(ភ្នំពេញ)៖ លោក Casey Barnett ប្រធានសភាពាណិជ្ជកម្មអាមេរិកប្រចាំកម្ពុជា បានឱ្យដឹងថា បន្ទាប់ពីកម្ពុជា-អាមេរិក អនុវត្តពន្ធបដិកាថ្មី ដោយកម្ពុជាយកពន្ធសូន្យ ចំពោះ​ទំនិញអាមេរិក ដែលនាំចូ​លកម្ពុជា បានធ្វើឱ្យការនាំចេញរបស់សហរដ្ឋអាមេរិក​មកកម្ពុជា ​កើនឡើង៩៦% និងបានកើនឡើងផលិតផលចំនួន ៥៤ប្រភេទ។

​លោក Casey Barnett​ លើកឡើងថា នៅខែសីហា ឆ្នាំ២០២៥ កម្ពុជាបានផ្តល់សិទ្ធិឱ្យសហរដ្ឋអាមេរិកនាំចេញទំនិញផលិត នៅសហរដ្ឋអាមេរិកទាំងអស់ចូលកម្ពុជា ដោយមិនបង់ពន្ធគយ (duty‑free) ដែលជាការអនុគ្រោះមួយ ដើម្បីកាត់បន្ថយពន្ធគយ «ទៅវិញទៅមក» ​ របស់សហរដ្ឋអាមេរិក។ ដោយសារតែការផ្លាស់ប្តូរនេះ ការនាំចេញរបស់សហរដ្ឋអាមេរិកមកកម្ពុជា បានកើនឡើង ៩៦% បើប្រៀបធៀបនឹងឆ្នាំមុន សម្រាប់រយៈពេលពីខែសីហាដល់ខែធ្នូ។

លោកបន្ថែមថា «ការនាំចេញរបស់សហរដ្ឋអាមេរិកបានកើនឡើងក្នុង៥៤ ចំណោម ៨៥ ប្រភេទផលិតផល។ អ្វីដែលគួរឱ្យកត់សម្គាល់ជាងគេគឺការកើនឡើង ៩ដងនៃផលិតផលប្រេងឥន្ធនៈ ដែលបានចម្រាញ់។ ការកើនឡើងនេះ ក៏ត្រូវបានជំរុញដោយតម្រូវការបំបែកហានិភ័យ និងបង្វែរចេញពីផលិតផលប្រេងឥន្ធនៈពីថៃ ដោយសារការឈ្លានពានរបស់ថៃលើកម្ពុជា ដែលកំពុងបន្ត»។

​ជាមួយគ្នានេះ ការនាំចូលផលិតផលទឹកដោះគោមួយចំនួន បានប្តូរពីថៃទៅសហរដ្ឋអាមេរិក។ ការកើនឡើងដែលគួរឱ្យកត់សម្គាល់ផ្សេងទៀត រួមមាន ការនាំចូលយានយន្តពីសហរដ្ឋអាមេរិកកើនឡើង ប្លាស្ទិក ក្រដាស ជាតិសរសៃសម្រាប់វាយនភណ្ឌ ផលិតផលអាហារ និងម៉ាស៊ីន/គ្រឿងចក្រ។

លោកបានគូសបញ្ជាក់ថា កិច្ចព្រមព្រៀងដែលបានចរចានេះមានភាពលំអៀង និងអនុគ្រោះទៅខាងសហរដ្ឋអាមេរិកជាង ប៉ុន្តែជាក់ស្តែង នៅឆ្នាំ២០២៤ កម្ពុជាបាននាំចេញទំនិញទៅសហរដ្ឋអាមេរិកចំនួន ១២.៧ ពាន់លានដុល្លារ ខណៈដែលនាំចូលត្រឹមតែ ៣០០ លានដុល្លារ ប៉ុណ្ណោះ។ ផ្នែកមួយនៃភាពខុសគ្នានេះ កើតឡើងពីការខ្វះអំណាចទិញ ​របស់ប្រជាជនកម្ពុជា ដើម្បីទិញទំនិញអាមេរិក។ ប៉ុន្តែផ្នែកមួយទៀតក៏បណ្តាលមកពីដំណើរការផ្តល់អាជ្ញាប័ណ្ណផលិតផល និងលក្ខខណ្ឌតម្រូវផ្សេងៗរបស់កម្ពុជា ដែលមិនសូវមានភាពច្បាស់លាស់ ដែលរារាំងមិនឱ្យទំនិញអាមេរិកឈានដល់ទីផ្សារកម្ពុជា។

លោកបន្តថា ផ្នែកធំមួយនៃ «កិច្ចព្រមព្រៀងពាណិជ្ជកម្មទៅវិញទៅមក» រវាងសហរដ្ឋអាមេរិក និងកម្ពុជា ត្រូវបានឧទ្ទិសទៅលើវិធានការដែលតម្រូវឱ្យកម្ពុជាកែលម្អអភិបាលកិច្ច។ ឧទាហរណ៍ កិច្ចព្រមព្រៀងតម្រូវឱ្យកម្ពុជាបង្កើតតុលាការការងារឯករាជ្យ ផ្សព្វផ្សាយព្រាងបទប្បញ្ញត្តិ ផ្សព្វផ្សាយថ្លៃសេវាផ្លូវការទាំងអស់សម្រាប់សេវាសាធារណៈ និងប្រយុទ្ធប្រឆាំងការក្លែងបន្លំ។ ទោះបីជាលក្ខខណ្ឌទាំងនេះត្រូវបានទាមទារដោយសហរដ្ឋអាមេរិកក៏ដោយ ក៏អត្ថប្រយោជន៍ចម្បងនៃលក្ខខណ្ឌបែបនេះភាគច្រើនចូលទៅកាន់កម្ពុជា។

​យោងតាមរបាយការណ៍របស់ក្រសួងពាណិជ្ជកម្ម​ ក្នុងឆ្នាំ២០២៥​ ការធ្វើពាណិជ្ជកម្មរវាង កម្ពុជា-អាមេរិក ​សម្រេចបានជាង១៣ពាន់លានដុល្លារអាមេរិក កើនឡើង​២៩.២​៤% ​កើនឡើង២៩.២​៤% បើធៀបនឹងរយៈពេលដូចគ្នា កាលពីឆ្នាំ២០២៤​ដែលមានទំហំ ១០.១៧ពាន់លានដុល្លារ។ កម្ពុជានៅតែរក្សាបានការនាំចេញទៅអាមេរិកល្អប្រសើរ បើទោះបីជាអាមេរិកកំណត់អត្រាពន្ធបដិកាថ្មីក៏ដោយ ដោយសម្រេចបានប្រមាណ១២.៧៣ពាន់លានដុល្លារ កើនឡើង២៨.៤៨​% បើធៀបនឹងឆ្នាំ២០២៤ ដែលមានទំហំ ៩.៩ពាន់លានដុល្លារ។ ចំណែកការនាំចូលពីអាមេរិកមកវិញ មានទំហំជាង៤១៧លានដុល្លារ​ កើនឡើង ៥៧.៨៣%៕