(តាកែវ)៖ ក្រសួងកសិកម្ម តាមរយៈគម្រោងពិពិធកសិកម្មកម្ពុជា បានផ្តល់ជំនួយឥតសំណងចំនួន៤០%សម្រាប់ការវិនិយោគលើហេដ្ឋារចនាសម្ព័ន្ធផលិតកម្ម របស់សហគមន៍កសិកម្មទំនើបមាន់ស្រែដំបូងគេ ដែលត្រូវបានបង្កើតឡើងនៅក្នុងខេត្តតាកែវ។​​

«សហគមន៍កសិកម្មទំនើបមាន់ស្រែបន្លែសុវត្ថិភាពអូរផុត» ស្ថិតក្នុងឃុំអង្គតាសោម ស្រុកត្រាំកក់ ខេត្តតាកែវ មានសមាជិកចំនួន១២០គ្រួសារ ដោយគ្រោងផលិតបន្លែសុវត្ថិភាព ក្នុងផ្ទះសំណាញ់ចំនួន២០០ខ្នងនិងមាន់ស្រែចំនួន៤០ទ្រុង។

​លោក ឃឹម ហ្វីណង់ អ្នកនាំពាក្យក្រសួងកសិកម្មបានឱ្យដឹងថា «សហគមន៍កសិកម្មទំនើបមាន់ស្រែបន្លែសុវត្ថិភាពអូរផុត» គឺជាសហគមន៍កសិកម្មដែលទើបបង្កើតថ្មី និងជាសហគមន៍កសិកម្មដំបូងបំផុតដែលមានការបូកបញ្ចូលនូវការដាំដំណាំ និងចិញ្ចឹមសត្វ។ សហគមន៍នេះ មាន​ដាំបន្លែសុវត្ថិភាព និងចិញ្ចឹមមាន់ស្រែ ដោយមានកិច្ចសន្យា​កសិកម្ម។

លោកបន្ថែម ទុនប្រមាណ៦០%ទៀត ក្រសួងនឹងជួយសម្របសម្រួល ដើម្បីទទួលបានកម្ចីដើមទុន​ក្នុងអត្រាការប្រាក់ទាប និងផ្តល់ការគាំទ្របច្ចេកទេសដល់សហគមន៍ផងដែរ៕