទ្ធិពលដល់តម្លៃហាងឆេងមាសឱ្យកើនឡើង ដោយសារវាជាចំណែកមួយនៃសេដ្ឋកិច្ចពិភពលោក និងធ្វើឱ្យប៉ះពាល់ដល់តម្លៃប្រាក់ដុល្លារអាមេរិកផងដែរ។

លោកបន្ថែមថា តម្លៃហាងឆេងមាសអាចនឹងនៅតែបន្តកើនឡើង ដែលអាចនឹងកើនឡើងដល់ ៤ ៥២០ដុល្លារក្នុងមួយអោន ឬប្រមាណ៥ ៥៤៥ដុល្លារ ក្នុងមួយតម្លឹង។ នៅថ្ងៃទី៦ ខែមករា ឆ្នាំ២០២៦នេះ នៅតាមបណ្តាហាងលក់មាសខ្លះនៅកម្ពុជា បានលក់ក្នុងតម្លៃប្រមាណ៥៤០០ក្នុងមួយតម្លើង សម្រាប់មាសគីឡូ៕