(ភ្នំពេញ)៖ លោកស្រី ចម និម្មល រដ្ឋមន្រ្តីក្រសួងពាណិជ្ជកម្ម បានចាត់ផ្សារ RCEP ជាទីផ្សារនាំចេញមួយដ៏សំខាន់របស់កម្ពុជា ដែលមានការរួមចំណែក ៦១.៦៨% នៃទំហំពាណិជ្ជកម្មរបស់កម្ពុជាទាំងមូល ខណៈឆ្នាំ២០២៥ កម្ពុជាបាននាំទៅកាន់ទីផ្សារនេះ មានតម្លៃជិត ១០ពាន់លានដុល្លារ។

លោកស្រី ចម និម្មលគូសបញ្ជាក់បែបនេះ ធ្វើឡើងក្នុងពិធីបិទសន្និបាទបូកសរុបលទ្ធផលការងារពាណិជ្ជកម្មឆ្នាំ២០២៥ និងលើកទិសដៅការងារពាណិជ្ជកម្ម ឆ្នាំ២០២៦ នៅទីស្តីការក្រសួងពាណិជ្ជកម្ម នារសៀលថ្ងៃទី៩ ខែមករា ឆ្នាំ២០២៦នេះ។

លោកស្រីបានឱ្យដឹងថា ក្នុងឆ្នាំ២០២៥ កម្ពុជាបានពង្រីកទំហំពាណិជ្ជកម្ម ជាមួយប្រទេសដែលជាសមាជិកនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ដោយសម្រេចបាននូវទំហំពាណិជ្ជកម្ម មានតម្លៃប្រមាណ៤០.២០ពាន់លានដុល្លារ ក្នុងនោះការនាំចេញរបស់កម្ពុជា មានទំហំ៩.៨០ពាន់លានដុល្លារ កើនឡើង៧.០១%។

លោកស្រីបន្ថែមថា «ក្នុងឆ្នាំ២០២៥នេះ ពាណិជ្ជកម្មកម្ពុជានៅតែរក្សាបាននូវ សន្ទុះរឹងមាំ បើទោះបីជាសេដ្ឋកិច្ចសកលលោកប្រឈមនឹងភាពមិនប្រាកដប្រជា ដែលបង្កឡើងដោយភាពប្រទាញប្រទង់ផ្នែកភូមិសាស្រ្តនយោបាយ ការបែកខ្ញែកនៃពាណិជ្ជកម្មសាកល និងការផ្ទុះឡើងនូវជម្លោះព្រំដែន។ ផ្សាទីរ RCEP ជាទីផ្សារដ៏សំខាន់ ដែលមានការរួមចំណែក៦១.៦៨% នៃទំហំពាណិជ្ជកម្មរបស់កម្ពុជាទាំងមូល»។

ទន្ទឹមគ្នានេះលោកស្រីបានបញ្ជាក់ថា ក្រសួងពាណិជ្ជកម្ម បានបន្តខិតខំនិងដឹកនាំចូលរួមយ៉ាងសកម្មជាមួយស្ថាប័នពាក់ព័ន្ធ ក្នុងការធ្វើសមាហរណកម្មសេដ្ឋកិច្ចទៅក្នុងតំបន់ និងសាកលលោក និងធ្វើនូវពិពិធកម្មទីផ្សារនាំចេញ នាំចូល។ ព្រមទាំងបន្តអនុវត្តនូវអភិក្រម ពង្រឹងទីផ្សាចាស់ ពង្រីកទីផ្សារថ្មី ដោយប្រកាន់ភ្ជាប់នូវការពង្រឹងពហុភាគី ឈរលើគោលការណ៍ច្បាប់ និងទីផ្សារបើកចំហរដែលផ្តល់នូវភាពប្រកដប្រជា។

យោងតាមរបាយការណ៍ក្រសួងពាណិជ្ជកម្ម ក្នុងឆ្នាំ២០២៥ កម្ពុជាសម្រេចបានទំហំពាណិជ្ជកម្មសរុបចំនួន ៦៥.២៤ពាន់លានដុល្លារអាម៉េរិក កើនឡើងក្នុងរង្វង់ ១៨% ធៀបនឹងឆ្នាំ២០២៤។ ក្នុងនោះ ការនាំចេញសម្រេចបានទឹកប្រាក់ចំនួន ៣១.២៨ ពាន់លានដុល្លារអាម៉េរិក កើនឡើងប្រមាណ ១៧%៕